Saturday, April 26, 2008

عايز أعمل حاجة



و الله موش انا بالظبط اللى عايز اعمل الحاجة دى تحديدا ...دا صديق عزيز و اخ كبير ليا اسمه حسام الحداد...حد جميل و على قدر عالى جدا من الموضوعية فى الحديث و الفهم العالى ...عايش فى السعودية من عشر سنين و اعرفه عن طريق قرايبه اللى كلهم اصحابى تقريبا خالد الحداد و محمد الحداد السعودى و محمد الحداد المصرى علشان فى اتنين فيرجن من محمد الحداد فى عيلتهم و على الباز و عمرو الباز فلما ابقى عارف كل قرايبه بالشكل ده فا كان لزاما عليا انى اعرفه هو كمان ...ناهيك عن انى من صغرى و انا بشوفه فى شارعنا لانه كان صاحب جارى هشام صبح و بيجيله كتير...معرفشى ليه بقدم مبررات انى اعرفه اصلا ....ايه المقدمة اللى فيها رغى ملوش لزمة دى...نخش فى الموضوع.


الموضوع ببساطة ان حسام من فترة كبيرة جدا بيمتعنا جميعا بايملاته المتنوعة اللى بيرسلها لى و لاصدقائه بصورة دورية منها اللى دينى و منها اللى سياسى و منها اللى منوعات و اللى نكت و اللى و اللى و اللى...ملوش لون معين بيرسل فيه يعنى ببساطة.


انا بطبيعتى طول عمرى بقرا الايملات اللى بتتبعتلى و خلاص و موش ببعت منها حاجة حتى لو فيها ايمانات مغلظة مرسل الرسالة خلانى حلفتها كلها بالاكلااه علشان ابعتها تانى...برضه مببعتهاش و متسألونيش ليه...يمكن لانى بحس الحلفانات دى بالاكراه فبالتالى موش هعاقب عليها ...ممكن اكون غلطان الله اعلم بس هو ده اللى انا بعمله.


المهم بعض ايميلات حسام بس الفترة اللى فاتت بدأت اخد حبيتين جراءة و ارد عليه فيها و اتكلم معاه و اتناقش ...و نص الكلمة اللى فاتت دى واخدها من ايميل هو بعتهولى من اسبوع....


من ضمن الايميلات دى بقى كان ايميل باعت فيه مقالة منقولة من جريدة المصريون الاليكترونية باسم


و طبعا ادليت بدلوى و صديق تانى من اصدقاؤه ادلى بدلوه و هو اشرف الرفاعى من انجلترا و صديق تالت ادلى بدلوه و هو خالد الحداد من الرياض لدرجة انى قولتلهم يا جماعة احنا قلبنا ايميل حسام لمنتدى مفتوح لتبادل الاراء
كلنا فتحنا موضوع جاى على الجرح الايام دى ...بنقول كلنا مغتربين طيب فى ايدينا ايه نعمله لبلدنا و كمان لو بصينا على اللى بيطحنوا فى طابور العيش و بيموتوا من اهلنا و اللى بيعتقلم زى اسراء عبدالفتاح و زى خيرت الشاطر و زى و زى و زى كل الناس دى بيضحوا علشان البلد ...احنا بقى كمغتربين هل ممكن يبقى لينا دور و لا احنا خلعنا الحمد الله من القرية الظالم (بعض) اهلها و ان عدنا فانا ظالمون ....الحوار طال و امتد لايميلات كتيرة وعليه فقرر السيد حسام و لان الموضوع كبير و يحتاج شرح و تفصيل انه يدخل عالم التدوين اخيرا و يعمل مدونة يعرض فيها افكاره و يحط فيها مواضيعه....و سماها عايز اعمل حاجة


شاركونى تهنئته على مدونته الجديدة...


الف مبروك يا عم حسام و عقبال باقى الصحبة لما يحصلوك.


ابو عمر

4 comments:

حسام الحداد said...

والله يا باسم أنته أحرجتنى بجد
أنا بكتب وأنا عرقان من الكسوف من الكلام الجميل اللى أنته كاتبه
ويارب أقدر أواصل وأوضح أفكارى اللى أنا مؤمن بيها فى المدونة
الله المستعان

عمرو الباز said...

صديقى العزيز باسم باشا احيك واحي حسام الحداد على مدونته وعلى مدونك الجميلة واليك تعليقى اللى قولته لحسام من ثوانى على الماسنجر وبكررهولك
وعلى فكرةاناما عجبتنيش مقالة الانسان الرخيص

وراي فى الموضوع ده بسيط الواحد لما بيشرب سجاير بيقول على الاقل لنفسة اهى بتخرج الغضب اللى جوايا واللى بيسرق بيبرر لنفسه انه سرق واحد حرامى اصلا حتى اللى بيغتصب بيقنع نفسه ان دى ست اصلا مشيها كان بطال .
الانسان دايما بيحاول يبرر لنفسه عمله حتى لو مش مقتنع بيه وحتى لو العمل ده مش وحش تسمع عن الراجل اللى كان بينزح البيارات فى طلخا زمان و لما يلبس ويتانتك اخر النهار يمشى يزعق بنغم ويقول انا بتاع الخرا
.
الشاهد فى الموضوع ان كل واحد فى مكانة شايف ان دا احسن حاجه هو فيهاطالما اختارها بمزاجه.
فطبيعى ان اللى سافر بره مصر بمزاجه زينا كلنا يشوف الجانب المظلم فى بلده وبصوره مكبره زى العدسة المحدبة كل ما تبعدها عن الحروف تبان اكتر اوى فمثلا وانا فى السعودية كنت بسمع ان الحديد مولع والعيش نار والمرتبات فى الارض والبلد هتولع والاسعار موتت الناس والعري ملا البلد والحكومة قافله الجوامع فعلا والله والى اخر هذه المبالغات ولا اقول اشاعات ودا كله كان صحيح بس مش اوى كده انا جيت وبعيش فى مصر من حوالى سنتين اهه ولسه ما متش على العكس الدنيا صحيح زى الزفت بس الناس عايشة زى ماكانت عايشة من 7000 سنة ماحصلش فى مصر مجاعة ولا الناس كلت عيالها زى ما حصل ايام المماليك فعلا البلد فى حالة صعبة بس مش خرابة زى ما اللى فى الغربة شايفين يا جماعة والله ربنا رحيم بعباده وحسام فكرنى بالاية اللى الحمد لله عمرى ما نسيتها (( ومن يتقى الله يجعل له مخرجا ويرزقه من حيث لايحتسب))
وهانت والله انا متفائل خير الازمة اللى مصر فيها قربت ناس كتير اوى من ربنا ودى من ايجابيات الازمة والدعاء لفك الكرب زاد فادعو يا جماعة يامغتربين واخر حاجة اقولها بيت الشعر الجميل ده
ضاقت فلما استحكت حلقاتها فرجت وكنت اظنها لا تفرج
والسلام عليكم ورحمة الله وبركاته

Anonymous said...

السلام عليكم ورحمة الله وبركاته
كيفك كيفك كيفك ابو عمر كل عام وانت بكل خير وسلام وأطمئنان ومن نجاح الى نجاح وتفوق الى تفوق وتمنياتي للجميع بالنجاح والتوفوق

اخوك
هيثم الصاوي ART

Kareem said...

الصراحه انا بالصدفه قاعد مخنوق كالعاده طبعا مش جديده لقيت نفسى عايز اعمل حاجه كتبت ى جوجل عايز اعمل حاجه مفيده لقيته بيقولى اقا النشره الصينيه قمت كاتب عايز اعمل حاجه بس مش معنى انى كتبت عايز اعمل حاجه انى كتبت عايز اعمل حاجه بس لا عايز اعمل حاجه المهم يعنى لقيت موضوعكم والله يعنى الواحد مش عار يقول ايه بس مشكلتنا العرب عمتا مش مصر تحديدا ننا بنعرف نتكلم بس ونعرف نصل لقلوب الناس ونأثر قيهم بالكلام وبس وعشان ربنا حامينا وعايشين فى بلد امان مش حاسين باللى بيحصل فى اخواتنا العرب الفلسطنين والعراقيين كتير بقول يمكن ده بيحصل فيهم ابتلاء من الله عز وجل ليحسن من اخلاق المسلمين وانهم يحسوا انهم ى نعمه عن بقيه الناس وان ده اختبار لللسطنين والعراقيين على الصبر والتحمل والايمان بالله ولكن طالت اوى ترة الاحتبار على الفلسطنين والعراقيين وبدئنا نقل بجد بدئنا نقل وبدء الاخلاق تتغير والانحلال يزيد فى العرب والمسلمين وبدئنا نقلد الغرب وده من علمات الساعه ويا خوفى يا خوفى نبقى من الملعونين ياريت يا جماعه زى ما بنشتكى من البطاله وعدم الشغل نبدء نفكر ليه احنا فى المشكله دى اكيد مش من راغ اكيد احنا مقصرين فى حق ربنا وفى حق نفسنا ومش حاسين باخواتنا انا لما بشوف وبسمع اللى بيحصل فى اخواتنا بزعل وبحزن زى اى حد ولكن دلوئتى حاسس ان لما بشوف اللى بيحصل والتزايد اللى بيحصل فى اخواتنا بقى الموضوع بالنسبالى بقى متكرر وعادى خلاص حاسس ان علينا الدور قريب يايت نفوق بجد ومنقولش ياه معلش معلش مبتعملش حاجه ولا بتقدم ولا بتأخر ولا هى حتى كلمه تصبر اى حد على اللى هو فيه ارجوا انى مكنش وجعتلكم دماغكم ( شاب مصرى مخنوق )