Wednesday, March 14, 2007

ابو عمر فى سطور













بسم الله الرحمن الرحيم

نفتتح المدونة بحمد الله

اعرفكم بنفسى الاول ...انا باسم الشربينى..مواطن مصرى من المنصورة نزحت الى قاهرة المعز منذ 11 سنة من 1996 و درست بجامعة الازهر كلية العلوم و واخدها اربع سنين خطف على غيرناس كتير بيعمروا شوية فى كلية زى بتاعتى دى ..
كنت قسم كيمياء و مع ذلك بمجرد ما اتخرجت زى كل الشباب المصرى مكتبتش معادلة واحدة توحد ربنا من ساعة ما اتخرجت مع ان عايز اقولكم ان ايام ما كنت فى الكلية كان احمد زويل اكتشف الفيمتو ثانية و ساعتها موش انا بس دا كل الدفعة تخيلت انهم هيبقى علماء مصر القادمون او القادمين على حسب اعرابها فى الجملة...



من غير ما اطول عليكم اتخرجت و بدأت ادور على شغل فى شركات ادوية كتيييييير و وقفت فى صيدلية على امل اتعلم حاجة و بعدين جيت منحة برمجة الكبيوتر دخلتها و درست لمدة ست شهور كاملين ست ساعات فى اليوم من غير ولا يوم اجازة لحد ما بقيت مبرمج اوركل محترم و معايا شهادة عالمية بذلك و قولت خلاص طاقة البدر اتفتحتلى و نفسى احساسى ايام الفيمتو ثانية بتاعت زويل جالى تانى بس الايام دى على بيل جيتس بقى و انى هبقى من المبرمجين العظام على مستوى العالم و كمان هبقى غنى بقى و هتزهزه و علشان احنا فى بلد محترمة زيادة عن اللزوم و الاستاذ الفاضل عادل بيه امام قال انها بلد شهادات كملت خمسميت انترفيو فى شركات برمجة فى مصر كلها و كل الناس قالوا ان لازم اكون خريج حاسبات و معلومات او هندسة او اكون معايا خبرة محترمة و الحاجتين موش عندى ...انا معايا شهادة بانى مبرمج و واخد دورة ...
فا بدأت فى مرحلة بحث اخرى عن مجال جديد اخشه و قد كان عن طريق الانترنت اللى انتم بتتعاملوا معاه دلوقتى ...
بس انا بدون من مكتبى فى الشغل فا انا دلوقتى موش فاضى اكمل ...الحلقة التانية قريباً انتظرونا :)))

سلام مؤقت


4 comments:

الكواكبي said...

دايماً بتبهرني يا بسوم والله . . بس انا عندي سؤال
هو انت متصور الصورة اللي تحت دي بالأندروير؟
اصل انال عمري ما شفت شورت ابيض بالحجم والمكان الوحيد اللي بيكون فيه كل اشكال اللبس الرسمي وغير الرسمي ابيض في ابيض كده هو المكان السجن لا مؤاخذة
وبما ان السجن ما فيهوش بحر واكيد ما فيهوش حد يصورك فأكيد أكيد ده اندروير
عيب عليك تنشر صورك وانت في الوضع ده؛ ابعتها وانا البسك حاجة بالأدوب فوتوشوب :)

Anonymous said...

باسم انت متصور فى الكلية انت لسه فاكر الأيام ده ومش لاقى صورة غير اللى فيها عم صبحى امين المعمل يعنى معمل فيزيائية كمان
ربنا يسامحك فكرتنى بالذى مضى
ومبروك على المدونه الجديد
خالد حسن

abouomar said...

انتا مين يا خالد انا موش فاكرك

Anonymous said...

انت فعلا سبت الـ ART يا باسم .. لكن معرفة الناس اللى بيكون لهم اثر فى الحياة لا ينتهى .. و ان شاء اللى تكون دايما اخويا الصغير سناً و الكبير حجماً و قلباً ..
ربنا يوفقك فى كل حياتك .. و انا متنبألك بمستقبل باهر ان شاء الله .. و يخليلك الاستاذ "عمر افندي".
غاده