Sunday, September 2, 2007

عيد جوازى الثانى

2 -9-2007
على رأى المصرى اليوم...زى النهاردة

صورتى و انا عندى 6 سنوات بس انا لعبت فيها بالادوب بالشكل ده سنة 1997


زى النهاردة من سنتين كان فرحى ...النهاردة عيد جوازى الثانى...مر عامان على زواجى من احب خلق الله الى قلبى..زوجتى شيماء....مناسباتنا كلها فيها بركة و يمكن ده اللى مباركلنا فى جوازنا.

شوفتها اول مرة من غير ما تعرف علشان اخد قرارى بالتقدم اليها فى صلاة القيام فى رمضان 2004 بمسجد مجمع الرحمن بطلخا دقهلية و كنت واخد اجازة من شغلى فى ال اى ار تى 3 ايام مخصوص علشان الموضوع ده و فضلت الثلاث ايام اخرج من الجامع و استنى لحد ما اشوفها و اروح اصلى استخارة.

اتخطبنا فى العيد الضغير و ده كان نفس يوم كتب كتاب واحد من اعز اصدقائى و هو خالد الحداد..

انا و بابا الله يرحمه و حمايا فى حفل الخطوبة و تلبيس الدبل


و كتبنا كتابنا فى العيد الكبير بعد شهرين خطوبة بس و قصرنا فى المتكسر علطول بعد ما كل واحد فينا حس ان هو ده الشخص اللى كان مستنيه.

و عملنا حفلة بالمناسبة دى و كانت حلوة قوى و فى يوم برد قوى قوى قوى و هو الثالث من فبراير 2005.

بابا الله يرحمه و انا فى المنتصف يوم عرسى و عمو صالح ابو خالد الحداد صديق عمرى اللى اشرت اليه فى التدوينة هنا


و اتجوزنا فى الاسراء و المعراج...و هو نفس التاريخ اليوم الثانى من سبتمبر و لكن منذ عامان يعنى 2005 برضه...و فرحنا كان عبارة عن زفة عربيات خفيف خفيف من المنصورة رأسا الى القاهرة مع توديع اصدقاء المنصورة للفرح على حدود الدقهلية و استقبال اصدقاء القاهرة للفرح فى ميدان مصطفى محمود بالمهندسين و الانطلاق الى منزل الزوجية بفيصل...و الطريف ان جارى اللى فى الشقة اللى فوقى وافق زواجه نفس يوم زواجى و اسم زوجته نفس اسم زوجتى مما ابهجنا و جعلنا نصر على دخول العمارة فى نفس اللحظة ...باسم و ايمن و الشيماءتان.

هذا الزاوج حدث قبله بثلاث اسابيع فقط حدث مؤثر و هو استقالتى من الاى ار تى و التحاقى بالعمل فى شركة اى تو....تابع تدوينة ابوعمر فى سطور2..و دى كانت مغامرة و الحمد الله ربنا وفقنى فيها جدا.

الى جميع العزاب

حلو الجواز...اه حلو و فيه من الاستقرار النفسى و العاطفى و الاجتماعى الكثير و حسيت بعد الجواز انى اتجوزت فى 2005 و انا مديون زى كل شباب مصر و فى شقة ايجار جديد زى كل شباب مصر و كنت اقدر اتجوز مثلا فى 2003 و انا مديون برضه و فى شقة ايجار جديد بس النصيب و لكن نخرج من ده بقول لا تؤجل جوازة اليوم الى الغد ...استعن بالله ولا تعجز...جدد نيتك انك تبتغى بالجوازة دى وجه الله و هو هيرزقك و هيفتحلك ابواب الرزق الواسعة من عنده ,,,


الى جميع المتزوجين

ربنا يكرمك و يهدى سركم و انصحكم نصيحة غالية جدا ...بالا تسمحوا لانفسكم ان يمر عليكم عيد جواز و انتم فى السودان ابدا ...لانى لا اعرف اى مكان اجيب منه حاجة عدلة لمراتى ولا لابنى ...ولا تى مكان عدل نقعد نتعشى فيه..يعنى يوم كان ممكن يكون احسن بكتير لو كنت فى مصر او حتى فى السنغال.

الى ايمن و مراته

انتم اصدقاء و رفقاء كفاح منذ عامان تزوجنا فى يوم واحد ...و عندنا دلوقتى عمر و انتم عندكم رفيدة و خليدة...ربنا يكرمكم بيهم و نشوفهم عرايس و ينبتهم نباتا حسنا.

الى النادى الاهلى

سايق عليكم النبى يا رجالة لتنصفونا النهاردة قدام اسيك و ترمونا من ام البهدلة اللى اتهدلناها هنا كمصرين من يوم ما وكستونا امام الهلال و يا عم ابو تريكة اتعب شوية معانا النهاردة علشان خاطر اخوك باسم فى السودان ...خليها تبقى هدية عيد جوازنا منك انتا و الشيخ حسنى...و يا حضرى و الله بتاع الخضار امبارح بيقولى راح نجابلكم فى النهائى و نرجصلك الحضرى تانى بالتلاتة برضج....طب اقوله ايه يا حضرى بزمتك بعد ما فضحتنا.

الحضرى و رجالته و هما راجعين من ستاد ام دورمان عقب مباراة الهلال و ابوتريكة مصاب فى فندق هيلتون و قبل سفرهم بساعة و التصوير لعلى عبدالمنعم

كفاية كده علشان اخيرا فى واحد سودانى حن عليا و وصفلى محل ورد هنزل اروح اشوفه يمكن يطلع حلو و اعرف اشترى منه ورد لمراتى...


كل سنة و احنا طيبين

تحديث الاثنين 3 سبتمبر:

إلى النادى الاهلى..انا متأكد ان ابوتريكية نزل علشان هو قرأ التوينة دى قبل المطش فا ضغط على نفسه و جاب جون علشان ميزعلنيش ...هو ده دور الاعلام يا جدعان...شكرا يا تريكة على انك فرحتنا امبارح و اخيرا عقت علم الاهلى على الشباك بتاع العربية و لبست الزمبيل و لفيت بالعربية زى ما كنت ناوى اعمل يوم مطش الهلال بس محصلشى نصيب ...

إلى كل بتوع الورد فى مصر...اللى يعرف يجى يفتح كشك هنا فى السودان يا ريت يجى ..لان الوردة الواحدة و خلى بالك من الواحدة دى قوى موش الكبشة ولا البوكية وولا اللفة زى ما هو موجود عندنا فى مصر ...الوردة الواحدة بعشرة الاف جنية سودانى قديم اللى هية عشرة جنية سودانى جديد يعنى حوالى 30 جنية مصرى ...يعنى لو عملت لفة فى ايديك بعشرة وردات زى اللى العيال بتوع الجامعة فى مصر بيبوعوها قدام الجامعة يوم عيد الحب بخمسة جنيه...هنا هتتكلفلها 100 الف جنيه سودانى قديم اى ما يعادل 100 جنيه سودانى جديد يعنى 300 جنيه مصرى...و البنت لما سألتها بتعجب عن السعر العالى قوى قوى ده ...قالتلى موش لسه بنستورده من عندكم من مصر و طيران و تلاجة و غيره يعنى بيكلفنا كتير ...روح افتح مزرعة عندك فى مصر و انتا تكسب كويس قوى لو استغلت على السودان بس ...ده ردها...مفيش حد من بتوع الورد المصريين بيفكر بقى
.

12 comments:

Anonymous said...

Happy birthday ya Bassem w Chaymaa!
Kouli sana wintou tayébine inshallah!
3obal 100 sana inshallah!
Wish you all the best in your life!
Inshallah will see soon Omar's sister!
She must have web site kaman inshallah!
Sincerelly.
Asmaa

Anonymous said...

الاخ الحبيب الغالى باسم كل سنه وانت طيب بمناسبة الزواج سبحان الله الايام بتعدى انا فاكره زى امبارح بالظبط بصراحه اهم حاجه تتقال ان صورتك وانت صغير بالضبط صورة عمر ربنا يباركلك فى ولاتنسانا من صالح الدعاء
اخوك حاتم ثابت

Anonymous said...

السلام عليكم
كل سنة جواز وانت وأم عمر طيبين يا باسم
أخوك
محمد فتحي النادي

علي عبد المنعم said...

السلام عليكم أخي وحبيبي وصديقي باسم،

هذا هو التعليق الأول لي على بلوجك العظيم، عظم الله بوستاتك..

كل عام وأنت والأسرة بخير يارب، وأبلغكم رمضان وجعلكم فيه من المقبولين وجمعنا وإياكم في جنات النعيم..

أنا باكتب لك من القاهرة، بعد ما رجعت من الخرطوم، اللي قضيت فيها أجمل أيام أسفاري خارج مصر، والفضل لربنا سبحانه وتعالى، ثم ليك يا حاج باسم..

عايز أقولك: إن الحمد لله الجواز جميل لمن أدرك الغاية الحقيقية منه، وهو إدراك السكينة والاستقرار النفسي، والـ"سكن"، كما جاء في كتاب الله..

علشان كده بادعو الله إنه يعمر بيتكم بالبركة والمغفرة والطيبات ويجعل أيامكم كلها بالسعادة والعبادة ويرزقكم من خير كله، ويجنبكم السوء والحسد والفقر ويجعل لكم من أمركم رشداً، وييسر لكم أموركم، ويوفقك في عملك يااااارب.. ويجعل عمر أكبر "أفندي" في الدنيا إن شاء الله :))

Anonymous said...

Kol Sanah w enta tayyab ya besso :) w kol sana w shosho tayyaba w 3o2bal el 3omr kolo mabsouteen w methaneen My dear bro.. Salma

يلا مش مهم said...

بسوم
يا صاحبي
الف الف الف مبروك ليك ولشيماء
وخد بقي الكلمتين دول
اولا هي يا بختها بيك اصل يا صاحبي اي بنت في الدنيا هاتكون عايزة ايه غير راجل محترم بيقدرها ويحميها ويشيل مسؤليتها وميقصرش معاها ويوفرلها الراحة والامان والاستقرار ويا سلام لو صاحب فكرة ومبدا زيك يا غالي يعني من الاخر شيماء ربنا كرمها بيك
اما انت يا صاحب
فكنت عاوز ايه او مين زي شيماء مقدرش اقول عنها اي حاجة لاني مش عارفها لكن اكيد هي انسانة نبيلة علشان حاجات كتير اولها
البيت المنظم النظيف اللي كنا بنخشه اللي هو بيتك يدل ويقول ان هناك امراءة نبيلة في هذا البيت وكمان علشان هي رضيت بيك وانت زي اي شاب مصري مديون وحالتك زي ال...بس هي عادي خدتك علي عيبك يعني انشانة نبيلة والاكتر من ده انها عاشت معاك ودفعت ضريبة زيك بالظبط علشان انت راجل محترم وسابت بلدها واهلها علشان تقف جنبك واكيد مليون في المية انها مصدرش منها كلمة تدل علي غضب او ضيق واكيد كانت كلماتها في وقت الازمة كلمات تشجيع وصبر فعلشان كدة هي انسانة نبيلة
بجد
الف مليون مبروك
وحاجة كمان انت علمت عليا لما ذكرت حكاية 2003 و2005 يعني من الاخر جوازة تفوت ولا حد يموت
ويللا مش مهم

Anonymous said...

ALF ALF ALF MABROUK YA BASOOOOOOOOOOOOOM... miss you man!

Khalid Gamal

Amgad said...

Hi Basem
Alf alf mabrouk ya abo omar. Rabena yebark lek feeh. I know you have moved to sudan from gado, he might come to australia too.
keep i9n touch man, have you forget our conversation. Good on you basem you are really deserve that.
Amgad

Anonymous said...

كل سنة وانتم طيبين ودايما ربنا يديم عليك نعمته دي يارب ولا تتحرمش من عالمك الصغير ده اللي منور عليك حياتك
منور بابن زى العسل
وزوجة صالحةهى نعم السند لك في هذة الحياة الصعبة
وياسيدي اهديها اغنية اللي معرفش اسمه
مين اللي يسهر جنبي الليل
مين اللي باله معايا طويل
مين لما أتعب يساعدني
ومعايا حمل الهم يشيل
من غيرها ست الستات وياها بصبح وابات
وأجيب لمين غيرها وأهادي
أم العيال العشرية
جايب معايا اللي في يدي وقدرت أجيبه من كدي
ولا تقوليش بس أنا عندي
وكفاية بتهل عليا
اصلك أصيله ياعشرية
أخوك اللى مليش في النت ســــــــامرومعلش أنا مبعرفش اكتب اسمى فوق ازاي

عمر أفندى و أبووه said...



سامر

اولاً كون انك تضغط على نفسك و تتعامل مع الانترنت و التكلونوجيا علشان خاطرى ده شىء يسعدنى و انا مقدره ليك جدا

ثانيا...الاغنية اسمها عشرية للمطرب الكبير احمد منيب

ثالثا تقدر تحط اسمك فوق لو اخترت
other
بدل ما تختار
anonymous

و فوق ده كله الإجتهاد اللى انتا بتعمله ده فى حد ذاته له اجر متقلقشى

و خصوصا انك فى السعودية يعنى ارض مباركة
بحبك و الله يا سامر

Anonymous said...

ana abl ma a2ol kol sana w entom tyben w el 7agat de m3a eni 3araf eni met2khra bs mosh mohm, ana yhmeni akter men eli m3a omar pasha fe el sora, eh ya 3m enta nset habiba wla eh???

mashi ya sedi, el mohm b2a rabena ybarklkm enta w shaimaa w tekamelo m3a b3d 7yatko fe slam w e7tram dayem.

ana 3arfa enaha met2khra awiiiiiiiiiii, bs bardo men eli m3a omar de? 3la fekra habiba hatb2a agmal w ar2 wlahi ya basem.

Maha said...

ههههههههههه

ضحكت ضحك في التدوينة دي :)

بارك الله فيك