Wednesday, May 2, 2007

أول مرة


أول مرة

عمر افندى اوحالى فكرة مدونة اسمها اول مرة...فى حاجات كتير فى حياتنا ممكن تعدى اللحظة اللى كانت اول مرة نعملها فى حياتنا و ننساها بعد كده فى حين انها ممكن تكون فى يوم من الايام ذكرى جميلة..

التعليق اللى جالى على موضوع العربية ...حلاوة روح من هبة و بيقول ان اكيد فى يوم من الاسام هركب عربية تانية غير دى و دى هتبقى ذكرى جميلة ...ذكرى اول مرة ركبت عربية ...بالمناسبة اول مرة ركبت العربية اللانوس دى كنت انا و هبة اللى معايا فى الشغل رايحين اجتماع خارج الشركة و بنفتح نجوم اف ام لقينا كريم الحميدى بيقول و موضوع حلقتنا النهاردة فاكر اول مرة سوقت فيها ...قولت هو الراجل ده شايفنا ولا اه.


نرجع لفكرة اول مرة...عمر افندى ركب على الموضوع كعادته دائما ًبصوره الحاضرة دائماً و بيقولنا ..انا اول مرة اكلت فيها اى حاجة تانية غير اللبن كانت قطعة بسكويت مارى مبلولة فى مية ...و ذلك فى يوم 7 يناير 2007 الساعة 11:20 مساءاً يعنى بعد مرور خمس اسهر الا اسبوع على قدومه الى هذه الدنيا بالتمام و الكمال ...و على فكرة اكلها بشكل جيد.

صورة عمر متلبس بالبسكويت


اول مرة اتكلمت فيها انجليزى كنت فى انترفيو فى شركة ادوية سنة 2000 واللى قابلنى راجل امريكى و يوميها قررت انى لازم اتعلم انجليزى علشان متحطش فى الموقف الصعب ده تانى.

اول مرة قولت لمراتى بحبك ..كان يوم الاربعاء 26 يناير 2005 .بعد كتب الكتاب علشان كنت فاهم انى لو قولتلها بحبك قبل كتب الكتاب هبقى كده تخطيت حدودى الشرعية ...كنت ساذج شوية: )))
أول مرة عمر ضحك فيها ...كانت بعد ولادته بخمستاشر يوم تقريباً و كلنا فرحنا قوى بس بعد كده جيت اكتر من رواية و تحليل للضحكة دى من المفسرين و المتخصصين و اصحاب الشأن - حلوة اصحاب الشأن دى – منهم من قال انها غازات و هو نايم ...و منهم من قالى دى الملائكة بتضحكه و دا التفسير اللى انا حبيته ان ابنى و هو نايم الملائكة تبقى بتضحكه.

أول ضحكة لعمر افندى


اول مرة استخدمت فيها جهاز كمبيوتر كانت سنة 1996 و كان جهاز واحد صاحبى اسمه محمد الحداد و كان IBM عليه دوس و ويندوز 3.11 و اشتريت انا واحد فى 1998.
أول مرة ركبت فيها طيارة كان فى 30 مايو 2003 فى رحلة تدريب تابعة لشركة بزناس فى دبى و كانت الرحلة لمدة اربعة ايام فقط بس كانت من امنيات حياتى انى اجرب ركوب الطيارة و اول ما ركبت الطيارة عطلت و فضلنا يوم فى فندق موفينبيك المطار الى ان استبدلونا الطيارة فى صباح اليوم التالى بطيارة اخرى سليمة.(شوفتوا الحظ)الصورة دى فى دبى.

صورة من دبى


أول مرة وقفت قولت كلمة فى ميكرفون الاذاعة كان فى شتاء 1991 و كنت فى سنة تانية اعدادى و من يوميها و انا حبيت الميكرفون قوى و مسبتوش غير بعد ما خلصت رابعة ثانوى فى 1996.

أول مرة عمر راح فيها للدكتور كانت فى 14 اغسطس 2006 و هو عمره يوم واحد فقط بالتمام و الكمال .

اول مرة عمر افندى يحلق شعره كانت يوم الخميس 26 ابريل 2007 يعنى بعد مرور ثمانية اشهر و نصف تقريباً من عمره , تابعوا تلك اللحظات فى مدونة حادثة المزين
اول مرة اشتغل كانت فى فبراير 2001 فى ART و الحمد الله ربنا فتح عليا من يوميها و شغال فى شركات كبيرة.لمزيد من التفاصيل فى
ابو عمر فى سطور2.

و انتم كمان كل واحد يفكر فى حدث قام به لاول مرة و يكتبوا فى التعليقات حالاً

أبو عمر

12 comments:

Anonymous said...

أول مرة أقابل فيها باسم باشا كنت مع المهندس عبدالمجيد وعدينا عليه في ART بجوار مسجد مصطفى محمود
وكان الفرق واضح بينه وبيني أنا وعبدالمجيد (زاده الله بسطة في الجسم وأسأله الله أن يزيده بسطة في العلم الذي لا تحده حدود)
وكانت أول مرة بالنسبة لي نتكلم في مجال الإعلام والفضائيات مع واحد معايش ودي شغلته
كانت قاعدة جميلة خصوصًا مع طلب الكبدة والمخ والسلطة وسلام لمحد سعد واللمبي

يلا مش مهم said...

والله فكرة جبارة
وجامدة جدا
بس عارف اكتر حاجة قعدت اضحك عليها حكاية اول مرة تقول لمرات بحبك بعد العقد
فكرتني بواحد من الاخوان راح خطب وجاب لخطيبته شريط عن فلسطين علشان في اغنية بتقول باسمك قلبي بيغني
بس سؤال يا صاحبي هو ممكن الواحد يقول لخطيبته بحبك قبل العقد والله بسال بجد

الكواكبي said...
This comment has been removed by the author.
الكواكبي said...
This comment has been removed by the author.
الكواكبي said...

نسيت تقول اول مرة اتعاقبت فيها من شيخ المعهد كانت امتى؛ واول مرة الحظ ابتسم لك وشفتني فيها كانت امتى؛ واول مرة قابلت مراتك فيها . . بس عموماً دي اول مرة اشوف بوست ده موضوعها
ملعوبة يا ابو الترابين

Unknown said...

اول مرة أقرأ فيها مدونة كانت على يد الحاج باسم المحترم اللى هو مديرى المباشر فى الشغل واترددت كتير فى الأول اصلى انا مليش فى الكلام ده خالص وباسم طبعا هو بس اللى عارف انا ليا فى ايه .. عامة هيا والله ظريفة بس للأسف معنديش لا بال ولا طقطان اققعد اكتب التطورات اللى تحصلى يمكن علشان انا اصلا اللى بعمله مش بحس انو ممكن يهم الناس او بمعنى اصح ميهمنيش انه يهمهم اصلا وطول عمرى كده بحب امشى بدماغى .... علشان مصدعكوش يلا الف بركة يا عم باسم وعقبال المدونة متبقى ملتقى لأصحابك

ASW said...

ايه يابو عمر الحلاوة دي ....فكلرة الموقع جامدة جدا...باذن الله هقلد الفكرة دي مع نور الدين (ابني )....بس لما اتجوز الاول....قبل مااخش على الموضوع عايز اقولك ان عمر ماشاء الله عليه زي القمر ربنا يباركلك فيه..
اول مرة احب....في اولى ثانوي
اول مرة اشتري حاجة بفلوسي...كوتشي من التوحيد وانور مع اول مرتب
اول مرة اشتغل ....31-3-2005
اول مرة اروح درس في مسجد ....كان لعمرو خالد في الحصري
اول مرة....كفاية كدة

Anonymous said...

ana 3agbani el fekra awi bs mosh 3arfa leh mosh 7sa en fe 7aga fakraha awi plus en kol 7aga agy aftekrha mosh betb2a 7elwa.
i think i can write the date of the first day i wore a veal it was 7-5-03(ma brother birthay),
mmmmmmmm wut else? bos the date of the first time 2 begin ma practical life regardless the previous training was 2/9/2007 & thats why this date has become the worst date for all the consequence of that date.
finally & the greatest wooooooooooow the first time when i ve met ABO OMAR was 28/8/07 (bos actually it may be 29) but however it was really nice meeting you.

Unknown said...

SOURA
awel mara etsara2t feeha kanet mn 7awally 25 days.
kont nazla 8.30 yum el gom3a fe sare3 wady el nile 2odam 2ahwa w ma3rad sayarat (3adi gedan) w kont sharia mobile E 65 youm el khamees (embare7) w mara wa7da la2eet car Lanos hadeet we wa7ed tele3 shad my bag, 2ata3li my scarff w khataf el shanta we za2enni fel share3 :( what is more sad en no one mn el 2ahwa wla el ma3rad wla el nass fakaru to stop him aw yigu yeshufu eli marmeya 3al 2ard di betsarakh leeh. i evn asked someone to follow the car while i can see them... baseli we sabni we meshee
sa7ee7 balad ged3aan akeed...

Anonymous said...

أول مرة أشوف فيها جوزي اللي هو تامر اللي معايا في الشغل كان يوم 24/12/2004 كنت رايحة اعمل مقابلة علشان الشغل وكنت اول مرة اعمل مقابلة والحمد الله اشتغلت بس اليوم ده تامر سألني أسئلة ملهاش علاقة بالوظيفة بس طبعاً انا فهمت لية كانت الاسئلة الغريبة دة
بس كان احساس جميل وحلو لما حاول يتكلم معايا ويفتح موضوع الارتباط معايا
أول مرة بردو ألبس فيها الحجاب كان غصب عني لأن بابا ارغمني عليه بس والله بعد كده اقتنعت وعرفت ان لو مكنش بابا خلاني البس الحجاب طنت انا لبسته لوحدي
اول حاجة حسيت بيها لما لبست الحجاب اني حرانة مووووت ومش سمعة اي حد يكلمني

Anonymous said...

باسم
علي فكره مدونتك جامده جدا وخصوصا "اول مره &الكبايه المليانه "
وحادثه المزين بتاعت سي عمر

علي فكره يا اخونا انا وباسم بينا وبين بعض ترابط فكره ووجدانى وهو يعتبر من اعز اصدقائى ومشوارنا في الكفاح كبير

عشان مطولشي عليكم
اول مره احس فيها بالحب كانت من 15سنه " حب مراهقه بئه"
اما الحب الحقيقي الي ضرب البطين الايمن بتاعى كانت ام جودي مراتى حبيبتى كان يوم 1 يونيو 2005 كنت ايامها داخل امتحان دراسات عليا في كليه التجاره العريقه في جامعه المنصوره وهيا كانت خارجه من امتحان بكالوريوس من نفس الكليه العريقه برضه

اول مره احس بالمسؤليه المطلقه ساعت متجوزت طبعا وبعد تشريف جودى هانم بنتى زادت المسؤليه

اول مره احس ان "مفيش فايده"مقوله"سعد زغلول 1917 " بعد تولي عاطف عبيد رئاسه الحكومه
اول مره اشتغل فيها باسم ممكن يقولكوا عليها بس ممكن اقولكم المكان كان العمل في مدينه بورسعيد الباسله سابقا العاجزه حاليا بعد تدخل ايدى عاطف افندي عبيد بيده الاثمه

اول مره ادخل علي الانترنت كان في خريف 1996 باكونت شركه بينى وبين خالد الحداد الصديق العزيز وكانت بالمناسبه من شركه يلا اونلاين

اول مره ادخل فيها السينما كان وانا في رابعه ابتدائى وكانت مغامره لطيفه لانى نمت في سينما عدن سابقا جراج حاليا !!! في مدينه المنصوره بالمناسبه كان فيلمين الراس الكبيره لبروسلي والتانى كلن الفلوس و الوحوش لمحمد بيك صبحي
و عم نجيب الله يخليه ليا "والدى" جابنى من السينما وانا كنت نايم طبعا

اول مره يحصلي توبيخ فيها بالطبع بعد حادثه السيما بس الحمد لله كان توبيخ مش ضرب ولا شتيمه

اول مره ابكي فيها بحرقه كانت بعد وفاه مثلي الاعلي جدى علي رحمه الله عليه

والباقيه تاتى يا بيسوووووو

ابو جودي
في 3 مايو 2007

Anonymous said...

تسلم إيدك يا ابو عمر
تدوينه ممتازه

بس أنا فعلاً عندي مشكله في الذاكره كل ماأحاول أفتكر حاجه إلاقيني عملتها قبل كده بس مش فاكر إمتى

بس ممكن أقول حاجه
إن دي أول مره أفكر إني أفتكر إمتى عملت أي حاجه لأول مرة

حد فاهم حاجه؟ ماظنش

بس تصدق يا باسم التدوينه دي كشفتلي عن جزء مهم في شخصيتك ممكن يعمل حاجز بينك وبين ناس كتيير لو ماوضحتوش كويس

صحيح إنت كنت من الناس بتاعة الإذاعة المدرسيه والشرطه العسكريه ورائد الفصل والكلام الخنبق ده
وطبعا بتقف عالفصل لما الأستاذ بيخرج

عالعموم قدامك فرصه توضحلنا موقفك من الإذاعة وتتبرأ منها