Thursday, May 7, 2009

علي بيك





القاهرة فى 8 مايو 2029


عزيزى علي بيك




السلام عليكم و رحمة الله و بركاته




كل سنة و انتا طيب




كبرت يا علوة و بقيت عشرين سنة بالتمام و الكمال.. وكبرتنا معاك...تخيل يا على يا حبيبى ان زى النهاردة من 20 سنة انتا نورتنا و شرفتنا و حليت ضيفا كريما على اسرتنا السعيدة...فى الجمعة يوم 8 مايو 2009 الساعة 10 صباحا كان مولدك فى يوم عيد المسلمين يوم الجمعة ...كان مولدك و نحن نقرأ سورة الكهف و انا بقرأ سورة مريم زى ما كنت بقرأ وقت ولادة عمر اخوك برضه و متسألنيش ليه...موش جاية فى الاثر ولا حاجة بس يمكن تبركا و تيمنا بستنا مريم عليها السلام...كل سنة و انت طيب يا حبيبى




عايز اعتذرلك يا على لانى مكنتش جنب ماما اثناء الولادة نظرا لسفرى خارج مصر...بعتذرلك لانى مكنتش قريب منك فى فترة الحمل الا ايام معدودات...بعتذرلك لانى مجهزتلكشى لوحات استقبال زى بتاعت عمر أفندى اخوك الكبير..الظروف فى الفترة دى كانت صعبة شوية لكن اهوه الحمد الله اهية مرحلة و عدت الله لا يعودها يا علوة...




على فكرة يا على ...انا اه كنت بعيد عن مصر فى الفترة دى لكن وصيت ماما تشترى جرايد الاهرام و الدستور و المصرى اليوم يوميها ...اللى انتا شوفتهم من سنين دول متعانين ...شايف اخبارنا ايامها كانت بتتكلم فى ايه...كان العالم كله خايف من وباء اسمه انفلونزا الخنازير ربنا يعافينا من كل ضرر ...و كان رئيسنا لسه هو الرئيس محمد حسنى مبارك الله يرحمه وكان عمر افندى اخوك يدوبك لسه مكملشى 3 سنين وحتى النادى الاهلى كان بينافسه الاسماعيلى على الدورى فى السنة دى و مدربه كان برتغالى اسمه مانويل جوزيه بما انك اهلاوى يعنى..




على فكرة يا عم على انا معملتلكشى مدونة جديدة انا دخلتك فى المدونة القديمة اللى كانت شركة بينى و بين عمر أفندى اخوك مناصفة دى ...دخلتك فيها بالتلت يعنى بقت المدونة دى شركة بينا احنا التلاتة من سنة 2009 كل واحد فينا له تلتها يبرتع فيه براحته...




على...انا بحمد ربنا انى قدرنى انى اساعدك تحفظ كتاب الله و تختمه فى سن صغير قوى كده انتا و عمر أخوك...و كمان فضلتوا تراجعوا و منسيتهوش تانى و من اسعد اوقات حياتى لما بتؤمنا فى قيام الليل انا و مامتك و اخوك عمر زى ما ببقى طاير من الفرحة لما عمر أخوك هو اللى بيصحينا ننزل نصلى الفجر بالجامع كلنا كل يوم




تفوقك الدائم فى دراستك ده يا على مفرحنى و موش هقولك عليه بقى انك طالع لابوك زى ما كل الاباء بيقولوا و اخنق عليك...انتا عارف اننا اصحاب اساسا وموش ههجص عليك و اقولك انى كنت جامد...انا اخرى علوم كيمياء يعنى كلية متوسطة المستوى انما انتا ماشاء الله فى كلية من كليات القمة.




عايزك تطمنى بقى بعد امتحانات الكلية بتاعتك انتا و عمر اللى على الابواب دى انتا قولتلى انكم هتخلصوا على اخر مايو 2029 و هتبدأوا الاجازة ...طمنى انكم جامدين كالعادة و هتكسروا الدنيا فى الامتحانات وهتبدأوا فى مشاريع خدمة المجتمع اللى بتشاركوا فيها كل صيف دى...ربنا يتقبل منكم يا رب و يجعلكم كده دايما فى خدمة الدين و المجتمع و عون للناس دائما يا رب.




على بيك ...موش هتبطل تتنطط على عمر أفندى اخوك علشان انتا اخدت لقب بيك و هو أخد لقب أفندى....يا بنى كلها القاب و هزار موش ...تبقوا كبار كده و بتتناقروا على النقطة الفرعية دى...بحبكما فى الله




على بيك...اللهم انى استودعك و جميع اعضائك و قلبك و عقلك و ملكاتك...اللهم حسن خلقه كما حسنت خلقه...اللهم انصر به الاسلام و اعز به الدين و اجلعه من عبادك الصالحين و ارزقه بر والديه ...




يا رب...يا رب ارزق ولداى عمر و على ايمان مثل ايمان سيدنا ابوبكر و قوة مثل قوة سيدنا عمرو حياء مثل حياء سيدنا عثمان و علم مثل علم سيدنا على و اخيرا غنى مثل غنى سيدنا عبالرحمن بن عوف رضى الله عنهم جميعا و احشرهما مع هؤلاء الصحبة الصالحة فى الفردوس الاعلى مع حبيبك محمد صلى الله عليه و سلم.




أبوك


أبوعمر و على





30 comments:

AbdElRaHmaN Ayyash said...

ما شاء الله
الف الف الف مبروك يا عم باسم :)
ربنا يباركلك فيهم يارب
:D و ان شاء الله علي و عمر يكونوا زي ما انت عاوز و احسن كمان
يبقو زي ما هم عاوزين :D
بس انت مين قالك ان سيادتو هيكون مات سنة 2029 !!
انت بتفول على الزعيم وللا ايه :)
لا حقيقي ربنا يباركلك
بورك في الموهوب
و شكرت الواهب
و رزقت بره
و بلغ أشده

عمر أفندى و أبووه said...

ربنا يخليك يا عبدالرحمن
و عقبالك يا رب

لا يا عم موش بفول على الزعيم ولا حاجة الرحمة بتجوز على الحى و الميت
ربنا يرحمه بجد من اعماق قلبى ...لانه محتاجها قوى الدعوة دى و هو رايح يقابل رب كريم ..

Anonymous said...

الف الف مبروك يا بسوم
بورك لك في الموهوب وشكرت الواهب ورزقت بره وبلغ اشده
ربنا يبارك فيه يارب ويجمعك به وبزوجتك عن قريب ان شاء الله
وربنا يقر عينك باولادك ويكونوا من حفظه كتاب الله ويكونوا من الصالحين المؤثرين في نهضه هذه الامه
بس نفسي أعرف شعورك الان ..الولاد كبروك يا باسم ولا لسه القلب شباب

سامر said...

الف الف مبروك يا بسوم
بورك لك في الموهوب وشكرت الواهب ورزقت بره وبلغ اشده
ربنا يبارك فيه يارب ويجمعك به وبزوجتك عن قريب ان شاء الله
وربنا يقر عينك باولادك ويكونوا من حفظه كتاب الله ويكونوا من الصالحين المؤثرين في نهضه هذه الامه
بس نفسي أعرف شعورك الان ..الولاد كبروك يا باسم ولا لسه القلب شباب

سامر

عمر أفندى و أبووه said...

ربنا يكرمك يا سامر و عقبال ما تخاوى لينا انشالله

سامر انا موضوع الكبر و الصغر ده موش بيقلقنى انتا عارف بس احساس المسئولية عن تربية جيل جديد هو اللى زاد عندى و خوفى من المستقبل و تأثير فساد المجتمع عليهم هو اللى راعبنى...كلام كبير بس انتا سألتنى عن شعورك

و نهاية ...هو يعنى اول ولا اخر عيل يا عم سامر ...لسه الجايات كتير انشالله

Anonymous said...

الف مليوون مبروك يا باسم وحمد الله علي سلامه علي بيك وحمدالله علي سلامه ام علي وربنا يباركلك فيهم ويرزقك برزقهم وتربيهم تربيه اسلاميه زي مانت بتحلم بكده

ابو جودي

Anonymous said...

Hi Bassem,
Alf Mabrouk!
Inshallah yertraba f 3ezak!!
w 3oabal lil Amira inshallah!!
Ha tsemeha eh ba2a????
Waiting for Ali basha pictures!!
Rabena yhafzhoum inshallah!!
Omar& Ali, you must know that you have a Moroccan anty:)
Asmaa

عمر أفندى و أبووه said...

Princess Asmaa

Miss u ya afandem , how is france and morocco as well

thanks for your sweet words and 3o2balek ya oustaza....

el amira lesa later will decide inshallah but i will keep u updated ...:)))

عمر أفندى و أبووه said...

ابوجودى

جزاكم الله خيرا يا بوب و عقبالك انشالله قريبا

saher said...

الف الف مبروك ياعم باسم بورك لك فى لموهوب وشكرت الواهب ورزقت بره وبلغ اشده لن شاء الله
وابدا تعليقى على جزئين جزء ليك ياعم باسم وجزء ليك يا على بيك
اولا تعليقى ليك ياباسم انت عرفت منين ان 2029هيكون البيه الله يرحمه انا اشك
تعليقى ليك ياعيلوه
اولا انا بحبك قوى وعلى فكره انت فترة حمل ماما فيك كانت اكتر فتره قربت فيها لبباك واكتشفت انى بحبه فى الله قوى لانه بحد شخصيه لذيذه قوى ياريتك تبقى زيه لا لما ققولك خليك احسن منه وياما كنت بعدى عليه بعد ما نخلص شغل ويقعد يقولى انه نفسه يبقى جمب مامتك وهى حامل فيك وانا اصبره شويه ولكن اهيه عدت الايام ونورت الدنيا بحالها وما اسرع الزمن وكمان بقى عندك عشرين سنه مبروك ياعم
ثانيا اناروحت انا وبباك عمره قبل ولادتك باسبوع ودعيتلك هناك انا وبابا بالادعيه الى بابا كتبهالك فى المدونه دى ده حتى انا فاكر الزمان والمكان عارف ليه علشان انا بحبك كنا ياسيدى على الصفا والمروه فى المسعى الى فى الدور التانى فى الشوط الخامس اوالسادس ودعينالك بالدعاء ده غير ادعيه تانيه كتير لاننا كنا سمعين شريط ادعيه فى العربيه قبل ما نوصل على طول
ثالثا مع انك جيت فى ظروف مش كويسه زى ما بابا بيقول يعنى بابا مكنش جمب ماما وانفلوانزا الخنازير والخ بس انت حظك حلو عارف ليه علشان بابا عملك عمره مخصوص قبل ولادتك باسبوع مش كده وبس ده حتى انت جيت ونورت يوم عيد المسلمين يبقى حظك حلو ولا لاه
رابعا انا مش عايزك تبقى اهلاوى بالوراثه شجع النادى الى يعجبك يعنى نقى الى انت عايزه حتى لو مش عايز تشحع كوره زى عمو سامر انت حر احنا عايزين نربى حيلكم ده على الحريه ماشى ياعيلوه
خامسا عموما ياعيلوه وحشتنى جدا انت وزياد اخوك الى شرف قبل منك بواحد وغشرين يوم مع الف سلامه وسلامى لكل الى عندك وعقبال ما نكتبلك وانت بتم عقدك التلاتين

ihab said...

بورك لك في الموهوب وشكرت الواهب ورزقت بره وبلغ اشده
أخي الحبيب باسم
مبارك عليك وصول ابنك علي إلي الدنيا
وأنا فعلا سعيد أنك مهتم تعلمه أشياء كتير علشان يبقي إنسان له قيمة
إنسان عارف ربه كويس وعارف حقوقه وواجباته
وكنت عايز أقترح عليك حاجة
زهي إنك زي ما حتجتهد إنك تخليه يحفظ القرآن
اجتهد كمان أنك تخليه يفهمه
وده أهم بكتير من الحفظ
أنا نفسي ولادنا والجيل الجديد يطلع يحب أنه يكون فاهم أكتر من إنه يحب إنه يكون حافظ

ويارب يقر عينيك بعلي وعمر ويكونوا خير سند ليك في الدنيا والأخرة

إيهاب دره

عبدالمنعم محمود said...

مبرووووووووووووووووك يا أبو علي وعمر
طيب الأول كان عمر أفندي امال ده علي بيك الكبير
انا عارف نوياك في تغيير التاريخ من زمان يا باسم
بس عموما ألف مبروك وربنا يبارك لك فيهم ان شاء الله

mohamed.sorour said...

الف مبروك يا أبو عمر و ربنا يبارك لك في عمر أفندي و علي بيك و عقبال ما تجيب رفيده و يجعل ايامك مباركه أنت و الاسره الكريمه. وترجع من غربتك بألف سلامه.

محمد جادو said...

ألف ألف مبروك يا بيسو ويتربى فى عزك إن شاء الله
على فكرة لما أنت سميت الأولانى عمر قلت فى نفسي إن شاء الله هسمى أول مولود ذكر على ,ولكن برضه سميت التانى على مش عارف أعمل فيك ايه,على العموم ماشي هعديهالك المرادى عشان ماكنتش تعرف, و أنا مستنى عيد ميلادك بفارغ الصبر عشان ألحق المرادى .
ألف مبروك مرة تانية وأشوفك يارب على خير دايماً إن شاء الله

عمر أفندى و أبووه said...

ساهورة

موتشكرين يا باشا على الكلام الجميل ده و بجد كانت نعم الصحبة فى هذه العمرة و كنت خير رفيق فى السفر و جزاكم الله خبرا على هذا الكلام

ايهاب

ربنا يكرمك و عندك حق مليون فى المية نحن امة ينقصها فهم...فهم لدينها فهم لغايتها فى الحياة فهم لعقيدتها فهم لاسلوب معيشة عندما يتحقق الفهم تحدثالقناعة و عدم التكالب على الدنيا و يعم الاستقرار و راحة البال

منعم

عقبالك يا معلم و تجيبلنا ميدو مشاكل صغير كده يقرف فينا برضه و يعملنا دوشة وصداع دايما.

سرور

تسلميا معلم و ربنا يباركلك فى فرح بنتك و تخاويها قريب انشالله

جادوون

اى خدمة فكر بس انتا وهتلاقينى ظبطك و لاطش منك المصلحة وقتى و مسمى اللى هتتمنى تسميه ...انتا عارفنى مسيطر دائما...اخبار هنا بنتك ايه؟؟ربنا يخليهالك

الكواكبي said...

الف الف مبروك يا باسم وبعد عمر افندي وعلي بك الكبير تجيب لنا سعد باشا ومش بعيد ربنا يرزقك كمان ببكباشي عامر او جمال مش هاتفرق قوي
انا ملاحظ حاجة . . هو انت كاتب له ايميل ليه لإبنك بعد 20 سنة!! هو انت لسه مشتغل مامته ومفهمها انك بتشتغل علشان تجيب فلوس وكده وسايبهم في المنصورة؟ يا بن اللعيبة :) حلوة الفكرة دي انا باشجع اي لعبة حلوة وغرضي بس اني اهدي النفوس
حاجة تانية لاحظتها . . انت الخطاب الديني عندك اصبح قوي . . انت بقيت سني ومشيت مع الناس اللي بتبوس في الكتف؟ ربنا يهديك يا عم :) :) بورك لك في الموهوب وشكرت الوهاب وبلغ اشده ورزقت بره

عمر أفندى و أبووه said...

اسلام بيه حامى حمى حقوق الانسان فى مصر و الجامعة الامريكية

واضح انك بتهدى النفوس ...و لما تسمع ام عمر منك الكلمتين دول على اللى شافنى فى المهنددسين من يومين موش شايف انها ممكن الخيط يكر و الموضوع يتكشف هههههههه

موضوع الناس اللى بتبوس على الكتف لا صدقنى على الاطلاق بس دى توابع رحلة السودان المباركة لكن هنا موش عايز اقولك خلينا ساكت احسن

Anonymous said...

بورك لك فى الموهوب وشكرت الواهب ورزقت بره وبلغ اشده
ربنا يباركلك في على وعمر ويرزقك بابو بكر وعثمان ويارب تقفل ال10 المبشرين بالجنه كلهم
ويارب تحقق امنيتك ويختموا القرآن فى سن صغير
وترجعلهم بالسلامة يارب
آمين
طارق عبد الجواد

Anonymous said...

alf mabroook ya basem.. we 7amdela 3ala salemt shaymaaa2 we 3ali
rabena y5aleehom we ybarek feehom we tshofhom regala add el donya isa homa we zayoooda
Tant SoZy

عمر أفندى و أبووه said...

رووقة

ام عمر هتكرهك موووت علشان موضوع العشرة ده...بس عقبالك انتا كمان يا باشا

SoZy

thanks we 3o2balkoum ya afandem inshallah we yekoun qareban ya rab...

همسة ايمان said...

الف مبروك لحضرتك يا ا\باسم ربنا يخليهوملك يارب ويطلع كمان احسن من الى حضرتك بتحلم بيه ونورت ياعلى ياسكر الدنيا كلها وبجد عندك ماما طيوبة وعسل خالص وبابا كمان وعمورة اخوك الى زى السكر ماشاء الله اسرتك جميله اوى وانت ان شاء الله هاتبقى اجمل
وربنا يبارك لحضرتك فيه يارب ويبقى ابن بار وصالح وخادم لدينة وامة نبيه ويصلح من حال الامة يارب ..آلاء

عمر أفندى و أبووه said...

يا استاذة آلاء

نورتى مدونتنا المتواضعة ..دى اولمرة تعلقى عندى صح ؟؟

جزاكم الله خيرا كثيرا على الكلام الجميع ده و عقبال اللى بالى بقى انشالله و يكون عن قريب بإذن الله و ان يرزقه الله الذرية الصالحة من جموع الصحابة و ليس الخلفاء عمر و على بس...

فين بوستاتك يا شاعرة يا كبيرة؟؟؟

أبوعمر و علي

عبد الرحمن خليل said...

السلام عليكم يا باشا

بورك في الموهوب وشكرت الواهب وبلغ أشده ورزقت بره

وسلام خاص من مروى ليك ولزوجتك
وربنا يطمنا عليك وعلى زوجتك وعمر أفندي وعلي بيك


ويا رب تقدر تحقق معاهم كل أمانيكم


آآآآآآآمين


وادعيلنا عشان احنا في انتظار مولود قريبا جداً

Khaled El Haddad said...

1000 Mabrook Ya BESOO we rabenaa yeberelk ffeh ,

anaa tab3n kont ma3ak we antaa 2a2an MOOOOT 3ala om omer, rabena ye7`lekoo leba3d

Khaled El Haddad

عمر أفندى و أبووه said...

عبدالرحمن باشا خليل

الف الف مبرووووووك و ربنا يتملكم على خير يا رب و تبقى خير ذرية صالحة بمشيئة الرحمن

جزاكم الله خيرا انتا و مروى على التهنئة الرقيقة

khalooda

thanks ya ma3alem for ur support during these hard times ....u r the closest one to me alwayes whereever u are....thanks again.

Basem

Anonymous said...

"حالاأتك برجالاتك
يارب يا ربنا تكبر و تبقى قدنا"

السلام عليكم
الحقيقه أنا سعدت جدا لما عرفت خبر وصول على بك بالسلامه
1000 1000 مبروك يا "أبو عمر و على" و ربنا يطرح فيهم البركه و فيك و يرزقك برزقهم و يجعلهما سببا لدخولك الجنه

مش عارف أقولك إيه بس يا ريت تعمل العقيقه فى الرياض و خلاص و أمرنا لله و ياريت قبل ما يخلص شهر 6 علشان ممكن أكون سافرت
هاهاهاهاهااها

شد حيلك و بتمنالك كل التوفيق و النجاح و السعاده فى الدارين

و أشوفك على خير
أنس

sherif said...

السلام عليكم
نورت الدنيا كلها يا أبو على
يارب تكون زى على بن أبى طالب رضى الله عنه
إوعى تخلى حد يقولك على بتخفيف الياء ولكن على بشديد الياء
عمك وعم أبوك
شريف الدكرورى(أبو مريم)

Anonymous said...

طبعا اتاخرت عليك فى التهنئة ولكن الظروف فرضت نفسها يا حبيبى ..من جنوب الوادى اقدم لك ارق التهانى بقدوم السيد على بك الكبير ويا ريت تجيب لنا صيدناوى المرة الجاية يا باشا ..ألف مبرووك وبورك فى الموهوب وشكرت الواهب ..ولك منى خالص الهتانى وارق التحيات

حافظ
الخرطوم

حسام خالد said...

الف مبروك يا ابو عمر يتربو في عزك ربنا يباركلك فيهم ويجعلهم الخلف الصالح إن شاء الله

حسام خالد said...

انا اسف ان التهنئةبس انا مكنتش اعرف وكمان الاتصالات مع معظم الاصدقاء تقريبا بتكون من السنة للسنة يعني في الاجازة بس عموما الف مبروك مرة تانية وربنا يبارك فيهم وتشفهم احسن ناس