Sunday, July 8, 2007

الحب النقى


(من غير علشان؟؟)

" ياترى اللى بيقولى بحبك ده ...بيحبنى بجد...طيب و لوبيحبنى بجد بيحبنى ليه؟؟؟ هل بيحبنى علشان هو ابويا...ولا علشان هو اخويا...ولا علشان هو صاحبى...ولا علشان انا زميله فى الشغل...بيحبنى ليه؟؟
علشان انا بعامله كويس ...و لا علشان انا لو قدرت اساعده بساعده...اللى بيحبنى بيحبنى ليه؟؟؟ حد فاهم حاجة"

كنت فى اسكندرية من فترة , و بينما انا قاعد على على بعد متر و نص من مياه البحر و فى تمام الساعة الرابعة فجراً نشبت فكرة التدوينة دى ..و هي عن اللى بيحبنى ليه بيحبنى ...وهل فى فى حياتى حد بيحبنى من غير سبب؟؟طيب و لو فى حد كده انا عرفت منين و كمان هو مين الحد ده؟؟

قبل ما ابدأ عايز اقول انى بتكلم عن مرحلة من الحب ملهاش دعوة بالحب الشريف و الحب الخبيث و ملهاش دعوة بالحب الصادق و حب المصلحة ...لآ دى فى الحب الشريف الصادق الكويس الحلو بس فوق ده كله الحب" المشفى " –بتشديد الفاء- يعنى الخالى من اى شوائب و فوق ده كله منزوع الدسم قصدى السبب يعنى لو جيت تدور على سبب للحب ده موش هتلاقى ...حتى لو السبب منطقى و قوى زى مثلاً انى حب الام لآبنها ...حب صادق و جميل بس فى نفس الوقت فى سبب قوى للحب ده و هو ان دى امه فا لازم تحبه...انا موش بتكلم عن الحب ده بقى ...انا بتكلم عن الحب اللى ملوش اى سبب ...اعتقد كده وضحت الفكرة المجنونة.

طيب ممكن اسال سؤال ...هو يعنى ايه حب أصلاً؟؟؟ هل هو موجود فعلاً ؟؟ ممكن حد يقول انى بسأل سؤال قديم جداً و تقليدى لكن للأسف ...محدش عارف يجاوبه اجابه شافية الى الان ...يعنى ملامحه ايه الحب ده ...مواصفاته ايه ...طعمه ايه؟؟؟

انا فى حياتى ناس كتير بحبهم و بيحبونى و منهم اللى لسه معايا الى الان و منهم اللى كنت بحبه فى مرحلة ما فى حياتى وافترقنا لظروف ما فا انقطعت علاقتنا زى بعض اصحابى فى الابتدائى منهم واحد اسمه جابر ...كنت بحبه بس خلاص لانى موش بشوفه منذ ما يقرب من 20 سنة فا معنتش بحبه حتى لو شوفته دلوقتى ...نطلع فوق شوية و فى الثانوى هتلاقينى كنت بحب ناس تانية و نفس الكلام و هكذا ...ليه؟؟ لانى كنت بحبهم علشان هما زملائى او اصحابى ...كمان فى الجامعة كمان حصل نفس الكلام ..الناس دى بحبهم علشان هما زملائى و ده موش عيب ينتقص من قدر حبهم فى قلبى لكن فى ناس بقى تحس انهم بيحبوك بجد ...كده ...بدون اى سبب منطقى...بدون اى علاقة وقتية ..و الناس دول حتى لو انتفى الرابط بينك و بينهم بيفضلوا يحبوك و تحبهم و بين فين و فين بتتطمنوا على بعض و ممكن ينطبق عليهم قول ان الناس دى كيمياتهم راكبه لى بعضها و زى ما الرسول صلى الله عليه و سلم بيقول الارواح جنود مجندة , فما تعارف منها ائتلف ، وما تناكر منها اختلف
و هذكر بعض الناس دول و هنور عليهم الكشاف شوية


وجدى الشناوى

استاذ وجدى الشناوى ...ابن المنصورة ...مدير قنوات الموجهات براديو و تليفزيون العرب و من قبلها مدير فرقة الفنانين المتحدين و حاجات تانية كتير...كان موش مديرى فى الشغل لكن كنا بنحب بعض و لا زلنا ...لازال بيحبنى و بحس انه بيحبنى كده بدون سبب انى زميله فى شغل او انى فى سن ابنه الوحيد كريم او اى حاجة,
حب نقى من اللى بحكى عنه...حتى بعد مرور سنتين على غيابنا عن بعض كنا كل فترة لازم تليفون منى او تليفون منه نطمن على بعض و لما روحت اسلم عليه من اسبوع علشان مسافر قعدنا اكننا كنا مع بعض امبارح و فى مكتبه زى مكنا متعودين يومياً اتناقشنا فى كل اللى كنا بنحب ندردش فيه كل يوم لمدة ثلاث سنوات انا و هو و صديقنا التالت هشام يحي اتناقشنا فى الكورة و الاهلى و الزمالك و اتناقشنا فى السياسة و وضع البلد المهبب ..و اتناقشنا فى الشركة و احوالها و فى كل الامور بيرد و بيتناقش بهدؤه المعهود دائماً و تعليقاته الطريفة...حسيت انى فعلاً ان العلاقة بينى و بين استاذ وجدى مختلفة عن اى حد تانى.

نصرة فتحى
(بنت من شبرا)

نصرة و استاذ وجدى اثناء عملنا فى راديو و تليفزيون العرب فى 2003

نصرة ...اول من قابلنى من زملائى بالاى ار تى منذ ست سنوات و من يوميها و هية زميلة عزيزة و بحس اننا فعلاً بنعز بعض كده بدون ابداء اسباب و موش علشان زملاء عمل بدليل ان بعد ما هاجرت قبرص و عاشت هناك هية و جوزها و واحنا لسه على اتصال مباشر و الى الان انا و مراتى و هية و جوزها احمدو لما بينزلوا مصر دايماً لازم بنتقابل ...علشان كده نصرة حد مختلف عن اى حد تانى


أحمد آدم

فى جلسة الوداع قبل ما اسافر السودان فى مطعم باباجونز بالمهندسين
اللى تقريباً بقى راشق فى كل تدوينة بكتبها الفترة اللى فاتت راجع تدوينة اسكندرية كمان و كمان ..من الناس اللى بحس انهم بيحبونى كده برضه ...مع اننا كنا فى الكلية اصحاب كتير و حبايب بس فى النهاية هو اللى خرجت بيه من الكلية صديق صدوق...و على اتصال الى الان حتى بعد مرور سبع سنين ...نحب نتقابل كل شوية ...نحكى مع بعض على اخبارنا ...و نطمن على بعض بالتليفون كل فترة ...مفيش مانع اسقط عليه فى اسكندرية اتغدى معاه و نتكلم و العكس صحيح..لان علاقتى بزنجو فعلاً مختلفة عن اى حد تانى..

بدوى الشريف



شخص اتعرفت عليه من 4 شهور بس وسبق ان ذكرت اسمه فى مدونة الكوباية المليانة بس نفس الاحساس بكلمكم عنه بالظبط...بحس ان الشخص ده بيحبنى كده ...من غير علشان ...من غير ابداء اى اسباب حتى لو اسباب منطقية...بس بيحبنى و بنحب نقعد مع بعض و بنحب نحكى مع بعض غير اى حد نانى حتى و ان كنت لسه عارفه قريب جداً

هيثم العزازى



او (عز) زى ما كنا بنندهله فى ايام شغلنا مع بعض فى بزناس من ثلاث سنين تقريباً ...على فكرة فى مجموعة اصحابى طلعت بيهم من بزناس من اعز اصحابى دلوقتى (هوانا والبناو محمد على و احمد زكريا و احمد صمدى) لكن عزازى من الناس اللى بحس انهم بيحبونى كده وش موش علشان احنا اصحاب ...ولا علشان اى حاجة تانية ..و للسبب ده علاقتنا مختلفة شوية ...نتقابل كل فترة لوحدنا نحكى و نطمن على بعض على قهوة قشتمر فى الظاهر اللى كان بيقعد عليها نجيب محفوظ زمان...و قد ايه بفتقد تليفونه كل فترة بس علشان نسلم على بعض موش اكتر لان انا و عز غير اى حد تانى.


و دول على سبيل المثال لا الحصر علشان محدش يزعل منى ...و قبل دول كلهم تيجى مراتى اللى بحس انها بتحبنى موش علشان انا جوزها لا كده و خلاص و بدون ابداء اسباب...

و ارجع اأكد ان دا موش معناه ان اخواتى موش بيحبونى ...لا بيحبونى بس علشان انا اخوهم و زمايلى فى الشغل بيحبونى بس علشان انا زميلهم فى المكتب و اللى ساكن جنبى بيحبنى علشان انا جاره و بعامله كويس ...فى سبب كويس او وحش موش هي دى قضيتنا ولا بننتقص منقدر الانواع دى من الحب.

يلا كل واحد قرأ الموضوع دلوقتى يشاركنى بتعليق فيه راية فى المنطق ده و لو موافقنى يعصر دماغه و يكتب عن الناس اللى هو حاسس انهم بيحبوه بجد حب نقى مفيهوش كلمة علشان كذا كمان هايز الناس اللى تقدر توصف العلاقة دى بشكل ادق أو تسميها بمصطلح تبقى كده ساعدتنا كتير


22 comments:

يلا مش مهم said...

صاحبي
زي ما قلتلك
القصة باختصار
ان الارواح جنود مجندة ما تعارف منها ائتلف وما تناكر منها اختلف
يعني انا ساعات بقابل حد الاقي نفسي كاني اعرفه من سنين وفي لحظات اسلم ليه قيادي وابوح ليه بحاجات من الممكن ان اللي يعرفني من سنين ما يعرفش عشرها
فمن الممكن ان احنا نسميها تالف ارواح وهي اكبر من الصداقة واقل من الحب
مش عارف انا وصفت صح ولا ايه
ويللا مش مهم

طارق said...

اه طبعا فيه حب من غير سببب .. يعنى انا مثلا بحب المحشى ورق العنب من غير سبب مع أن فيه أكل كتير حلو واجمد بس انا بضعف قدام محشى ورق العنب . المشكلة ان اللى أكبر مننا علمونا أن محدش يظهر مكنون الحب ده بصراحه وده لأن الحب من غير سبب قلة أدب . المهم انت تبقى كويس يا عم باسم .... أوعى تزعل بس أنا طالبه معايا هلس ومش عارف أتكلم جد يمكن علشان بعيش قصة حب جديدة ... ومن غير سبب.

Anonymous said...

sad2ni lazem el wa7ed y3esh w 3aref eno by7b 7d w fe 7d be7bo, bs ymkn mosh el mafrod tefkr b3mk awi fe el 7agat de 3shan it is a human nature en mosh hatla2i 7d be7ebk fe kol 7aga fek aw bardo bekrah fek kol 7aga, f hatla2i s3at t7s en 7d bey7bk w s3at tania t7s en da mosh s7e7, m3 en fe el 72i2a hwa be7bk w mosh be7bk fe nfs el w2t.
w fe no3 ymkn ykon bey7bk kda lelah fe lelah 7ta momkn maykonsh y3rafk kewais bs hea betegi kda,
bs walahi ya basem z7met el donia b2et mosh betedi forsa en 7d y3abr 3n 7obo bgd,
w 3la fekra hea mosh 7aga 2olila en tela2i 7d be7bk 3shan enta akho aw zemelk aw all of these, fe nas 7ta mosh bet7s bet3m el 7b da. w enta law kont mosh kewais 3omr ma el nas hat7bk wla 3shan zemelhm wla akhohm wla 7ta abohm.
bs u r a person that any one should luv u fe allah f3ln.
bs ymkn mawdo3k da y2kd 7aga mohma awy ya afandem, en el gwaz da el forsa el wa7eda lel wa7ed eno yekhtar eno y7b mosh yb2a mogbr eno y7b, y3ni ana b7b folan 3shan kda w married not cos we r married we luv each other, enta 3aref e7na makhtarnash ahlna, gensetna, zamaylna, fa lazm nekhtar b2a mosh kda wla eh ya beso?
i ve to say en el mawdo3 7lw awy w rabena ykhalili agmad 5 as7ab 3ndi eli ben7b b3d bgd, w akhoia eli bmot feh 3shan hwa k baniadam mosh 3shan hwa akhoia.
w rabena ykhli akhoia eli ektarto eno ykon akhoia b2radi "rabena ykhalik ya agmal basem"

Anonymous said...

الحب

لقد سألت عن عظييم

يلا سلام عالحب

وبالذات الحب المشفي اللي انتا قلت
عليه في كلامك

بس الحب المشفي ده قليل ونادر جدا
لدرجة إن في ناس رأيها إن مفيش أصلا النوع ده من الحب

بس يمكن بيقولوا كده عشان هما ماجربوهوش

المهم كان في حاجه تانيه عايز أقولها عن الحب بشكل عام

إني شايف إننا بنضيع حاجات كتيير عشان مابنحبش صح وكمان أحيانا بنكره

يعني

أنا شايف إننا ممكن من خلال الحب نكون أقوى
نكون عندنا صبر أكتر
نجاح أكبر
انتماء

ومعاني كتيره

يعني أنا مثلا
بحب شغلي جدا وده سبب مهم من أسباب سعادتي
وبحب مصر أوي وبحب العجوزه والمهندسين
وبرده بكون مبسوط وانا في شوارع العجوزه

وهكذا

أنا عارف إني خترفت كتير

بس خلاصة اللي انا عايز أقوله إن أي حب ممكن يتوظف لصالح السعاده والنجاح في الحياه


بحبك ياسم
وفعلا مش عارف ليه

وبحس إني وحش أوي لما أقعد فتره ماسألش عليك وبكون مكسوف منك

وبجد هاتوحشنا عشان موضوع السودان ده
ربنا ويوفقك للخير

Anonymous said...

نسيت أقولك إني عبد الرحمن

abouomar said...

يلا موش مهم

عجبنى قوى المساحة اللى انتا حشرت العلاقة دى فيها و هية انها اكبر من الصداقة و اقل من الحب

طارق

انا بشجع اللعبة الحلوة دايماً و انتا عارف و التهييس بتاعك كويس منا برضه بحب الكشرى الاصفر و البطاطس بس مفيش مانع احب مع الكشرى الاصفر و البطاطس واحد زى طارق او عم هرم كما يلقبونك اهالى المنصورة...على العموم انا برضه مستنيك تيجى برجليك و تحكيلى على قصة الحب الجديدة دى...حتى لو انا فى السودان

المجهو ل هــ.حــ

انا مكسوف بصراحة من كتر الكلام الحلو اللى اتقال فى حقى ...و فرحان لان كلامى اتفهم صح لانى عارف علاقتك باخوكى و هية دى اللى انا بوصفها فعلا ...موش علاقة الاخوة العادية لا علاقة من نوع تانى
شكرا مرة تانية

عبدالرحمن

لا يا عم مخترفتش ولا حاجة
و هتوحشنى انتا كمان كتير و الله و زى ما قولتلك كلها ست شهور و ابدا اوطد علاقتى بيك تانى زى منتا فاهم

عبد الله said...

الحب هو نور من المولى عز و جل أودعه في قلب و عقل و جسد كل عبد من عباده .
و لكن هناك من يبرز هذا الحب و ينميه و ينشره بين عباده و هناك من يطمسه و يدفنه و لا يظهر له أثررعليه او على غيره .
فحبك لشخص دون وجود مبرر واضح أو سبب ظاهر أو مصلحة مرجوة هو عين الحب .
و لكي يحدث هذا الحب المتبادل بين اثنين لا بد ان يكونا القلبين قد التقتا على تردد واحد مشترك و أعظم هذه الترددات هو حب الله عز وجل .

Anonymous said...

Mr Wagdy , Nasourty and zingo al 3aziz .... kol el 7ekia en syadtekom fe3lan nass testahel el 7ob , ya3ni el hob lama el wa7ed ya3rafkom kewais mesh bayb2a Optional.... ay 7ad fe eldonia kan haya7eboko..... ya besso a7sant el ekhtyar :) Salamy leeko wa7ashtouny.....

Anonymous said...

اولا الحب ملوش سبب محدد لوجوده ولكن ليه اسباب لإختفائه بمعنى انك ممكن جدا تقابل واحد في الشارع وتحس انه مألوف ده لانه بيبقى في سمات بتجمع الاشخاص ببعضها وده امر طبيعي
يعني انا لما اتخطبت الكل قالي انا شبه خطيبي وفينا من بعض بالرغم من اني عمري ما عرفته ولكن الالفه والمحبه يا شباب بتغييييييير حاجات كتير
اما اذاكنت عايز تعرف اسباب فالاسباب واضحة يا سي باسم الا وهى المودة والحب والتراحم وعدم الخبث يخلي القلوب تحب بعضها من غير اسباب وبعدين يا اما الحب يفضل يا اما الزمن يقضي عليه لنفس الاسباب
وبخصوص حب الزوجة لزوجها فده طبيعي .. الله سبحانه وتعالي بث جوانا الحب فما بالك بشريك حياتك لازم تحبه وتخاف عليه وده امر طبيعي بين الصالحين والصالحتا وربنا يديم المعروف
نهى جلال

Anonymous said...

اولا السلاما عليكم ورجمه الله وبركاته يهديه اله فلا ضلا له ومن يضلل فلا هاديا له الا الله عز وجل وصلى الله وسلم على نبينا وحبيبنا وقائدنا ومعلمنا محمد وعلى ال محمد واصحابه اجمعين اما بعد . انى رائى فى مسئلح الحب من غير سبب هو ان الحب من غير سبب قله ادب وانا طبعا قليل الادب ولذك افنا دائما بحب من غير سبب وذلك يرجع انى قليل الادب . ولكن بجد فعلا ان الانسان كثيرا ما يقابل بنى ادميين بيحبهم من اول نظرة او يحس انهم اخواته اواهله حتى لو مر على تعارفهم ساعات وفى ناستبقى عارفه من 100 سنه وبردة مش قادر نحبهم فانا يا صديقى اؤؤمن دئما بالمفاجاءت والحب من اول نظرة لانسان لا تعرقه من قبل هو شىء وارد واخيرا سليملى على الفيل الصغير اللى انت مربيه فى السودان

Anonymous said...

M,SAADI ( محمد سعد )

omar مشروع بطل said...

طب مش تحط صورتى انا كمان ده انا بحبك

هو فعلا الحب ده بتاع ربنا .. يعنى احيانا تحب واحد من اول مرة تشوفه واحيانا تكره واحد برضه من اول مرة تشوفه وممكن تعرف واحد 20 سنة ومعملكش حاجة وحشة و متحبوش ..

بس لو لقيت حب صادق وفى الله
نصيحتى :: امسك فيه بايديك وسنانك

الكواكبي said...

حب نقي خالي من الشوائب!! انت محسسني انك بتعمل إعلان لمضرب رز

طبعاً أنا باتريق لأني غيران اني مالاقيتش اسمي ولا صورتي في وسط الناس اللي انت منور بيهم البوست بتاعك وبما ان انت اللي ابتديت يا ريت لو سمحت تبعت لي جواباتي وتنسى كل اللي كان بينّا :) يا وحش يا غشاش يا بتاع الأصحاب

عموماً أنت مش اول واحد أشوفه كده؛ المغفور له خالد الذكر دائم الحبس محمد القصاص وهو في 2001 واحد صاحبه من مصر الجديدة اسمه محمد المهدي اصر انه يروح يزوره ووعدته اني هاحاول اخليه يدخل طرة ريزورت علشان يزور القصاص؛ المهم خرج متأثر جداً وبكى ولما جيت اقول لهم يا عم ما تحبكهاش كده فجعني وقال لي
اصل انت مش عارف يعني ايه ان واحد متعود من 7 او 8 سنين انك تتعشى معاه كل يوم ومرة واحدة يختفي
وتفجرت الحقيقة سوداء قدام عيني . . قصاص كان بعد ما بيخلص معانا صرمحة ونتعشى في رضوان أو عند المشتهري ونضرب الزبادي والشاي أبو نعناع على أبو أمين في الدقي كان بيروح يستلم شفت صباحي يبدأ من واحدة ونص او اتنين الفجر مع اصحابه في مصر الجديدة

شلة مالهاش أماااان

Anonymous said...

اه شكلك كده اتكعبلت فى السودان واللى كان كان احنا عارفين يعنى ان السمار نص الجمال بس يعنىياعم باسم مش على طول كده امال لو رحت فرنسا ولا ايطاليا هتعمل ايه الى انا بفكر فيه مراتك هتعمل فيك ايه لو شافت التدوينه دى حاتم ثابت

علاء شكرى said...

كنت اتمنى ان تقول ان الحب النقى هو حب الله وبهذا الحب يأتى النقاءفى التعامل فى الصداقة فى كل حياتنا

Anonymous said...

باسم :

كنت دائما احتفظ لك بمحبتك في قلبي فهي كالشيء الاسطوري التعبير عنها يحتاج الي قدرات خاصة في اظهارها لكن بمقالك الاخير استطعت ان تكسر حاجز صمتي وان تستفز مكنون قلبي الذي ما حمل لك الاتقدير وود و احترام اشعر امعك بانطلاقة غريبة اتكلم بحرية بدون تحفظ لاني اعرف انك لن تسىء فهميى قلت لك من قبل بسفرك هناك كثيرون خسروك لكن خسارتي انا اكبر حتي انها افقدرني القدرة علي البكاء فلذت بالصمت و هأنت تنكأجرحي تجعل من كلماتك ثقيلة علي لغتي التعبيرية لكن حسبك انك جزء من تاريخي و الانسان يموت و لاينسي من امتزجت ارواحهم مع روحة و صورتة طبعت علي جدران قلبة فهو لن يذكرة لانة ببساطة شديدة لن ينساة

بدوي الشريف


badawygad2016@yahoo.com

badawygad74@hotmail.com

Anonymous said...

الحب دا يعنى حياه الحياة ملهاش طعم بدون الحب حكلم عن حب الصديق والخ فى ناس ممكن فرقهم وبعدهم عنك يسبب لك الم وفراغ فى حياتك وانت يا باسم واحد من الناس اللىى بجد وجوده جنبك بتحس باخلاص الصاحب وانا حقول كلمه انا من اكتر الناس اللى حبتهم فى حياتى باخلاص هو انت وربنا يجمع بيننا فىالخير دائما وانا مستنيك فى فرحى وان شاء الله جاى 24/8/2007

Anonymous said...

السلام عليكم أخي عمر أفندي والإخوان جميعاً...
يمكن تستغرب شوي ، ومش راح أستغرب منك إذا استغربت، لأني أنا نفسي مستغرب.
أنا زميل قديم جداً للأخ/ هيثم العزازي وبالصدفة وأنا بقلب بموقع Google حطيت اسمه وكان الغريب انه شفته وشفت صورته كمان، أنا معرفش حاجة عنه من أكثر من 17 سنة من أيام الدارسة في الكويت، يا ليت وأترجاك توصلني فيه بأي طريقة، وأكون لك ممنون. قله بس زميل الدارسة السابق محمد يسر أيام الكويت مدرسة حولي، وأديك إيميلي: m_alayyooby@hotmail.com

هيثم العزازي said...

السلام عليكم و رحمة الله و بركاته
أبو عمر أنا آسف مبدئياً على تأخري في الرد على البوست بتاعك.
و قد ايه كلامك أثر في لأنه ببساطة صادر من القلب فبيوصل للقلب بسهوله.
وفعلاً انت قدرت تعبر عن "حاله" يمكن من الصعب ان ناس كتير تقدر تعبر عنها الأيام دي لأسباب كتير منها الوقت الضيق و الجري ورا لقمة العيش الي خلا ناس كتير مش لاقيه وقت تاخد نفسها حتى و منها فعلاً ان ناس كتير بطات كمان تعبر عن حبها حتى لأقرب الناس ليها من همومها و مشاكلها و ضغوط الحياه, ولكن التعبير عن الحب أهم من الحب نفسه.
اني أحبك في الله يا صديقي العزيز.,

بحر الحياة said...

هو ممكن اكون بعلق بقي بعد ما عدى فتره طوووووووووووويله خالص على الموضوع بس على ماوصلت للمدونه بتاعت حضرتك

بجد مدونه تحفه وحلى مابيميزها انك عفوى في كل كلامك

بالنسبه بقي للحب النقي
طبعا مشاعر حلوووووه اوى بينك وبين اصدقائك ربنا يخليهملك

اعتقد انا الحب اللى انت بتتكلم عنه ده هو علاقه كبيره اوى اسمى من الحب والصداقه
علاقه فعلا على رأيك خاليه من الشوائب
شعور جميل بل اجمل مشاعر ممكن الانسان يحسها
ممكن نقول حب في الله خالص لوجهه بس

وانا عن نفسي بحب كل اللى حواليا من اصحاب واهل وناس الحمد لله من غير اى سبب

إيمان عبد الباقي said...

موضوع رووووعة غاية في الأهمية علي فكرة وبستأذنك لو ممكن اقتبس منه بعض السطور لأنه بجد عاجبني اوي فكرة ان حضرتك . القيت بل وسلطت الضوء علي حاجات كتيرة ماكناش بنفكر فيها

إيمان عبد الباقي said...

موضوع رووووعة غاية في الأهمية علي فكرة وبستأذنك لو ممكن اقتبس منه بعض السطور لأنه بجد عاجبني اوي فكرة ان حضرتك . القيت بل وسلطت الضوء علي حاجات كتيرة ماكناش بنفكر فيها