من افضل ما سمعت لمشارى راشد على الاطلاق ...حاطتها على موبايلى من شهور و كل فترة لما احس انى مخنوق افتحها اسمعها تلات او اربع مرات ورا بعض
الهى انت تعلم كيف حالى ...فهل يا سيدى فرج قريب
فيا ديان يوم الدين فرٌج ...هموم فى الفؤاد لها دبيب
جمله بحسها بتلخص الموضوع....بحسها لو طلعت من القلب بجد ...هتسببلك راحة غير عادية...بقول لهانى محمود صديقى على الماسنجر النهاردة انا تعبان و قلقان و داخل على حالة قريبة من الاكتئاب ...رد عليا بجملة واحدة ...رد عليا و قالى --
من توكل على الله كفاه
الهى انت تعلم كيف حالى ...فهل يا سيدى فرج قريب
فيا ديان يوم الدين فرٌج ...هموم فى الفؤاد لها دبيب
طيب خلينا اخدكم للقطة تانية بقى خلتنى اعنزل بالبوست ده النهاردة
محمد حسن
محمد حسن ده ولد اسكندرانى جدع ...اعرفه من اكتر من عشر سنين تقريبا و عشت معاه فى شقة واحدة لمدة سنة كاملة ايام الجامعة و بالتحديد 1998 و فجأة محمد فين يا جماعة محمد هيسافر امريكا و بالفعل غادر من البلد بلا رجعة و على فترات بقى كل تلات اربع شهور بنتقابل على الماسنجر نسلم على بعض....و نطمن على احوال بعض....محمد على فكرة مكملشى الكلية فى مصر بس خد ماستر هناك فى الكمبيوتر و بقى مهندس كبير هناك فى الشبكات
دخل على الماسنحر النهاردة و اطمنا على بعض و بعدين قالى انا عملت حاجة علشان رمضان...علشان الاستعداد لرمضان...حاجة خدت منى 3 ساعات شغل على ما خرجت بس نفسى اخد ثواب عليها لما الناس تشوفها و قلبها يلين شوية....عملت كليب لقصيدة اغيب لمشارى راشد..و طبعا انا علطول اتثبت فى مكانى....يا نهار جمال ...انتا متعرفشى يا محمد انى بحب القصيدة دى جدا ...طيب ارفع على اليو تيوب و ابعتهالى و بالفعل عمل كده و ادينى بدورى هقدمهالكم من اخراجه و بيتمنى منكم الدعاء له اذا عجبتكم و انا كمان بتمنى ان الناس تفتكر كلمة هانى قوى
من توكل على الله كفاه
و يا رب اجعل الكليب ده تكملة للبوست اللى فات فى اتخاذنا لخطوات فى طريق جلاء الران من على القلوب قبل رمضان ...العداد بيعد يا جماعة و كنا بنقول فاضل 82 يوم دلوقتى بقوا 74 يوم بس و القطر موش هيستنى حد...يلا ابتدى دلوقتى حالا ابتدى اذكر الله ابتدى استغفره ميت مرة فى اليوم موش هياخدوا منك اكتر من دقيقتين بالعدد و احسبهم معايا ...ابتدى صوم اتنين و بعدين صوم اتنين و خميس ...ابتدى اقرا قرآن ربع فى ربعين فى حزب فى جزء ...الموضوع هيجى كده صدقنى و تسلح بالسلاح الاقوى ...سلاح البناء الشامل موش الدمار الشامل ...صاحب النتائج العنقودية التى لا تنتهى و هو سلاح الدعاء...ادعى ربنا و لح عليه ادعى ربنا اطرق بابه كتييييييير على قد ما تقدر فهو المستجيب انشالله
بس الله يخليكم متنسوش تدعولى معاكم
ابو عمر و ابنه
شوفوا الكليب و استمتعوا معايا
