Saturday, February 2, 2008

الرابح الاكبر






لقد اتخذت قرار و ارجوا ان تعينونى عليه... خدت قرار من شهر 11 اللى فات انى هعمل دايت و هخس... و موش هخس اتنين تلاتة كيلوا لا انا عايز اخس رقم و قدره ...ببساطة عايز اوصل لوزنى المثالى انشالله رب العالمين...و وصلنا لنهاية شهر ديسمبر و الموضوع يراودنى ومشاهدتى للمواظبين على نظام غذائى مثالى بتسخنى اكتر انى اخوض التجربة انا كمان...و قربنا من 2008 و هنا قررت احدد اهدافى للعام الجديد..

حطيت اهداف وعلى رأسها انى انزل بوزنى الى ما دون المائة يعنى ما بين ال80 و ال90 لانى طولى 186 و عارف ان ده مشوار صعب بس ادعولى ربنا يعينى عليه لانى عايز اخس ما يقرب من 40 كيلوا و موش كده و بس كمان لا دا فى خلال النصف الاول من العام يعنى نهاية يونيو هية موعد المحاسبة ...و عليه حطيت الخطة ...




الخطوة الاولى




و فى اجازتى الماضية لمصر ذهبت بالفعل لدكتور اخصائى سمنة و نحافة و طلبت منه وضع برنامج لل24 اسبوع اى الستة اشهر الاولى من 2008 و لكنه تعلل بان لا يوجد عنده حاجة كده و لكن هيدينى 7 اسابيع و بعدهم اتصل بيه من السودان و قوله (الحاصل شينو) دى بالسودانى او بالمصرى (ايه اللى حصل) و من ثم يدينى الخطة المقبلة..

الخطوة التانية




اللى اخدتها اننا لمينا (انا و مراتى) كل اللى نقدر عليه مساعد لتنفيذ البرنامج من مصر زى سكردايت و خضروات و لحوم و فراخ وغيره من المستلزمات و مفيش مانع من شراء ترينجين جداد على كوتشى جرى...

الخطوة التالتة




اللى اتعلمتها فى سبيل تحقيق الاهداف هية التشريد...مبدأ التشريد مبدأ مهم جدا جدا فى تحقيق اى هدف لاسيما لما يكون الهدف ده انتا واثق من انك ممكن تحصلك احباطات فى طريقك للوصول اليه فا التشريد من وسائل الدفع القوية و عليه فقمت بالتشريد لنفسى مع كل من قابلته بمصر انى سأعود انشالله بعد ستة اشهر لمصر و انا نازل 40 كيلوا..و كذلك الحال اول ما وصلت السودان و عرفت كل من قابلته فى السودان سواء مصريين او سودانيين...حدش سألنى ليه؟؟ اقولكم ليه..



لانى بتشريدى ده احرجت نفسى جدا و حطيت نفسى قدام امر واقع و هو انى لو رجعت مصر فى يوليو القادم انشالله منزلتشى اربعين كيلوا هبقى شكلى وحش قوى قدام الناس فا حفاظا على تحقيق الوعد اللى احرجت نفسى بيه قدام الناس بستمر بدون كلل ولا ملل...و النقطة التانية ان ما فى اى انسان اعرفه سواء من مصر او السودان بيكلمنى فى التليفون او يقابلنى وجها لوجه دلوقتى غير لما يسألنى السؤال المعتاد دلوقتى ايه يا عم باسم اخبار الدايت ايه؟؟؟خسيت كام كيلوا؟؟؟و دا فى حد ذاته اسلوب قوى للمتابعة يانى حطيت الناس كلها مراقبين لمستوى ادائى...

الخطوة الرابعة




...اشتركت فى جيم اول ما وصلت السودان و مواظب على الذهاب اليه 3 مرات اسسبوعيا تحت اشراف كوتش من داخل الصالة لرفع معدل اللياقة البدنية لدى ومساعدتى على حرق السعرات.

الخطوة الخامسة




انى كتبتلكم دلوقتى علشان ازيد من تشريدى لنفسى من جهة و اشرككم معايا من جهة اخرى ...و تعذر نشر هذا البوست بسبب احداث غزة...

MBC الرابح الاكبر



من افضل القنوات الفضائية عندى قناة ام بى سى وان ...تقولولى ليه؟؟ اقولكم علشان بجد مجموعة محترفين فعلا ...جودة صورة عالية جدا افكار برامج تحفة اعداد جيد و انتاج على اعلى مستوى مع كم صرف ولا اكتر من كده... مبيبخلوش ابدأ ولا بيسترخصوا فى شكل استديو ولا انتاج تقرير او ارسال مراسلين لاى دولة فا فى النهاية افضل قناة منوعات و ترفيه عربية من وجه نظرى..

تابعت على هذه القناة منذ عامين تقريبا الموسم الاول من برنامج الرابح الاكبر و تابعت الان و خلال الثلاث اشهر الماضية الموسم الثانى من نفس البرنامج و الذى يستهوينى جدا .متسألونيش ليه..علشان بقى انا تخين ..جايز او علشان حبى للقناة...يمكن او علشان اطلع بمعلومة ليها علاقة بالدايت او ليها علاقة بالتمارين ..ربما ...المهم ان الموسم التانى خلاص هو كمان خلص ....

الاول على البرنامج اول الرابح الاكبر كان امارتى الجنسية و اسمه وليد و خسر فوق ال 60 كيلو من وزنه اكثر من 52% و هذه نتيجة غير مصدقة و لكنها حصلت و فى ست شهور ...فادعوا لى ان اسير على دربه.




و كمان ليا صديق اسمه مصطفى محمود نزل ما يقرب من نفس الوزن تقريبا فى مدة العام موش مشكلة المدة المهم انه ممكن..
مصطفى محمود على اليسار قبل بداية الدايت منذ عامان

و دى صورته الان بعد ان خسر اكثر من 40% من وزنه


مستنى تعليقاتكم على الموضوع و تشجيعكم ليا..
ملحوظة اخيرة

للى بيسألوا عن عمر افندى و اخباره اشكركم جميعا و هو بخير و لكن لسه لم يتم رفع الحجب عن اخباره و مشاركاته معنا على البلوج الى الان

2 comments:

hassan fawaz said...

قرار ممتاز يا باسم ، و انا سعيد جدًا أني هكون اول واحد تقريبًا يرد على التدوينه ديه، ليه بقى سعيد؟
أولاً عشان بحبك و اللى بتعمله دلوقتي ده في مصلحتك.
ثانيًا عشان بحب عمر و اللى بتعمله ده هيحسن صحتك و هيخليك اكثر نشاطًا و طاقة في تربيته.
ثالثًا عشان انا نفسي أبتديت نظام تخسيس من أربعة أشهر، مع دكتور و جيم و خلافه، و فعلا حسيت بنتيجة رائعة مش على مستوى إنقاص الوزن بس لكن كمان على المستوى الصحي العام.
و قد أيه الواحد بيكون فخور بنفسه لما يقدر يكبحها عن الرغبات و الشهوات- الاكل طبعًا- حاجه كده عامله زي لما الواحد كان بيتعلم من سبع سنين أزاي يغض البصر، و دلوقتي بقت حاجه عاديه جدًا بيعملها من غير ما ياخد باله.
لكن خلي بالك من تعويض الفايتمينات، خاصة فايتمن الف و باء ، يا رب يكون عندك في السودان موجود حقت تراي بي لأنها احسن حاجه للفايتمين بي.
و كمان خالي بالك من إن بنزول الدهون الإملاح بتترسب أسرع على الكلى، فلازم تاخد فوار على الريق للأملاح زي فوار يوريسلفين أو يوريكولينا مرة واحده على الريق.
أنا خسيت 10 كيلو- انا كنت عايز أخس 20 بس- فبتالي المعدل ده كويس بالنسبة لي، لكن في أول أسبوعين خسيت 8 كيلو.
ثم حدث إنتكاسه ثم عدت للنظام مرة أخرى.
لا تخف من الإنتكاسات ده أمر طبيعي لأنك بتغير سلوك بالكامل.
أنا اسف أني طولت عليك لكن ده من فرحتي

عمر افندى و ابوه said...

حسن بك

انا شاكر ليك جدا و لنصايحك ...و انا على فكرة ماشى برضه مع دكتور زى ما نوهت فى البوست و هو عاطينى فيتامينات مكملة غذائية باخد منها حباية يوميا بس مجبلليش سيرة الاملاح ده و لكن يمكن لانه بيفرض عليا اشرب كل يوم ما لا يقل عن 2 لتر ماء ....و الحمد الله انا برضه نزلت حوالى 9 كيلو فى 3 اسابيع و انا دلوقتى بدأت الاسبوع الرابع اهوه ادعيلى علشان مشوارى لسه طويل....شكرا مرة تانية عىل اهتمامك