Wednesday, October 22, 2008

ثلاثون عاما من العطاء

عُدت يا يوم مولدي ... عُدت يا أيها الشقي
الصبا ضاع من يدي .. و غزا الشيب مفرق
يليت يا يوم مولدي .. كنتَ يوما بلا غد
ليت أني من الأزل .. لم أعش هذه الحياة
عشتُ فيها و لم أزل .. جاهلا أنها حياة
ليت أني من الأزل .. كنت روحا و لم أزل
أنا عمر بلا شباب .. و حياة بلا ربيع
أشتري الحب بالعذاب .. أشتري فمن يبيع؟
أنا وهم . أنا سراب

هكذا كتب كامل الشناوى و غنى بكل تشاؤم فريد الاطرش هذه الكلمات بعد تلحينها...و انا بدورى اقرأها و اتمعن فى معانيها اليوم بعد ان اكملت عقدى الثالث...يا صلاة النبى ..ثلاثين سنة بالتمام و الكمال ...اليوم هو 22 اكتوبر يوم مولدى.
اود ان أشير الى معظم اصحابى لا يحتفلون بأيام مولدهم، وأقول يوم الميلاد حتى لا أقول عيد الميلاد، فترتفع حدة الاستفزاز، لجهة التحريم. ولا نعلم نسبة عدم المحتفلين، ولا المحتفلين، غير أني أقول بلا حرج إنك لو قلت إن 99 % لا يحتفلون به لما جانبني الصواب.ولعل سبب رفض الموسيقار الراحل محمد عبدالوهاب إقامة حفل عيد لميلاده، غير بعيد عن امتناع اصحابى عن ذات العادة، فقد كان عبدالوهاب يعتبر الاحتفال بهذه المناسبة، عادة تمارسها الطبقات البرجوازية، وأبناء الذوات، ويردد: كيف يحتفل المرء بنقص عام من عمره، وبأن عدد السنوات المتبقي لحياته قد نقص عاماً؟! و هكذا كان دائما يذكرنى الاستاذ وجدى الشناوى فى الاى ار تى عندما كنت اهنيه بيوم مولده فى ابريل من كل عام.



أسرتى الحبيبة





اليوم انا بعيد عن ابنى و زوجتى منذ 52 يوم بالتمام و الكمال ...و افتقدهم بشدة و لكن ظروف عملى حالت ان اكون بصحبتهم و اراهم و اتودد اليهم...هذه هى الدنيا و هذا هو حالها الان ...بحث عن لقمة عيش و دوران فى طاحونة الحياة...تفتكروا بعد كمان عقد فى الشريع كده عند الاربعين هتلاقونى كاتب نفس المقالة ...اعتقد ايوة...شغل و بيت و حياة مليئة بالصعاب و بحث عن لقمة العيش ...صدقونى ايوة انا كلى يقين انها هتكون نفس المقالة ...تحس ان الكادر بيختلف لكن فى النهاية نفس القصة و نفس السيناريو...
كثيرون هم زملائى فى هذه البلد التى اعيش فيها الان بعكس السودان اللى مكنشى فيها واحد بس من زملائى القدامى ...و كل ما اسأل واحد بقالك كام سنة ..اللى بقاله هنا خمسة و اللى سبعة و اللى 12 سنة...و عادى موش مستكترهم ولا حاسس بيهم و الايام زى بعضها و ادينا عايشين ..هية دى الروح...فا انا متأكد انى اه ممكن الشعر الابيض كمان عشر سنين يزيد حبة و عمر هيبقى فى الاعدادى لكن ايه اللى اتغير فى القصة ...مظنش فى حاجات جوهرية.

انجازات عام مضى

السنة اللى فاتت اللى هية التسعة و عشرين كانت من انجازاتها الرئيسية حصولى على جائزة افضل الموظف الاعلى اداءا فى شركة اى تو مصر و نتيجة لهذا الانجاز بعدها بشهرين ترشحت كمدير تسويق لفرع احدى الدول العربية حيث انى انتقلت الى فرع السودان لمدة عام واحد و لكنى راضى عنه تماما...




طيب بعيدا عن المستقبل و بعيدا عن الماضى خلينا فى السنة الحالية...خلينا فى كشف الحساب ...حد فيكم يسألنى كده ايه اهم انجازات عامك التلاتين ده ارد و بكل فخر و راحة نفسية بانى عملت انجاز هيفضل علامة فى حياتى و هو انقاص الوزن...نزلت 42 كيلو بالتمام و الكمال فى 7 اشهر فقط...يعنى كتبتلكم انى عايز ابقى الرابح الاكبر فى شهر فبراير الماضى


و وعدتكم انى انزل 40 كيلو و قد حققت ما وعدت به و نزلت 42 كيلو و اصبحت الرابح الاكبر امام نفسى قبل ان يكون امامكم... احساس جميل انك تكون رفيع و سهل التحقيق مع شوية عزيمة و ارادة و مثابرة و زوجة اشكرها من كل قلبى على دعمها ليا و مساعدتها ليا انى اوصل للانجاز ده ...احساس جميل انك تحس انك نزلت بدلة من الاسمنت وزنها 40 كيلو من على اكتافك و بطنك و رجليك ...بدلة كنت قايم نايم صاحى ماشى قاعد و انتا شايها و لابسها فتخيل كم المجهود اللى كنت بتبذله و تخيل احساس الخفة و انتا ماشى من غيرها دلوقتى

صدقونى احساس انك تحط هدف و تحققه احساس لا يعلوه احساس و لذته غير طبيعية و خصوصا و انتا ترى الانبهار و الاشادة فى عيون الاخرين ..فا انا بعتبر ده من اهم انجازات السنة دى ...السنة الجاية بقى مفيش حاجة محددة متوقع اعملها و بما انها زيها زى غيرها و مفيش حاجة بعينها محطوطة كهدف فاستبشروا معى بمقالة العام القادم بدون اى انجازات ولا مبشرات و هتلاقوها نقلا عن العام الحالى.

عمرك من السعادة
هل تعرفون قصة جبره .. ذلك الرجل الذي زار مقبرة ناس أجانب فشاهد قبر جون مكتوب عليه : عمره الزمني تسعون عاما , وعمره الحقيقي عشر سنوات .وقبر ماتيلدا مكتوب عليه : عمرها الزمني ستون عاما , وعمرها الحقيقي سنتان .وقبر ريجي : عمره الزمني خمسة وسبعون عاما , وعمره الحقيقي ثلاثة أشهر .تعجب جبره من هذه الحكايات وسأل مرافقه : ما الفرق بين العمر الزمني والعمر الحقيقي ؟قال المرافق : العمر الزمني : هو عمر الإنسان من لحظة ولادته الى لحظة موته , أما العمر الحقيقي , فهو عمر لحظات السعادة الحقيقية التي عاشها ذلك الإنسان .حين فهم جبره هذا المعنى قال لمحدثه : عندما أموت إكتبوا على شاهدة قبري : هنا يرقد جبره من بطن أمه إلى قبره , لأني لم أشاهد ولا لحظة فرح واحدة بحياتي .احسب بقى انتا عمرك اد ايه بالظبط على حسابات المعلم جبرة ده...

و اود ان اذكر فى النهاية بالقول المأثور (عام جديد و على عملنا شهيد فلنستبق الخيرات) اللهم اجعل عامى هذا عام نافعا لى و
اجعلنى مؤثرا فيه لخدمة دينى و وطنى و اهلى و نفسى.

كل سنة و انتوا طيبين بمناسبة عيد ميلادى الثلاثين

ابوعمر

10 comments:

Anonymous said...

كل سنه وانت طيب وليك وحشه والله ... لكن بالجد عمرك 30 سنه والله مشاء الله بالجد انصدمت اول ماقريت الاميل بس بالجد انت اناس رائع ومثابر ومكافح وربنا يوفقك ويفتحها عليك دنيا واخره

عمر أفندى و أبووه said...

و الله عمرى تلاتين سنة ايوة

انا موش عارف دلوقتى دا كويس ولا وحش من وجهة نظرك بس عامة انا متأكد ان اللى معلق ده حد من حبايبى اللى فى السودان علشان بيقول (بالجد)ودى سودانى تماما بس مكتبشى اسمه للاسف

Anonymous said...

i love what you wrote up there and i really don't think being 30 is that old! look at what you did in your life! look at your achievments! plus the weight u lost! that's amazing Basem, keep doing what you are doing becuase you still have a bright future full of achievments.
so Happy birthday to you and may all your wishes come true and hopefully your family join you where u at soon and you never be apart again.

Yours truely
Sara Rahma

الباز said...

كل عام و نات بخير يا عم باسم
ان شاء الله السنة الجاية يكون فى انجازات اكبر بكتير من اللى سبقتها
انت بس اكمنك بعيد عن اهلك فى ريحة احباط وحزن فى الكلام بس المهم انحنا لسه عايشين نقدر نكمل اللى بداناه ولو حتى مبدأناش نقدر نبدأ حاجة جديده
انا من كام شهر جالى احساسا الاحباط ده لما فوجئت بعيد ميلادى الثلاثين
وقعدت اراجع انا عملت ايه فى الحية اللى عايشها من ثلاثين سنة
تقريبا ملقيتش حاجة بس قلت على الاقل انا فقت دلوقت لازم اعمل حاجة وبدات فعليا فى مشروع هابقى اشرحهولك بعدين لما يبدأ يظهر ملامحه لكن اكيد فى فرص اخرى فى الحياه و كيد فى حجات كتير اوى ممكن نعملها و تكون انجازات
بس اهم انجاز نفسى كلنا نوصله هو رضا الله عنا
وفى اليوم الاخير مش مهم احنا عشنا اد ايه المهم هنبقى من السعداء بهذا الانجاز ولا

Anonymous said...

Franklly basem I like your blog Omr is really cute masha allah, I'm soooo proud of you, you have been always a good brother, you have been always very determined person and hard worker, wow you lost alooot of weight and that shows how determined you're in life masha allah, you're very kind person keep up the good work insha allah rabena yekrmak wirzoak for the good intentions you always have ever since I met you... Mohamed Hassan

Anonymous said...

المقاله جميله بس انا عندى ملاحظه صغيره انتا بتقول ان بعد الاربعين المقاله هتكون نفس المقاله البحت عن لقمة العيش والخ ولكن ليس شرط ان تكون نفس المقاله الاحداث تتغير والمستهدفات تتغيرممكن تحصل على انجاز اخر مثل احسن موظف وليكن افتتاح بزنس خاص بيك او تكون بقاللك عشر سنين زى ناس كتير هنا ولكن بطبيعتك الطموحه اكيد الاحتمال الاول هو الى هيتم تانى ملاحظه غياب عمر افندى وام عمر كام ماثر عليك فى اسلوب كتابة المقاله فاعطتها لانوع من عدم الحيويه وعكس ما اعتدناه عليك باسم الاكتف الطموح صاحب الروح المتفاعل ربنا يجبهوملك بالسلامه واكون من مستقبليهم فى المطار معاك تالت حاجه فى انجاز كبير انته نسيته وهو القيام برحلة العمره وزيارة الحبيب رسول لله ويكون اهم انجاز فى العقد الرابع رحلة حج لبيت الله الحرام بس يشرط نكون مع بعض والسنادى ان شاء الله وكل عام وانت الى الله اقرب وعلى طاعته ادوم

عمر أفندى و أبووه said...

Sara

thank you so much for your sweet words.

miss u and all Sudanese staff begad.

الباز

و الله يا عم على انا بعيدا عن كلامك الجميل مبسوط قوى بالروح الجديدة اللى دبت جوالك و ربنا يوفقك فى مشروعك ده و يكون نقلة جديدة ليك و فتحت خير عليك و مستنى تفاصيل اكتر يا معلم بس موش على الملا هنا....

Mohammed Hassan

I do thank you realy your words very emotion and affected me so much...Thank you and hope you r doing well in USA

Jazakoum allah Khayaran

ٍٍساهر

موش موقع على التعليق بس بتقول نجيى معاك نستقبلهم فى المطار فا طبعا تبقى ساهر ...جزاكم الله خيرا و موش معقول فى ظل الظروف اللى انا فيها دى هكتب بحيوية و نشاط يا عم ساهر و الا ابقى ماكينة موش حد عنده مشاعر و بيتأثر بالظروف....

الله المستعان و اتمنى ان اللى بتتمناه انتا هنا ده يتحقق محدش يكره الخير

عبدالرحمن طشه said...

كل عام وانت بخير وعقبال العمر كله
الله يخليك لعمر أفندي القمر - ماشاء الله - بيجنن - الله يحفظه

وأشكرك لانك خليتني أعرف شخصك الكريم وأتعرف عليك أكثر
الله يوفقك في السنين الجاية ويجمعك مع عائلتك وعمر أفندي قريب

Anonymous said...

يا ابو عمر المفروض اننا ( اقصد كل اصحابك ) نعمل احتفال كبير نشكر فيه ربنا انه انعم علينابصديق زيك
على العموم انا متابع اخبارك رغم اننا ما شوفناش بعض من حوالى 3 سنين ... نعمل ايه انا وانت عايشين فى دور ابن بطوطة
( امتى الزمان يسمح يا جميل واقعد معاك على شط النيل ) او حتى عند الكشك بتاع جامعة الدول ( فاكره؟؟؟) ناكل مولتو ونشرب بيبسى
هشام سعيد
باااااااكستان

عمر أفندى و أبووه said...

عبدالرحمن أفندى "طشة

أنا اللى اشكرك على دعمك ليا من اول يوم جيت فيه البلد هنا فانت اول من استقبلنى فى الشركة و من حجز لى فندقى ...هؤلاء هم اهل اليمن الكرام ...بس و حياة والدك خلصلى الموضوع اللى انتا عارفه ده بقى علشان خاطر عمر أفندى لو عايزنى اشوفه بجد...

هشام بيك سعيد او إتش

زى ما بحب اناديك بقالى 3 سنين...وحشنى جدا و ربنا يرجعك من ارض برويز مشرف سالم غانم انشالله و يجمعنا على خير فى اقرب فرصة ...ممكن نتقابل فى عمرة ولا حاجة ...فكر فيها و كلمنى لو نويت .هو الكشك ده فى حد فينا ينفع ينساه...دا زمن الحب الجميل يا اتش..ادعو لنا بالتوفيق