Monday, March 19, 2007

أبو عمر فى سطور 2


أبو عمر فى سطور 2

وصلنا لحد ما بدأت ادور على الإنترنت ..و على فكرة انا مكنتش بدور على النترنت على مواقع التوظيف لا انا كنت وصلت لمرحلة من الاحباط ممرتشى عليا فى حياتى و بدأت فى تدريب نفسى على احدث الالعاب على الكمبيوتر فيفا98 و نيد فور سبيد 2 و غيرها و كمان جميع برامج الاتشات بداية من اى سى كيو و مروراً بالام اس ان و انتهاء بالياهو و الام ار سى لان خلاص مفيش شغل ...مفيش فلوس..مفيش حياة.




icq




و فى يوم و على الانترنت واحد اتعرفت عليه بطريقة عشوائية اسمه افلاطون و بدأنا نبنى علاقة شخصية محترمة و احكيله عن ظروفى و كده و طلع هو مدير شئون العاملين براديو و تليفزيون العرب و اللى بدوره حاول يساعدنى و اخد السى فى بتاعى و ظبطنى فى ميعاد انترفيو فى يوم 10 رمضان منذ 6 سنوات و جيت القاهرة لمقابلة مدام غادة طلعت على وظيفة معد قاعدة بيانات...و اللى بدورها كانت عايز واحد موش مبرمج قد ما هى كانت عايزة واحد مختص فى قواعد البيانات و علشان كده ردت عليا و بكل دبلوماسية و قالتلى


"باسم انا الادارة بتاعتى فى روما فا هبعتلها و ارد عليك لما يرجعولى "


و سافرت و انا عارف ان موضوع روما دا فطشة و مفيش امل ...و بعد العيد ابراهيم حسين او "افلاطون" قالى طيب متبعتلها ميل يا سيدى تعيد عليها بس و تفكرها بيك...انا بصراحة كنت محرج و فى نفس الوقت محبط و عايز اتشبس باى امل ..و بعتلها الميل فعلاً و كان الرد بعده بخمس دقايق تعال يا باسم انا عايزة اقابلك يوم الاحد "الميل كان يوم الاربعاء"و ذهبت و قالتلى باسم انا ممكن اشغلك معايا شهر بدون مقابل و بدون وعد بالتثبيت و لو كنت بالكفاءة المطلوبة هنشكل لجنة و نشوف محتاجينك ولا لآ ..موافق؟؟قولتلها موافق و بدون تفكير و الحمد الله موش قعدت شهر ...انا سيبت الادارة دى و غادة طلعت بعد اربع سنين و نص بالتمام و الكمال.




بزناس




فىخلال المدة دى و بالتحديد فى نوفمبر 2001 يعنى بعد وجودى فى الشركة بحوالى شهور و فى10 رمضان برضه واحد صاحبى من شركة لينك و اسمه محمد جمال الحداد عزم عليا احضر سيمنار عن شركة اسمها بزناس و روحت و حضرت فى فندق شبرد و عجبنى الموضوع و دفعت اكبر مبلغ دخلت بيه مشروع فى حياتى فى ذلك الوقت 550 جنيه


و الحمد الله كان من القرارات الموفقة فى حياتى اتعرفت على ناس و طورت فى قدراتى و اخدت فلوس "تتش وود"و عملت علاقات وركبت طيارات و سافرت بره مصر "كانت واحد من احد امنياتى"و فضلت فيها لمده 3 سنوات.




i2




فى 6اغسطس 2005 انتقلت لشركة اتصالات الدولية لاعمل فى مجال التسويق و الحمد الله كان تحدى كبير بالنسبة لى انى اسيب الاى ار تى و اروح على شركة تانية و انا مستقر و امورى زى الفل و مطروح اسمى للسفر للعمل فى مركز البث بالأردن و فاضل على جوازى 3 اسابيع بس و اسيب كل ده و استقيل فى قرار من القرارات اللى الحمد الله كانت صائبة فى حياتى لانى استفدت من نقلتى فى كل الاتجاهات (علاقات -خبرة-كارير -فلوس-استقرار)و اترقيت بعد 6 شهور بس و بقيت سينيور و الى الان.




دى حياتى العملية من 11 سنة من ساعة ما نزحت الى قاهرة المعز زى ما قولتلكم من الحلقة الاولى .




خواطر و استفادات من هذه الرحلة ستكون فى الحلقة الثالثة




اراكم قريباً و مستنى تعليقاتكم :)


3 comments:

يلا مش مهم said...

انت كدة بدأت الانحراف التدويني الصح
اكتب واكتب واكتب
عن حياتك الشخصية وطلع منهاالحاجات اللي انت عاوز الناس تستفيد منها
بجد يا باسم انا معجب جدا بكتابتك البسيطة والعفوية واللي بتقول للناس واقع

Mohaamed Yassin said...

السلام عليكم
ازيك يا باسم باشا؟ اخبارك ايه الف مبروك على الجواز و على عمر ربنا يخليهولك و يباركلك فيه يا رب انا عارف انها جت متاخره بس انا ماشوفتكش من زمان على فكره انا محمد يس كنت معاك في بزناس و عايز أقولك انك من الشخصيات القليله اوي المحترمه اللي عرفتها و خطوة جميلة جدا انك تكتب و تعمل مدونة ربنا يوفقك ان شاء الله

abouomar said...

محمد

وحشنى جداً

حاول تتواصل معايا على الايميل او تكتبلى ايميلك علشضان نكلم بعض فى التليفون

انا موشعارف اوصلك ازاى