Sunday, August 12, 2007

عمر افندى" ابنى الحبيب"








كبر عمر خلاص...اتم عامه الاول....بسرعة كده ...بسرعة كده مر علينا عام منذ قدومه ...منذ مشاركته لنا حياتنا...منذ سماعه لصوته فى مستشفى الهدى بالمنصورة فى تمام الساعة العاشرة صباحا تقريبا اثناء قراءتى لسورة مريم خارج باب حجرة العمليات و متسألونيش ليه مريم بالتحديد بس انا فتحت المصحف للبحث عنها يمكن كى يسهل الله على زوجتى وقت المخاض كما سهلها على السيدة مريم...يمكن

كان ذلك فى 13 اغسطس 2006 و عندما نزلت لموظفة الاستقبال كى آخذ خطاب المستشفى قالت لى بلاش يا استاذ باسم 13 ده و خليها 14 ماشى .,..فابتسمت و ان كنت لا أؤمن بهذه الامور بس من فرحتى مرضيتشى ازعلها وأصبح التاريخ 14 اغسطس.

اكثر من 200 رسالة تهنئة على الموبايل تقريبا و مثلهم تليفونات من جميع انحاء مصر و الدول العربية ..و دا طبعا علشان انا شخصية مهمة مفيش شك و علشان انا كنت بشتغل فى التسويق و الاعلانات فا فى ناس كتير بيجاملونى من الموردين و مندوبى الاعلانات فى المجلات و الجرائد و ما شابه من ناحية اخرى.

عمر باسم السعيدالشربينى

عمر ...ليه عمر ...عمر دا تسمية والدته و انا مكنشى عندى اى طلبات فى الاسم غير انه يكون ميزيدشى عن 3 حروف ليسهل نطقة و كتابته و كده ...فا كان اختيارها لعمر و انا مجادلتهاش كتير و وافقت على تسميته عمر لو ولد و نور لو بنت و الكلام ده فى الشهر التانى.

و بعدها جاء معرض الكتاب و اشتريت منه كتب تربية اطفال كتير و بفلوس كتير قوى و اشتريت شرائط تربية اطفال و اشتريت كتاب قصة حياة عمر بس موش اى عمر و موش عمر افندى دا سيدنا عمر بن الخطاب كى اعلمها له فيما بعد..

دلوقتى فات 12 شهر ...فاتوا و عمر بيكبر قدام عينى يوم بعد يوم...بيعلمنى و بيورينى اول ضحكة ليه كانت ازاى و اول سنة ليه كانت ازاى و اول مرة اكل فيها و اول مرة مشى فيها و او مرة مرض فيها و اول مرة عرفنى فيها و جالى و اول مرة قال فيها كلمته المحبوبة (بااااااااااااااااااااا) و بعد كده قال (ممممممممماااااااامممممممممم) ...اد ايه سنه جميلة اول سنة فى حياة الانسان..قد ايه بتبقى ذكرى جميلة استكشافه للحياة على جميع اوجهها...ممكن اكون احساسى كان عالى جدا و انا اول مرة اركب طيارة و انا عندى 25 سنة ...هو اكيد انا متاكد انه احساسه كمان كان عالى و هو بيعمل كل الحاجات دى لاول مرة فى حياته و هيبقى احساسه اعلى لما يتذكرها و لذلك اخدت على عاتقى انى اسجله كل اللحظات دى...كل السنة الاولى من حياته تقريبا رصدتهاله بالصوت و الصورة ...رصدتهاله فى اكتر من الف صورة مقسمهومله على سديهيتين كل سى دى عليه 6 شهور من عمره...و يتخللهم اكتر من 30 مقطوعة فيديو ...و معاهم البوم يحوى اكتر من 300 صورة مطبوعة...كل دى ذكرياته عن السنة الاولى من عمره ...موش هيقدر يحس بمتعة هذا الكنز غير لما يكبر انا متاكد انه هيطلع محب للذكريات زي ابوه تمام...

عمر افندى

الموقع اللى انا مشاركه فيه ده بالنص على ما ربنا يكرمنى و يبقالى موقعى الخاص و له موقعه الخاص ...اكيد هيعجبه...انا واثق انه هيعجبه ..

عمر افندى ...اسمه ...انا حاسس انه هيعجبه...صح يا عمر ؟؟

عمر افندى الذى ادخل السرور و البهجه على قلوبنا جميعا هذا العام...بدايته من جده (والدى) الله يرحمه اللى كان بيعشقه و مرورا بجده سيد اللى بيفضله على اى حد تانى حتى لو كان انا او مامته ..

عمر افندى اللى بيحب الخروج زى عينيه...يعنى بمجرد متحطه فى عربية خلاص هو موش عايز حاجة تانية من الدنيا...لف بيه بقى زى منتا عايز لا يعيط ولا يتذمر ...بل بالعكس فرحان ولما يزهق ينامله شوية لحد ما المشوار يخلص .

عمر افندى اللى جدته بتناديه دايما بحبيبى حبيبى و بتعلمه اول دورس العربية على غرار (زرع – حصد) و بتقوله دايما (عمرون – قمرون) و اول من علمته يعمل باى باى.

عمر افندى اللى الحلاق بتاعه لما قرأ مدونة حادثة المزين فرح بيها جدا و علقهاله فى المحل عنده لانه حب عمر و لان اسمه و اسم محله نزل على الانترنت لاول مرة.

عمر افندى اللى لسه معملناش العقيقة بتاعته لحد دلوقتى بس ناوين نعملها انشالله عن قريب عند عودتنا فى اجازة لمصر ولا حاجة ...

عمر افندى اللى لما يحب يلفت نظرى ليه بنده عليا بكلمة (بااااااااااااا) و لما اطنشة و انا مركز مع الجزيرة او مطش للاهلى يدينى التى لا تقاوم و هية قبلتة الهوائية الطايرة الحايرة اللى بتجيبنى لمس اكتاف و تخلينى اروح عليه جرى و اطنش اى حاجة تانية.
فى مطار الاردن و نحن فى طريقنا للخرطوم

عمر افندى اللى لما موش عارف احكيله ايه لما يكبر شوية و يحب انى احكيله حواديت قبل النوم بس هبدا اقرا و اعرف الفترة الجاية علشان الموضوع ده...

عمر افندى اللى بفكر فى مصاريف مدرسته من دلوقتى و اى مدرسة هدخله و فين ...ويا ترى هنكون فى مصر ولا فين ...

عمر ...خلى بالك انا اتولدت قبل وفاة عمو انور بسنتين و بعدها اتى عمو حسنى و لم يذهب منذ ذلك الحين و يا ترى انتا اتولدت قبل وفاة عمو حسنى بكام سنة و الاهم يا ترى عمو اللى جاى بعديه هيقعد و لن يذهب برضه أم هيحصل فى الامور امور...

معلشى يا عمر رغيف العيش غلى قوى...و البطالة زادت قوى...و العطش زاد قوى قوى....و الفساد استشرى قوى قوى قوى...و الحيتان كتروا قوى...يعنى البلد بقت زفت قوى قوى...بس اعملك ايه يا باشا موش انتا مبسوط انك جيت ...قابل بقى يا معلم ..و يا عالم يمكن بمرور الوقت ينقشع الصبح الجديد ...(حلوة ينقشع دى قوى)

كل سنة و انتا طيب يا عمر و عقبال ما اكتبلك على الموقع بتاعك عمر افندى دوت كوم تهنئتك بعيدك التمانين انشالله ...يدينا و يديك طولة العمر.

كل اللى عايز يهنى عمر يدخل على التعليقات و يهنيه بقى علشان دا هينطبع و يتحط فى ملف ذكرياته عن السنة الاولى ...فتعليقك اكيد مهم.

33 comments:

Anonymous said...

بصراحة ياباسم دي اقوى بوست عاملتها من ساعت مابدأت المدونة دي.........بسبس احساسك عالي قوي .......اكيد عمر هايفرح جدا لما يقرا الكلام ده باذن الله .....ويشوف ماضيه كشريط فيديو مصور....بصراحة حاجة تحفة.....وبالنسبة لللحتة الاخيرة بتاعت المستقبل ........زياعم خليها على الله بس مادام احنا بناخد بالاسباب "زي ماانت عايز تربيه كده على سيرة سيدنا عمر بن الخطاب" يبقى اكيد مستقبله هيكون احسن من حاضرنا لو كل الابهات فكروا زيك انت وناس كتير اننا نغرس الصح فيهم من الصغر فاباذن الله يكون جيل النصر .......النصر على الجهل والفقر والتخلف والظلم والفساد والقهر و....و...و...وساعتها ما نخافش مين هيحكمهم لانه" مثلما تكونوا يول عليكم.........سلام ليك للبوست الرائع مرة تانية .......وانا سعيد اني علقت في الاول

مزايا العقارية القابضة said...

أنا سعيدة إني تاني واحدة أعلق على هذا الموضوع

بجد ما شاء الله

المدونة رائعة

ربنا يجعله في ميزان حسناتك

و كل عام يا عمر و أنت إلى الله أقرب و على طاعته أدوم و من الجنة أقرب و عن النار أبعد

و لسنة نبيه أفعل و لكتاب الله أحفظ

و ربنا يعز بك الإسلام و يعزك بالإسلام

خالتو شيماء :)

الـفجـريـــة said...

كل سنة وعمر طيب وبخير

انا متابعة المدونة من زمااان لكن اول مرة اعلق

قلت لازم اقول لعمر

كل سنة وانت طيب
وادعو له ان يكون من الصالحين ان شاء الله
ويكون قرة عين لكما
ويرزقكم بره
وانه يقدم للاسلام ما لم يقدمه احد من قبله
حتى ولو كان حاجة صغيرة


الذكريات دى اجمل حاجة
وما شاء الله حضرتك مركز معاه فيها
ويا رب دائما يفرحكم بيه

بس كلمة لعمر عشان يوشفها لما يكبر

اولا يارب تكون الوشوش غير الوشوش
عشان كفاية كده اوى
26 سنة مش قليل

ثانيا يارب تكون بر بوالديك لانهم جزاهم الله خيرا انهم عرفونا عليك يا فندم

Anonymous said...

باسم انا قرات البوست دلوقتي وانا في الاسكنرية في شغل وعمار واخته وامهم مش معيا ما اكدبش عليك الدمعة فرت من عيني شوقا لعمار وجنة ربنا يباركلك في عمر وعقبال جوازه ونجاحه وكل حاجة حلوه وربنا يحفظ اولادنا جميعا من كل سؤ
عقبال ما تخاويه مش اسمها كده
اخوك ياسر السيد اخو عبد الرحمن

عمر أفندى و أبووه said...

سمير

ربنا يخليك و انا فعلا كنت بكتبله من قلبى ...و موضوع التخلف و الظلم...موش متفائل زيك كده بس ماشى موش هخسر حاجة لما امشى وراك

وقف لله تعالى..

ربنا يتقبل منك ...و اكيد هيحبك قوى عمر طالما اسمك على اسم مامته

الفجرية

اولا نحن سعداء بتشريفكم يا افندم ...انا و عمر افندى شخصيا و بيوصيكى متخشيش غير لما تعلقى بعد كده علشان تحسيسيه بوجود سياتك و هو هيفرشلك المدونة بوستات...بالنسبة لموضوع الوشوش غير الوشوش و الله كلنا نتمنى ذلك و ليس على الله بعزيز...بس فى وضع البلد الحالى ...لسه شوية ..ممكن نقول ده فى مدونة عمر افندى و ابنه ...موش مدونة عمر افندى و ابوه

ياسر..
اولا وحشنى جدا ..
ثانيا..ربنا يرجعك ليهم بالشلامة..
ثالثا...يا عم والنبى يا عم معنتش تقولى ياسر اخو عبدالرحمن ...عبدالرحمن هو اللى اخوك و موش لازم يرشق فى تعريفك كتير

فوضى منظمة said...

كل ستة وانت طيب يا عمر افندي .. وربنا يخليك لابوك ويخليى أبوك ليك .. مش عارف .. انا تخيلت نفسي أما أكبر وأقرأ أن ابويا كتب عني البوست ده وانا صغير .. احساس عالي أوي يا استاذ باسم ..بالتوفيق

Anonymous said...

باسم يا صاحبى واحشنى والله واكيد هنتواصل قريب ان شاء الله.....ربنا يباركلك فى عمر وعقبال 100 سنه ليه وليك و........وكمان لوالدته عشان اقفل عليك اى سكه تانيه وخصوصا انك فى السودان
الف مبروك يا صاحبى

انس القاضى

Anonymous said...

كل سة و عمر طيب و عمر محظوظ انه عندو بابا بيحبه كدة

Unknown said...

ايه يا عم باسم ؟؟ بتخوف الواد عمر ابننا ليه من الحياه وقاعد تقوله الحياه وحشة أوى والرغيف غالى قوى والفساد كتر أوى .. فين المنظور الايجابى للحياه .. المزز الحلوة كترت أوى والجواز العرفى انتشر أوى وده طبعا غير الانتشار الطردى المفرح للحشيش والمخدرات ودى كلها مؤشرات حلوة اوى على ان بكره فى أمل واللى جاى بأذن الله هيبقى أحسن .. تفاءل يا عمى باسم دى الحياه حلوة .والمزز أحلى

أحمد السباعـي said...

كل سنة وانت طيب يا عمر

وعقبال 1000 سنة في طاعة ربنا
وتكون خير خلف لخير سلف

احساس جميل اوي
لما تقرأ الموضوع ده بعد 7 سنوات من الآن
وزي ماقال شاهينشي احساس عالي اوي
يا أستاذ باسم

ربنا يخليهولك ويبارك لك فيه
ويرزقك بره وطاعته طول العمر

ويبارله فيك أب متميز وحبوب

الكواكبي said...

عقبال 100 سنة يا عم عمر وربنا يكون في عونك يا بني . . اصل ربنا رزقك بأب لاسع
نصيحة مني ركز مع مامتك وسيبك من باسم بدل ما يبيعك هدومك علشان يجيب لك دباديب؛ نصيحة تانية ما تسيبلوش مفاتيح البيبي كاريج بتاعتك علشان الشيطان شاطر وممكن ياخدها من وراك ينحرف بيها مع بنات بني الأسود في السودان الشغيغ

O S A M A said...

..ربنا يخليلك عمر افندى ويخلى له ابوووه

..حلو اسم عمر وحلو انك تشوف نفسك فيه
تشوفه وهو بيكبر ادامك يوم بعد يوم
وتعلمه وتقوله دا صح ودا غلط
وتبقوا اصحاب

ربنا يخليهولك

.............................

سلامى لك

dr samah said...

السلام عليكم
بقالي كتييييييير اوي نفسي اشارك في مدونة احب مخلوق الى قلبى عمورة حبيبي واللي عيد
ميلاده ياتي بعد ايام قلائل من دكرى الاسراء والمعراج
مش عارفة ليه وانا بقرأ الدروس المستفادة منها كنت فكراكم اوي ودعيت لكم اوي ربنا يثبتكم ويبارك في عمر
فهكذا هم دائما اصحاب الرسالات في اختبار وتمحيص من الله عز وجل
اسال الله العظيم رب العرش العظيم ان يبارك في عمر وان يصطنعه لنفسه وان يكون جندي من جنود الاسلام وان يعين والديه على تنشأته على مراد الله منه فهو نعم المولى والنصير
خالتو سماح

AbdElRaHmaN Ayyash said...

عمرر
:D انت رائع يا استاذ باسم
على فكره كويسة اوي مستشفى الهدى :D
يعني انت منصوراوي
بلديات يعني
بس الهدى في طلخا :P
المهم ربنا يبارك في عمر و ساعة لما يقرا الكلام ده يكون الحال اللي انت بتقوله ده ماضي انتهى
:D على فكره
ينقشع دي متنفعش هنا
انت المفروض تقول ينقشع الظلام مش ينقشع النهار
:D وللا ايه يا عمررر ؟
علم ابوك يابني :P
ربنا يباركلك فيه يا استاذ باسم و يباركله فيك
و يارب فعلا يكون زي عمر بن الخطاب
عمر بن عبدالعزيز
عمر المختار
اي عمر محترم في الدنيا
و يارب يفرحك بولاده
و على فكره
مش عارف ليه حاسس انك هتظلم نور لو جت بعد عمر او غير نور كمان
بس يللا
اهه اول فرحتك:d
سلامو يا استاذي

بحب الحرية said...

السلام عليكم ورحمة الله

ماشاء الله ..مشاعر أبوة فياضة
وحب غارم ..
ربنا يباركلكم فيه

يوم ميلاد سعيد يا عمر أفندي
يارب نشوفك من أبطال الإسلام
:)

rana 3amra said...

الله اكبر عليه ماشاء الله ربنا يحميهولك

ول عمر بقى

كل سنة وانت طيب يا معلم يا جامد
يا قمر

بص بقى لما تبقى كبير كفاية وتقرا الكومنت دة ابقى افتكرنى بقى يا معلم
بس انت كنت زى القمر وانت صغير
يا ترى هاتكون حلو كدة اما تكبر
اكيد
:)

Anonymous said...

باسم. أولا كل سنة وعمر طيب
ربنا يخليه ليك ولماماته وبالمصري تخاويه الأولاد دول أحلى نعمة في الدنيا.
عمر. ماشاء الله الموقع بتاعك رائع . انت محظوظ علشان عندك أب طيب وشاطر وعملك الموقع الرائع ده ربنا يخليه ليك.

ربنا يبارك فيك وتحتفل بعيد ميلادك العشرين و و و المية كمان.

وائل_صح ولا غلط_ said...

كل سنه وانت طيب يا عمر افندي بيه
وعقبال مليون سنه في طاعة الله
ابقي افتكرنا بقي لما تكبر كده وتعرف تقري بالدعاء

بس ايه يا استاذ با سم فين التورته والشموع والحركات دي؟؟؟؟

ahmed mefrh said...

ماشاء الله
الولد من دلوقتى انترنت و بحر و عربيه و موبايل
و اي دة كمان .........الاردن
هههههههههههههههه
ربنا يخلهولك و يجعله قرت عين لك
ابو مفراح

Aml Ghonaim said...

غالبا أدخل هنا ؛ لكن هذه أول مرة أعلق ...
كل سنة وعمر بألف خير ...
ربنا يبارك لك ياعمر ؛ ويجعلك كما أراد والديك ....
أتمنى أن أراك وأنت تكبر ؛
وأنت ترسم بيديك خريطة جديدة لمستقبلك ؛ ؛؛؛
فالأمل بك ؛ وبأقرانك باذن الله ....
ربنا يبارك لك فى عمرك ويقر عين أبويك بك ....
صغيرى الغالى :
كن كما أرداد والديك ؛ وكن بارا بهما ؛ فهذا أقل ماتقدمه لهما ؛؛؛
ولا تنسى أبدا آمالهما فيك ....

مُصْعَب إِبْرَاهِيم said...

كل سنة وأنت طيب يا ولد..

خللي بالك من بابا ومن ماما ومن المدونة

عمر أفندى و أبووه said...



ردا على بعض التعليقات التى وردت



طارق بيه عبدالمحسن

خلى موضوع الموزز و الحشيش و العرفى و الكلام ده لما يكبر و يقرر هو بنفسه...انا هحاول و ربنا يعينى انى اربيه صح و اعمل اللى عليه و بعد كده لا تزر وازرة وزر اخرى بقى...

استاذ احمد السباعى

شكرا على المجاملة ,...بس عندى سؤال:اشمعنى سبع سنين تحديدا .؟؟ ليه موش عشرة مثلا او خمسة

الكواكبى


و الله يا اسلام انا طيب وغلبان و موش مطرقع ولا حاجة انتوا اللى تقليديين ...و بعدين كل واحد فى البيت مخلى باله من مفاتيحه و بستندل مع التانى متقلقشى
و بعدين بنات بنى الاسود فى السودان الشقيق ايه يا عم ...احنا هنا مركزين فى الشغل و ربنا يتقبل و كفاية كده بقى...

دكتورة سماح

اخيرا خالتو عبرتك يا عمر و دخلت علقتلك...ربنا يخليكى ليه و عمر بيقولكم كلم وحشتوه قوى

السيد عبالرحمن عياش

و الله دا من دواعى سرورى اننا نطلع بلديات
و هية فعلال مستشفى كويسة (مستشفى الهدى ) و على فكرة انا روحتها قبل الولاده و طلعت شوفت الحجرات و نظافتها و سالت على الدماترة فيها و نظام الاقامة و دا كان حاجة مستغربة منهم جدا ان فى حد يعمل كده

بالنسبة لموضوع ينقشع ده يا عم ماشى منكم نستقيد مع انى خريج ازهر بس مليش فى اللغة العربية قوى ولا الانجليزية علشان محدش يفهمنى غلط ...

ليه نظرتكالسوداوية دى بقى و بتبشرنى بانى هظلم نور ...ربنا يجيبها الاول بالسلامة و شوف انا هعملها ايه...لسه فى الجراب يا حاوى افكار تانية متقلقشى...

rana 3amra

اكيد هيفرح قوى بالكومنت بتاعك لما يكبر مفيش شك

وائل باشا صح ولا غلط


فى تورتة و فى شمع بس لسه منزلوش ...نازلين البوست الجاى انشالله

على راى المثل (اهدى على الرز يستوى)


ابو مفــــــــراح

امشك الخشب بس و بعدين الاردن دى كانت ترانزيت لمدة ساعتين موش اكتر فى طريقنا للخرطوم


اصرار امل


شكرا جزيلا على تشريفكم يا افندم و على نصائحكم الغالية و قد ايه التعليق بيكون حاجة جميلة فا لا تنسنا من كومينتاتكم



Oma said...

ya 3asl masha2alh 3lik
howam ma7zoz bek w bemamto
rabna yekrmko feh ya rab w yehdeholk...ensh2alah lma yekbar hayefr7 awi bekol el nas elly 2alolo kol sna w enta tayeb dol
howa 3asol 5ales mash2alah
kol sna w enta tayeb ya 3amooor
3la fekra esmk zay esm a5oya bs a5oya mosh 7elw zayek keda :)
7eb babak awi w mamtk la2nhm by7bok gedan :)

انا انصاري said...

كل سنة وانت طيب يا عمر

بس يا ريت يا ابو عمر
بلاش تكلم ابنك في موضوع سعر رغيف العيش ومصاريف المدارس وعمو اللى هيجي بعد عمؤو مبارك والكلام ده
الواد لسه صغير ومش طالباها وجع دماغ

Anonymous said...

كل سنه وانتا عسل يا عمر باشا
بصراحه أكتر حاجة عاجباني التعليقات
كتيره ومتنوعة
يعني كوكتيل ظريف
كان ليا طلب عندك
يا ريت لو تظبط لنا تدوينه بالسوداني
سلااااام
أخو ياسر

شقاوة شعب said...

دى اول مرة ادخل على المدونة
وبجد فكرة عبقرية انك ترصد حياة عمر افندى باشا لحظة بلحظة ويوم بيوم من خلال المدونة

ربنا يخليهولك وبارك فيه ويجعله ذرية صالحة

وكل سنة وعمووورى طيب
وعقبال التمانين يا عمور فى صحة وسعادة وهنا

Mony The Angel said...

kol sana wenta tayeb ya 3omar
rabbena ye5aleholko :)

alqassam said...

هذه اول مرة ازور مدونتك وهى بصدق مدونه تختلف عن باقى المدونات من ناحية العلاقة بين الاب والابن التى اعتقد بل اثق انها باذن الله ستكون متميزة جدا يارب يخلى عمر ويجعله سببا فى عزة الامة وتغيير هذا الواقع ويكون من القادة الذين لم يظهروا من زمن تحياتى ليك ولعمر

AbdElRaHmaN Ayyash said...

:Dماشي يا سيدي
ربنا يبارك لك فيها من قبل ما تيجي و يبارك لك في أخوها و هو موجود اهه
و ربنا يرجعكو مصر بالسلامة
و سلام

hassan fawaz said...

عقبال مليون سنه كلها زكريات طيبه و نجاحات متعددة، الأصل أنا موجه الكلام ده لعمر الحبيب، رغم اني ماشفتوش، و رغم إن ابوه احسن واحد طنشني في الدنيا، و لسه مفتكرني أهوه بعد سنه، الأصل إن الكلام ده لعمر.
عارف ياعمر أيه الحلو في الدنيا؟ الحلو إنك تعمل أللى انت عايزه في الوقت اللى انت عايزه من غير ما تكون بتعتدي على حاجه بيحبها حد تاني.
سيدنا محمد عليه الصلاة و السلام قال"حب لأخيك ما تحب لنفسك" أعمل ده يا عمر، و بجد سيبك من كلام الناس، و كلام أبوك و كلام و الدتك و كلام أي حد، طول ما انت بتعمل اللى نفسك فيه، و حاسس انك لا بتخالف شرع و لا بتعتدي على حرية حد، تبقى صح و كل اللى عكسك غلط.
على فكرة أنا اتعلمت ده متأخر قوي، و بعد ما اشتغلت مع بابا في بيزناس ، و من ساعتها يا سيدنا و أنا مابطلتش أعمل اللى بحبه.
ماتخافشي من حاجه يا عمر، ساعات الدنيا هاتديك على دماغك، و هاتتعرض لأحباطات، لكن طول ما انت قنوع و واثق من نفسك و متأكد إنك بتجرب و قابل للتغيير و التطوير، خلاص كل اللى هيحصل مش هيضايقك، هوه بس هيطورك و يديك مناعه اكبر.
أوعى الكلام عن الفقر و البطالة و الذي منه يحبطك، يا عم سيبك، أنت احسن من إن الكلام ده يأثر فيك، لأنك اجدع من إنك تدور على شماعات تعلق عليها غلطاتك، و البطالة هاتزيد و الفساد هيغرق البلد، و ماله أنت اقوى من كل الفاسدين، أنت هتفرق مع البلد ديه، لأن أبوك ابتدى يخليك تفرق من دلوقتي.
و اخيرًا أوصيك خيرًا بشد ودان أبوك و قوله لسه في واحد في مصر بيحبك أسمه حسن أبوالوفا و أنت مصر على التنفيض ليه.

Anonymous said...

السلام عليكم ورحمة الله وبركاته بعد التحيه والسلام احب انى اضيف تعليق ده لو مش يزعلكم طبعا احب انى اشوف اهتمام اكتر بعمر لو سمحتم كفايه اهمال

Anonymous said...

أزيكم أزيكم أنا مش هاول غير بيت الشعر ده لعمر ساظل احبك ياعمر حتى البس الأبيض تحت التراب ....قسما بالذى أنزل الثلج فوق الهضاب من طرف خالك محمد
هانت يا أبو عمر فات الكتير ومش باقى غير الاليل

Anonymous said...

السلام عليكم
إنه لمن الجميل أن نتواصل و لكن أتمنى أن تكون لازلت تتذكرنى
قضينا سويا أيام "لا تنسى أبدا" و ها أنا قدرا بعد محاولات عديده للوصول إليك قد علمت بهذه المدونه الرائعه.
ياريت تبعتلى رقم تليفونك على اللإيميل mranoos@hotmail.com

أنس عبدالعال/المنصوره
0105368389