حادثة اول يونيو2007

حادثة اول يونيو2007

فاكرين موضوع (أول مرة) اللى كتبته من فترة ..كنت عايز اضيف عليه حاجة جديدة اول مرة تحصلى ..اول حادثة..اول مرة اعمل حادثة مروعة فى حياتى...اول مرة احس انى على مشارف الموت و الحمد الله رب العالمين انه نجانى انا و مراتى و شريكى فى المدونة اللى كلكم عارفينه (عمر افندى)اشد مرة احس فيها بتأنيبالضمير فى حياتى على الاطلاق على كل ذنب انا اقترفته و على كل تقصير انا قصرته فى حق ربنا سبحانه و تعالى ...صليت ركعتين شكر بعد ما رجعت مباشرة البيت بعد الحادثة و كان احساسى بيهم قوى جداً لانى فعلاً بشكر ربنا على ما انا به من نعمة...

بشكر ربنا على انه اعطانا عمر جديد نرجع و نراجع نفسنا فيه...بحمد ربنا على انه بعتلى الانذار ده يفوقنى بيه..بترجى ربنا انه يعينى على طاعته.

البطارية اللى انفجرت مية النار اللى فيها على الزجاج الامامى و طارت هية بجانب السيارة على الارض

كبوت العربية اللى طار على بعد 25 متر من العربية

تفاصيل الحادثة

الحادثة ببساطة كانت يوم الجمعة الماضى الاول من يونيو و انا على الطريق الصحراوى متجه الى الاسكندرية للاختلاس ثلاثة ايام فى شاليه على البحر مباشرة حجزهولى زنجو صديقى الصدوق كى نستمتع بالبحر اللى موش هنشوفه انا و مراتى تانى بعد سفرنا الى السودان...و بدأنا الرحلة الساعة 11 صباحاً متجهين الى الطريق الدائرى من منزلنا و توهنا فى المسافة من بيتنا الى الدائرى لمدة ساعة الا ربع و بعدها وصلت لبنزينة الامارات اللى على الصحراوى لاجد اسلام لطفى صديقى فى انتظارى هناك لتسليمى امانة عبارة عن شنطة و موبايل لتوصليهم لعبدالمنعم فى اسكندرية و ودعته و فطرت انا و مراتى و انطلقنا و بعد مرور نص ساعة تقريباً و عند الكيلو 65 معرفشى الاسباب و التفاصيل المنطقية اللى خليت الدنيا ضلمت و الكبوت اتفتح و دخلت فى الجزيرة الوسطى و فى اقل من 5 ثوانى بالضبط كانت العربية متوقفة تماماً و غير مصدقين اننا خرجنا منها على سلام.

مراتى و ابنى رحمة ربنا بنا انه الهمها ان تحضنه و تنزل بيه فى الدواسة منذ بداية الخمس ثوان و دا ستر ربنا بيهم.

عمر و ام عمر عقب الحادث على الطريق فى انتظار اسلام لطفى لانتشالنا من الصحراوى

لقطات من بداية الحادث

خرجنا من السيارة و وجدت بجوارنا على الصحراوى مهندس محترم جداً لا اعرف عنه شىء غير ان اسمه خالد اخرجنا من السيارة هو و زوجته و غسلنا وجوهونا و ايدينا من شظايا الزجاج و قطرات الدم المتساقطة و ظل معنا حتى تعافينا تماماً و اتصلت بإسلام لطفى كى يأتى لانتشالنا من الطريق.

سيارة النجدة مرت علينا لحظة الحادث و هدت شوية علشان يتفرجوا علينا و بعد كده مشيوا و مكلفوش نفسهم ينزلوا يشوفونا عايزين حاجة او عايزين اسعاف او او او.

بعد ربع ساعة تقريباً كل اللى بيعدى علينا مشكوراً بيركن و ينزل يطمن علينا و بعدين يكمل سير ...و انا فى خلال الربع ساعة دى موش عارف اوصل لحد من اصحابى علشان كلهم كانوا بيصلوا الجمعة و موش بيردوا.

بعدها وصل امين الشرطة ... طبعاً ماهى الشركة فى خدمة الشعب...وصل منين و عرف منين موش عارف ..المهم انه بعد حوار طويل و تليفونات اكتر عملها كلها من موبايلى ماضانى على اقرار انى مسئول عن العربية و الحادثة و اخد منى رشوة قيمتها 20 جنيه مقابل انه يقفل الموضوع على كده ..طبعاً ولا انا فاهم اى حاجة بس قالى علشان الاضرار بالمال العام و كمان طلبلى ونش يجى يشيل العربية قولت دا كويس خدمنى بالموضوع ده و اتضحلى بعد كده انه بيتخانق مع الراجل صاحب الونش على عمولته على ال 300 جنيه اللى انا هدفعهمله.

اسلام لطفى فعلاً وقف معايا وقفة كويسه و جالى فوراً التقطنى انا و مراتى و ابنى من على الطريق

و كمان نزلت المهندسين لقيت بندارى و احمد سمير مستنينا هناك وحتى بندارى عرض عليا عرض مجنون من عروضه المجنونة دائماًَ انى اخد مراتى و ابنى و اخد عربيته و اطلع على الصحراوى تانى و اروح اسكندرية اروق دماغى و عادى جداً كل يوم بيحصل حوادث يعنى ايه اللى جرى.

محمد غزلان ..أيام وفاة والدى مقدرشى يكون جنبى علشان كان بيخطب (خطيبته) و يومالحادثة مقدرشى يجى ينتشلنى من الصحراء علشان كان مع (خطيبته) عند المقاول...عامة هية (خطيبته) اكيد طيبة و موش ذنبها انا اللى موش مظبط ظروفى عليها.

مقالة (العربية ..حلاوة روح) من الحاجات اللى مرت على ذهنى بعدالحادث مع انى و الله مكنتش اقصد فى المدونة دى الحادثة بس اهو اللى قولته حصل اهوه ..تعددت الاسباب و النتيجة واحدة.

نص الكوباية المليان

لو بصينا على نص الكوباية المليان زى منا متعود دايماً فى الازمات الكبيرة انى افكر بإيجابية هنلاقى حاجات موش بطالة..

إن الحادثة دى ما هى الا تذكرة من الله سبحانه و تعالى لى انا و زوجتى بضرورة الرجوع اليه و ان احنا كنا فى اقل من خمس ثوانى كنا ممكن نكون واقفين قدامه و بنسأل عن اعمالنا و تقصيرنا و الذنوب اللى اقترفناها فا لازم نرجع اليه و نتوب ...

إن الحادثة لما حصلت زودت صلة الرحم عندنا علشان السفرية بتاعت اسكندرية باظت و بالتالى طلعنا تانى يوم على المنصورة و فرحوا بينا جداً امى و حماتى و حمايا و كل الاهل هناك اننا قعدنا معاهم 3 ايام كاملين.

ان الحادثة رجعتنى امشى تانى امشى لحد اول الشارع علشان اركب تاكسى...امشى من بيت والدتى لبيت حماتى...امشى لحد اختى علشان اسلم عليها ...امشى علشان اجيب طلبات للبيت ...كل ده كنت بطلته تماماً من يوم ما العربية وصلت و بقت تحت رجلى.

أن الحادثة رجعتنى اركب تاكسى للشغل فا رجعت اقرا تانى و انا فى طريقى للشغل و دى حاجة كنت بطلتها تماماً من اول ما بدأت اسوق ..و بقرا فى كتاب حلو قوى الايام دى اسمه (سخر عقلك لضمان الصحة و الثراء والسعادة) او (THINK YOURSELF TO HEALTH,wEALTH & HAPPINESS) للكاتب حوزيف مارفى.

إن الحادثة اتاحت لعمر أفندى فى خلال الكام يوم اللى فاتوا دول ركوب وسائل مواصلات اخرى عديدة و متنوعة مثل الاتوبيس و التاكسى و المترو و القطار و التوكتوك...كل ده فى ثلاث ايام فقط.

فى الاتوبيس فى طريق العودة للمنصورة و الباشا نايم كعادته فى اى مواصلات

فى القطار فى طريق العودة للقاهرة و برده نايم

و هنا فى القطار برده لما بدأ يفوق و يقلبلنا عربية القطر

و هنا فى التوك توك بعد الخروج من محطة مترو فيصل و فى الطريق للبيت

فى النهاية ادعولى ربنا يوفقنى و اسافر السودان على خير كمان عشر ايام زى ما احنا مخططين ...و عايز اقول للى بيحسدنا و فاكر اننا رايحيين نجيب جمال النعمان الحمر من هناك دى سفرية ربنا اللى عالم بيها و محتاج دعاء كل الناس كى يرزقنى التوفيق فيها بإذن الله.

و للحديث بقية.

من مصر إلى السودان

من مصر إلى السودان

رسالة وداع لكل من شاركونى مرحلة مهمة فى حياتى...رسالة وداع لآسرة اى تو مصر ...رسالة حب

قضيت فيها 22 شهر ...22 شهر مؤثرين جداً فى حياتى...22 شهر طورت فيهم نفسى كتير ...و اتعلمت فيهم كتير..و حققت فيهم نجاحات كتير ...الحمد الله رب العالمين على هذه التجربة و هذه المرحلة من حياتى اللى راضى عنها تماماً.

دخلت الشركة بنصيحة احد اصدقائى ان اقدم فى وظيفة مسئول تسويقى و ذلك يوم الاثنين 25 يوليو 2005 على بعد شهر و اسبوع من جوازى ...جاءت النصيحة بأن اقدم استقالتى من ART التى اعمل بها منذ خمس سنوات و ووضعى الوظيفى ممتاز و مستقر...جاءت النصيحة و انا على مقربة من عرض للسفر و العمل فى مدينة الانتاج الاعلامى الاردنية و بمرتب مجزى جداً...جاءت النصيحة بتغير مسار حياتى من الاعلام الى الماركتينج ..جاءت النصيحة من عبدالمجيد مشالى .

المقابلة: كانت المقابلة الاولى مع المهندس حاتم شوشة مدير التسويق و التى استغرقت نصف ساعة تقريباً و بعدها هرعت الى مكتبى لآرسال ايميل شكر له على مقابلته و كان لهذا الخطاب مفعول السحر فبعدها مباشرة اتصل بى ليخبرنى بقبوله لى لمشاركته تكوين فريق التسويق و عليه فلابد من مقابلة اخرى غداً لتحديد تفاصيل العرض و ذهبت اليه و كان الخبر انى سأدخل الشركة على وظيفة مسئول تسويقى وتم تحديد الراتب و ميعاد بدء العمل و سلمت جميع اعمالى ِART و بدأت العمل بالفعل يوم السببت 6 اغسطس 2006.

كنت قلقان ...قلقان على مستقبلى ...قلقان على استقرارى اللى فقدته فى ART ...قلقان من نمو الشركة اللى كانت لسه صغيرة و محدش يعرف عنها حاجة...كنت قلقان على جوازى اللى كان بعد بداية شغلى بثلاثة اسابيع فقط.

الحمد الله اشتغلت و اتعلمت و قرصت على نفسى فى القراءة و الدارسة فى البداية جداً و سؤال من لهم خبرة حتى اكتسب الحد الادنى من المعلومات اللى يسندنى و انا بكتسب الخبرة و بعد ثلاث اسابيع بس اخدت اجازة الجواز اللى كانت عشر ايام اتقطعوا بيوم شغل بعد خمس ايام واللى إلى الان مراتى موش نسياهولى ولا نسياه لمديرى انه قطعلى اجازة جوازى علشان انزل الشركة ابعت ايميل ...و بعد الاجازة رجعت على رحلة الشركة السنوية و حصلت فيها على جائزة احدث عريس بالشركة.

ال22 شهر دول هقسمهم لثلاث مراحل ...المرحلة الاولى اول خمس شهور و الثانية 2006 و الثالثة 2007 و هنتكلم عن كل مرحلة على حدة و بسرعة متقلقوش ..

المرحلة الاولى (اول خمس شهور) و كان من اهم احداثها حفلات التجار التى جابت محافظات مصر فى شهر رمضان (القاهرة – الاسكندرية-المنصورة-اسيوط)و من قبلهم حفل البائعين بكتراكت المريوطية و فى اخر شهر فى هذه المرحلة كان العمل الذى كلفنى به المهندس حاتم و تعلمت منه الكثير و الكثير حتى انه يعد اهم الاعمال التى قمت بها فى الشركة على الطلاق و هو تجهيز خطة عمل لعام 2006 و استمر التجهيز بها لأكثر من 3 اسابيع و بنجاح الحمد الله و حصلت على مكافأة تشجعية عبارة عن نصف شهر.

المرحلة الثانية 2006 و هنا تمت ترقيتى الى SENIOR MARKETING EXECUTIVE و بدأ عدد الادارة فى الإتساع الى اثنثن بقدم شريف عاكف ثم ثلاثة بقدوم طارق عبدالمحسن ثم اربعة بقدوم هبة حبيب و حصلت فى هذه السنة على شهادة تفوق اعلى مستوى اداء بالإدارة لعام 2005 فى حفل الشركة السنوى.

اجتماع من اجتماعات الادارة فى مينا هاوس (ادارة رايقة برضه)

اجتماع تانى من اجتماعات الادارة فى نايل سيتى على النيل (موش بقولكم ادارة رايقة)

المرحلة الثالثة 2007 و هنا تمت ترقيتى ايضاً الى مشرف تسويقى MARKETING SUPERVISOR و ازداد عدد افراد الادارة بقدوم احمد سمير و من بعده هادى خليل و حصلت كذلك على جائزى اعلى معدل اداء لعام 2006 فى اجتماع الشركة السنوى فى فبراير 2007 .

و الان اودع الشركة فى مصر لبدء حياة جديدة و تحدى جديد فى فرع الشركة بالسودان على منصب جديد كمدير تسويق و هو تحدى اتمنى من الجميع ان يتمنى لى التوفيق و السداد به .

و لكم يحزننى فراق فريق العمل بمصر و لكم انا خائف من خوض تجربة الغربة فى حد ذاتها...خائف على تربية (عمر افندى شريكى فى الموقع ده) فى بيئة مختلفة تماماً.

هفتقد العديد من الناس و منهم على سبيل المثال لا الحصر

مديرى و زملائى بالمكتب (هبة و احمد و طارق و هادى)
هيوحشنى خناق طارق و هبة اليومى...

و كمان هيوحشنى مستوى اداءهم لما بيركزوا قوى فى الشغل و بيطلعوا كل مواهبهم فى الابداع التسويقى
هيوحشنى افيهات و تعليقات (احمد سمير) و ذاكرته الفنية التى لا تنضب ابدأ...
كمان هادى اللى ملحقتش اقعد معاه و قد ايه بيبقى مضايق و طارق محسسه بإضطهاده ليه بصورة دائمةهيوحشنى (شريف عاكف) ابن الناس اللى لا يكل فى انه يحكى عن ذكرياته فى نادى الصيد و المهندسين 60 ساعة بدون توقف و اد ايه الكافلن الالماظ اللى كان لابسه على الكرافت الروز كانوا معلقين مع كل الحضور فى الديفيليه اللى كان حاضره فى سويسرا من خمس سنين.
و كمان هفتقد استاذ( اشرف حلمى) جداً و اود ان اذكر انى فعلاً احبه فى الله فهو صعيدى راجل بكل ما تحمل الكلمة من معانى و بغض النظر عن شدته فى العمل فهو على مستواه الشخصى شخص حبوب و جدع جداً و كمان هفتقد عمرو شرويد و طرئعته الزايدة عن الحد و ربنا يكرمه بالموتوسيكل اللى نفسه فيه قريب.

و( تامر العشرى و قرينه حسن فضالى) و منقارتهم لبعض حتى بعد ما تامر سابلوا المكتب و مشى

و مهندس الصيانة بتاع الاى تى الحبوب و محدش يدقق معايا فى وظيفته (عمرو الشيمى)

و مهندس الصيانة التانى اللى لا نكل و لا نمل من اننا نطلب منه يصلحلنا موبيلاتنا و عمره ما رفضلنا طلب (عبدالموجود خميس) مع انه فى الصورة دى شاكله كده طموح و بيخطط لحاجة و الحدق يفهم.

و منساش مديره اللى بيعلم الشركة كلها الذوق فى التعامل مع الاخرين مهندس (سالم علبداللطيف) و دى صورته فى اقاصى الصعيد و هو بيعشى على ابن محمد زكريا (راجل زوق فعلاً).
و( اسماء عادل) اول من تحدثت معه فى الشركة و قدمتنى للمهندس حاتم فى الانترفيو اللى اتكلمت عليه فوق وكمان سارة هانم قرينتها فى المكتب و دى صورتهم و هما هربانين من الفار اللى طلعلهم فى المكتب.
و بلدياتى( أحمد الوكيل) الاكسيلنس دائماً.

و صاحبى و اعز اصدقائى زنجو و شهرته( احمد ادم) بتاع اسكندرية احسن بياع فى الشركة .
و منساش و انا فى اسكندرية المدير المنظم الذى لا يشكو منه احد على الاطلاق( اشرف عبدالعاطى) .

كمان هفتقد استاذ (هشام كامل) الراجل الدبلوماسىقوى و صاحب اشيك ربطة كرافتة فى الشركة و مدير القطاع المالى و الاحتياجات و الموارد البشرية عند اللزوم .
و نهاية مقدرشى انسى حبيبى (نوح) اللى بييلحقنى كل يوم الصبح بواحد شاى من غير سكر و ضحكته الجميله لا تفارقه و بيقولك تأمر يا بشمهندس

والله هفتقد كل من تعاملت معه بالشركة.


فى النهاية اتمنى من الجميع ان يقوموا بكتابة تعليق الان برأيه فى باسم الشربينى من ايجابيات و سلبيات و نصائحه لى فى المرحلة القادمة.

مستنى تعليقاتكم

-----------------------------------------------------------------------------------------------------

مواضيع ذات صلة بالحدث يمكن الاطلاع عليها

السودان

أبوعمر فى السودان

العربية ..حلاوة روح

أبوعمر فى سطور 1

أبو عمر فى سطور 2

السودان

السودان

مقر الشركة بالخرطوم

السودان دولة شقيقة تعدادها 40 مليون نسمة بس مع انها اكبر دولة عربية من حيث المساحة ...السودان محتاجة مدير تسويق لشركة اى تو هناك...و دا الخبر اللى عايز اقوله ان باقى من الزمن اقل من شهر على انتقال مقر إداره هذا الموقع www.omarafandy.com الى الخرطوم نظراً لآنتقالى للعمل كمدير تسويق لشركة اى تو هناك
.

موش عارف دا قرار صائب ام لا لكن انا صليت استخارة و قدر الله لا يأتى الا بخير و انشالله ربنا يعينى و يوفقنى فى هذه التجربة الجديدة .

ادعو لى بالتوفيق جميعاً و اللى عنده اى معلومة عن البلد عن الناس هناك عن حجم السوق هناك عن طباع السكان الشرائية عن اى حاجة يبعت و يكتبلى تعليق يفيدنى بيه

ابو عمر فى السودان

أبو عمر فى السودان

رحلة عمل الى السودان لمدة يومان كانت الاربعاء و الخميس ...رحلة جميلة متعبة غريبة

اكتب هذه المدونة من مطار الخرطوم فى انتظار الطائرة المتجهة الى نيروبى (عاصمة كينيا)لكى اقلع من هناك مرة اخرى الى القاهرة

السودان...تقدر تقول كده اسيوط...المنيا ...او قنا على رأى واحد صعيدى قاعد هناك...بلد عادية متقدرشى تقول غير كده لا حلوة ولا وحشة بس اقل من مصر و يقال انها تتطور و قادمة بسرعة كبيرة ..

ندهو علينا دلوقتى فى الاذاعة...تفاصيل الرحلة و هل سأعود الى السودان مرة اخرى ام لا ...كل ذلك فى المدونة القادمة انشالله لما ارجع بلدنا بالسلامة

ادعولى

انظر الى عينى

انظر الى عيني

كلمات الاغنية

Look into my eyesTell me what you seeYou don't see a damn thing'cause you can't relate to meYou're blinded by our differencesMy life makes no sense to youI'm the persecuted oneYou're the red, white and blue
بص جوه عينيا
قولى انتا شايف ايه؟
انتا موش شايف اى حاجة
لآنك ليس لك اى علاقة بى
انتا معمى بالإختلاف اللى بينا
حياتى بلا معنى بالنسبة لك
أنا الشخص المهدد
و انتا الاحمر و الابيض و الازرق


Each day you wake in tranquilityNo fears to cross your eyesEach day I wake in gratitudeThanking God He let me riseYou worry about your educationAnd the bills you have to payI worry about my vulnerable lifeAnd if I'll survive another dayYour biggest fear is getting a ticketAs you cruise your CadillacMy fear is that the tank that has just leftWill turn around and come backكل يوم انتا بتصحى مطمن
مفيش خوف جوه عينيك
كل يوم انا بصحى بكل امتنان
بشكر ربنا انه سابنى عايش
انتا قلقان على تعليمك
و الفواتير اللى المفروض تدفعها
و انا قلقان على حياتى المباحة
و إذا كنت هعيش يوم كمان
خوفك الكبير فى هو حصولك على تذكرة
و انتا بتلف بعربيتك الكاديلاك
و انا خوفى ان الطيارة الحربية اللى لسه ماشية
هترجع و تلف تيجى تانى

Yet, do you know the truth of where your money goes?Do you let the media deceive your mind?Is this a truth nobody, nobody, nobody knows?Someone tell me ...
و على كل هل تعرف حقيقة فلوسك بتروح فين؟
ولا يا ترى سايب الاعلام يضحك عليك و يغويك
ولا دى الحقيقة اللى مفيش حد عارفها
حد يرد عليا....
Ooohh, let's not cry tonightI promise you one day it's throughOhh my brothers, Ohh my sistersOoohh, shine a light for every soul that ain't with us no moreOhh my brothers, Ohh my sisters
اوووه خلونا منبكيش النهاردة
اوعدكم ان كل ده هيعدى يوما ما
ااااه يا اخواتى و يا اخواتى
اااااه اشعلوا الشموع على كل روح موش موجودة معانا دلوقتى
ااااااااه يا اخواتى
See I've known terror for quite some time57 years so cruelTerror breathes the air I breatheIt's the checkpoint on my way to schoolTerror is the robbery of my landAnd the torture of my motherThe imprisonment of my innocent fatherThe bullet in my baby brotherThe bulldozers and the tanksThe gases and the gunsThe bombs that fall outside my doorAll due to your fundsYou blame me for defending myselfAgainst the ways of my enemiesI'm terrorized in my own land (what)And I'm the terrorist?
عارفين...انا عرفت معنى الارهاب لفترة
منتهى الوحشية لمدة 57 سنة
الحرب بتتنفس الهواء اللى بنتنفسه
نقطة التفتيش فى طريقى للمدرسة
الارهاب اللى بيسرق ارضى
و اللى بيعذب امى
و اللى بيسجن ابويا
و الرصاصة اللى فى اخوايا الصغير
و البلدوزر و الطيارات الحربية
و الغازات و المسدسات
و القنابل اللى قدام باب البيت
كله كله من رصيد فلوسكم
بتلموونى علشان بدافع عن نفسى
ضد عدوى
أنا مرهب فى بلدى
و انا الارهابى؟

Yet, do you know the truth of where your money goes?Do you let the media deceive your mind?Is this a truth nobody, nobody, nobody knows?Someone tell me ...
و على كل هل تعرف حقيقة فلوسك بتروح فين
ولا سايب العالم و الاعلام يضحك عليك و يخدعك
و لا دى الحقيقة اللى مفيش حد على الاطلاق يعرفها
حد يعرفنى يا جماعة...

Ooohh, let's not cry tonight, I promise you one day it's throughOhh my brothers, Ohh my sisters,Ooohh, shine a light for every soul that ain't with us no moreOhh my brothers, Ohh my sisters,
اوووه خلونا منبكيش النهاردة
اوعدكم ان كل ده هيعدى يوما ما
ااااه يا اخواتى و يا اخواتى
اااااه اشعلوا الشموع على كل روح موش موجودة معانا دلوقتى
ااااااااه يا اخواتى
Americans , do you realize that the taxes that you payFeed the forces that traumatize my every living daySo if I won't be here tomorrowIt's written in my fateMay the future bring a brighter dayThe end of our wait
ايوة يا امريكان ...هل ادركتم ان الضرائب اللى بتدفعوها
بتدعم القوات اللى بتعذبنى كل يوم
و لذلك لو مكنتوش هنا بكرة
دهمكتوب فى قدرى
يمكن المستقبل يحمل يوم افضل
و ينتهى به انتظارنا
(pause)Ooohh, let's not cry tonight, I promise you one day it's throughOhh my brothers, Ohh my sisters,Ooohh, shine a light for every soul that ain't with us no moreOhh my brothers, Ohh my sisters,

اوووه خلونا منبكيش النهاردة
اوعدكم ان كل ده هيعدى يوما ما
ااااه يا اخواتى و يا اخواتى
اااااه اشعلوا الشموع على كل روح موش موجودة معانا دلوقتى
ااااااااه يا اخواتى
[with kids]Ohh let's not cry tonight I promise you one day is throughOhh my brothers! Ohh my sisters!Ooh shine a light for every soul that ain't with us no moreOhh my brothers! Ohh my sisters!


اوووه خلونا منبكيش النهاردة
اوعدكم ان كل ده هيعدى يوما ما
ااااه يا اخواتى و يا اخواتى
اااااه اشعلوا الشموع على كل روح موش موجودة معانا دلوقتى
ااااااااه يا اخواتى

* شكر خاص لمن ارسلها لموقع عمر افندى و من ساهم فى ترجمتها الى العربية*

خالى من الكوليسترول

خالي من الكوليسترول

حد فاكر فيلم خالى من الكوليسترول بتاع اشرف عبدالباقى وإلهام شاهين و خلود...أنا شخصياً عجبنى الفيلم جداً مع انه من الافلام اللى فشلت سينمائياً فشل ذريع(نقد الفيلم من صديقى البراء أشرف) يمكن لآنه موجه قوى فى صميم اكل عيشى و هو الاعلانات و التسويق فا علشان كده عجبنى ...المهم نرجع لموضوع التدوينة و سبب نشوب الفكرة فى دماغى...

طبعت من يومين عدد 208 صورة من احلى ما صورت لعمر افندى الفترة اللى فاتت علشان يتأرشفوا فى البوم صوره الكبيرو خلال ترتيبى ليهم امبارح فى الالبوم لقيت ان فى صور كتير منها ليها علاقة بالتسويق ...ليها علاقة بالاعلانات...الله اعلم هل ده نتج عن انى انا اللى بصور فا غصبن عنى بروح بركز على الماركة الاعلانية

أو لانى انا اللى بتفرج على الصور فا عينى راحت برضه عليها فى الصور.

عامة انا هسيبكم مع المدونة المصورة دى برضه تتفرجوا على احدث اعلانات عمر افندى موديل الاعلانات الشهير

نبتدى بالمكان اللى ابوه بيشتغل فيه اى تو

و دى صورة سيريالية تانية من بره زجاج السيارة الامامى و يظهر بها لوجو الشركة متعلق فى المرايا

كارفور المعادى

داليدريس فى سيتى ستارز

و منساش نوكيا مع جده

كمان شارك الاهلى احتفالاته بالمئوية

جينو كارينوز مصر الجديدة - احدى مطاعم سلسلة تروبيكانا

سوبارو الهرم -احدث مطاعم البيتزا الايطالية فى مصر

مطعم ستوديو مصر احد مطاعم سلسلة تروبيكانا

و الموديل الجامد بتاعنا اصر انه يشارك بنفسه فى حملة التوحيد و النور فى افتتاح فرعه الجديد بفيصل و دى صورة من قلب الموقع اثناء تفقده لاقسام المحل الجديد.

شاركونى برأيكم و تعليقاتكم على الصور كلها ... وهل عمر افندى ينفع موديل اعلانات ولا لآ... علشان لو كده نقدمله فى كاست اجينسى و لو ربنا كرمه موش هينساكم صدقونى دا ابنى و انا عارفه.

أول مرة

أول مرة

عمر افندى اوحالى فكرة مدونة اسمها اول مرة...فى حاجات كتير فى حياتنا ممكن تعدى اللحظة اللى كانت اول مرة نعملها فى حياتنا و ننساها بعد كده فى حين انها ممكن تكون فى يوم من الايام ذكرى جميلة..

التعليق اللى جالى على موضوع العربية ...حلاوة روح من هبة و بيقول ان اكيد فى يوم من الاسام هركب عربية تانية غير دى و دى هتبقى ذكرى جميلة ...ذكرى اول مرة ركبت عربية ...بالمناسبة اول مرة ركبت العربية اللانوس دى كنت انا و هبة اللى معايا فى الشغل رايحين اجتماع خارج الشركة و بنفتح نجوم اف ام لقينا كريم الحميدى بيقول و موضوع حلقتنا النهاردة فاكر اول مرة سوقت فيها ...قولت هو الراجل ده شايفنا ولا اه.

نرجع لفكرة اول مرة...عمر افندى ركب على الموضوع كعادته دائما ًبصوره الحاضرة دائماً و بيقولنا ..انا اول مرة اكلت فيها اى حاجة تانية غير اللبن كانت قطعة بسكويت مارى مبلولة فى مية ...و ذلك فى يوم 7 يناير 2007 الساعة 11:20 مساءاً يعنى بعد مرور خمس اسهر الا اسبوع على قدومه الى هذه الدنيا بالتمام و الكمال ...و على فكرة اكلها بشكل جيد.

صورة عمر متلبس بالبسكويت

اول مرة اتكلمت فيها انجليزى كنت فى انترفيو فى شركة ادوية سنة 2000 واللى قابلنى راجل امريكى و يوميها قررت انى لازم اتعلم انجليزى علشان متحطش فى الموقف الصعب ده تانى.

اول مرة قولت لمراتى بحبك ..كان يوم الاربعاء 26 يناير 2005 .بعد كتب الكتاب علشان كنت فاهم انى لو قولتلها بحبك قبل كتب الكتاب هبقى كده تخطيت حدودى الشرعية ...كنت ساذج شوية: )))
أول مرة عمر ضحك فيها ...كانت بعد ولادته بخمستاشر يوم تقريباً و كلنا فرحنا قوى بس بعد كده جيت اكتر من رواية و تحليل للضحكة دى من المفسرين و المتخصصين و اصحاب الشأن - حلوة اصحاب الشأن دى – منهم من قال انها غازات و هو نايم ...و منهم من قالى دى الملائكة بتضحكه و دا التفسير اللى انا حبيته ان ابنى و هو نايم الملائكة تبقى بتضحكه.

أول ضحكة لعمر افندى

اول مرة استخدمت فيها جهاز كمبيوتر كانت سنة 1996 و كان جهاز واحد صاحبى اسمه محمد الحداد و كان IBM عليه دوس و ويندوز 3.11 و اشتريت انا واحد فى 1998.
أول مرة ركبت فيها طيارة كان فى 30 مايو 2003 فى رحلة تدريب تابعة لشركة بزناس فى دبى و كانت الرحلة لمدة اربعة ايام فقط بس كانت من امنيات حياتى انى اجرب ركوب الطيارة و اول ما ركبت الطيارة عطلت و فضلنا يوم فى فندق موفينبيك المطار الى ان استبدلونا الطيارة فى صباح اليوم التالى بطيارة اخرى سليمة.(شوفتوا الحظ)الصورة دى فى دبى.

صورة من دبى

أول مرة وقفت قولت كلمة فى ميكرفون الاذاعة كان فى شتاء 1991 و كنت فى سنة تانية اعدادى و من يوميها و انا حبيت الميكرفون قوى و مسبتوش غير بعد ما خلصت رابعة ثانوى فى 1996.

أول مرة عمر راح فيها للدكتور كانت فى 14 اغسطس 2006 و هو عمره يوم واحد فقط بالتمام و الكمال .

اول مرة عمر افندى يحلق شعره كانت يوم الخميس 26 ابريل 2007 يعنى بعد مرور ثمانية اشهر و نصف تقريباً من عمره , تابعوا تلك اللحظات فى مدونة حادثة المزين
اول مرة اشتغل كانت فى فبراير 2001 فى ART و الحمد الله ربنا فتح عليا من يوميها و شغال فى شركات كبيرة.لمزيد من التفاصيل فى ابو عمر فى سطور2.

و انتم كمان كل واحد يفكر فى حدث قام به لاول مرة و يكتبوا فى التعليقات حالاً

أبو عمر