Tuesday, April 3, 2007

الكوباية المليانة





كنت مخنوق قوى امبارح لأسباب كتيييييير


مديرى و اهلى فى المنصورة و اصحابى اللى جنبى فى المنطقة...كل الناس دول اجتمعوا على هدف واحد امبارح ...انهم يملوا الكوباية


ايه موضوع الكوباية ده...موضوع الكوباية ده نقلاً عن بدوى صديقى الجديد اللى لسه عارفه من شهر بس و اللى خرجت اتفسحت معاه امبارح و اتمشينا على النيل و اكلنا قرع عسل و حكينا انا و هو كتير و فضفضنا كتير ارتحتله كتير قاللى ان الدكتور ابراهيم الفقى (اللى انا مبحبش اتفرج عليه مطلقاً)ذكر فى احدى محاضراته ان الواحد مننا بيخرج من بيته الصبح زى الكوباية الفاضية و بمرور الوقت على مدار اليوم بيقع من الميكروباص و هو ماشى فا الكوباية بتتملى شوية و بتنرفز من مديره فا الكوباية بتتملى كمان شوية و بيروح البيت يلاقى الاكل لساله نص ساعة و يخلص فى حين انه جعان مووووت فا بتتملى الكوباية شوية لحد ما بتبدأ تنزل مية زايدة و فى هذه المرحلة ببيبقى الشخص بدأ يضر بالاخرين بسبب ضيقه فا علشان كده لازم كل شوية تفرغ مية من الكوباية بإنك تحاول تغير من موودك و مزاجك بأى طريقة ...ممكن بنكتة ممكن بالصلاة و الاستغفار ..ممكن بمكالمة لحد انتا بتحبه..و ممكن بإنك تخرج مع بدوى و تاكل قرع عسل من عند لارين و تتمشى على النيل ,,,لانى ارتاحت بعدها و بعت رسالة اصالح بيها احمد سميراللى انا كنت ضايقته على مدار اليوم معايا فى الشغل


انا مبسوط قوى بالنصيحة وعلشان كده قررت انقلهالكم


و مبسوط قوى بمعرفتى ببدوى جداً


و مبسوط قوى انى بدون دلوقتى


تقريباً احسن حاجة تفرغلك الكوباية بتاعتك انك تتدون


اشوفكم مرة تانية

6 comments:

الكواكبي said...

قرع عسلي!! اول مرة اشوف حد من مواليد الربع الأخير من القرن العشرين بيخرج يتفسح ياكل قرع عسلي!! انت بتفكرني بقصص امي الله يكرمها عن خروجتها مع ابويا علشان ياكلوا جرانيتا من عند ويلسون
عموماً انا تقريباً هاعمل عملية تقييم لعلاقتي بيك بعد موضوع القرع ده؛ قال قرع قال

samir said...

ياباشا املى الكوبيات اللي انت عايزها ولا يهمك......... وكل اللي انت عايزه مفيش حد شريكك تفضي كوبايتك ازاي

shozy85 said...

السلام عليكم
نصيحة حلوة وقيمة
جزاكم الله خيرا

هانتظر زيارة حضرتك على مدونتى المتواضعة

اروى said...

ههههههههههه
حلوة التدوينة دي قوي
بس معلش
هو ايه قرع العسل ده معلش اصلي جاهلة شوية
علي فكرة هاستناك تنورني

واحدة من الاخوان بتحب البلد دي said...

انا متعودة افضي الكوباية اولا باول ومسيبهاش تتملي

بس اليومين اللي فاتوا الناس بتملاها بمعدل اسرع مني كتيييييييييييير

باحاول افضيها ومش بالحق


بوست جميل يا ابوعمر

صحيح كنت حانسي
هو ايه قرع العسل ده

abouomar said...

يا جماعة قرع عسل ...
حاجة كده منت فاكرها ام على و بعد نص الطبق لقيت الطعم متغير شوية و مفيهاش مكسرات فا بدوى قالى دا قرع عسل موش ام على ...عامة عند لارين اللى فى المنيل
روحوا جربوه

ابو عمر