Saturday, April 25, 2009

Benzoxazone


Benzoxazone

ده موش اسم دواء ولا حاجة ..لا دا اسم مشروع التخرج بتاعى فى الكلية اللى حصلت فيه على تقدير جيد جدا و الحمد الله رب .العالمين...تخيلوا؟؟؟ وده شكل المركب على فكرة موش مبالغة منى ...لا بجد ده التركيب العلمى له...تحسوه بسيط و مفهوم و يتفهم و هية طايرة كده صح.اه و الله كان مشروع التخرج بتاعى اللى اشتغلت عليه اكتر من ثلاث اشهر و عملت بحث من 40 صفحة فى تكوين هذا المركب العجيب و ماذا نفعل به و ليه وازاى و كده ....البنزواوكسازون
...
طبعا موش عايز اتكلم فى السياسة بقى و انا عملت ايه بيه و لو حتى كنت رجع بيا الزمن و وقفت سنة 2000وقررت اعمل فى الكيمياء و ابقى احمد زويل زى ما كان الدكاترة بيقولنا انتم كل واحد فيكم يحلم انه يبقى زى زويل ...اصل زويل كان اياميها لسه مكتشف الفمتو ثانية و فى عزه يعنى...وطبعا احنا كلنا كنا فى البكالوريوس بنحلم بيوم التخرج اللى هنروح نضرب فيه كرافته و نشتغل مناديب دعاية فى شركة ادوية و لو وسعت مننا فى الحلم شوية كنا هنحلم ان فايزر هتقبلنا و هنستلم عربيات شاهين بقى و ننحل فى الشوارع زى كل صيادلة مصر...
بس للأسف عملنا كلنا انترفيوهات فى فايزر و اترفضنا كلنا والحمد الله..فايزر عايزه صيدلة و بيطرى و احنا كنا علوم...
فا روحنا ذكرنا و درسنا كمبيوتر وروحنا نشتغل مبرمجين بقى و كان حلم عندى مثلا انى اشتغل بعد سنة كاملة من الدراسة للبرمجة و الحصول على شهادة عالمية انى مبرمج اوركل معتمد..كان الحلم ان اشتغل فى شركة اسمها اى دى اس و لكن نفس سبب الرفض مع اختلاف الكليات و هو انك علوم و احنا عايزينه حاسبات او هندسة...طيب ذنبى ايه بقى انى بتاع اوكسازون يا جماعة...ذنبى ايه انى من كلية العلماء موش بتوع سوق العمل ..علوم كيمياء ده يروح يعمل ايه يعنى ...يروح النار ولا ايه.



حاولنا تانى و تالت و رابع وبدور بعد مرور السنين على الدفعة الثلاثين من كلية العلوم جامعة الازهر دلوقتى بلاقى اللى لسه على تواصل معهم فيهم نسبة 3% فقط التى تعمل بالكيمياء او فى مجال متناسب مع الدراسة يعنى و الباقى كله فيهم بقى مدير مبيعات فى شركة كمبيوتر و مدير تسويق فى شركة اتصالات و صاحب سلسلة محلات موبايل و صحفى و مندوب مبيعات لاجهزة لاب توب و جرسون فى مطعم وصاحب شركة عقارات وغيره و غيره و غيره


و الحمد الله رب العالمين على نعمه تجد فى هذه الاوقات لا نتذكر اخر مرة ذكرنا فيها المؤهل امام الناس ..يمكن لمراتى و انا بتجوز من اربع سنوات كانت اخر مرة ذكرت المؤهل و بالنسبة لى دى كانت اهميته .. فخبرتك هية الاهم و قدراتك هية الاسهل لتوصيف ما تسطيع عمله فى سوق العمل...



نصيحة اخيرة و عبرة من تجربة البنزواوكسازون ...اتخرج و حدد مسار هتمشى فيه و ركز واسعى و اتبهدل و اكيد ولا شك انك ستصل لمبتغاك و يجب ان يكون يقنينك بالله عالى انه سيوفقك...و لكن الله تعالى قال لستنا مريم و هزى اليك بجزع النخلة تساقط عليك رطبا جنيا يعنى كانت لازم السيدة مريم رضى الله عنها تهز الجزع علشان الرطب ينزل ...لازم تاخد بالاسباب وتسعى بكل ما اوتيت من قوة و ادوات يا صديقى علشان ربنا سبحانه و تعالى يباركلك فى دعائك و تبتلك و طلبك للرزق محتاج تتعلم كمبيوتر يبقى اتعلم محتاج لغة روح اتعلم محتاج تزيد فى الوزن اتكل على الله و زيد محتاج تخس و تنزل فى الوزن لم نفسك فى الاكل شوية وانزل محتاج تتعلم صنعة محتاج تتعلم السواقة لازم تجرى و تسعى و تاخد بالاسباب و فى النهاية الله الموفق.


أبوعمر




2 comments:

Anonymous said...

يااااااااااااااه يا باسم ,
نفس التاريخ مع إختلاف بعض المسميات يعني مشروع التخرج كان Chromotography.
وإتعلمت جرافك مش اوراكل بس اتعلمته وانا لسه فى الكلية.
ودفعتي بقى ميديكال رب طبعا وشوية شغالين مراقبين جودة وناس كملت كيميا بس ربنا معاهم بيكحوا تراب والله.
اللهم ارحمهم يا رب
خالد حسن
الدفعة 32
نفس القسم ونفس الكلية

سامر said...

باسم صديقي أو بسوم كما أحب أن اناديه
صديق عزيز لاتملك عند صحبته الا أن تحبه
وتحب كل تفاصيله

روح مرحه ..طموحه..تقفز دائما بين ضلوعه فتحرك في كل من يعرفه حب الحياه

باسم الذي عرفت :

باسم في الثانوي: ممثل رائع ومنشد مع الكورال.

باسم في الاجازة الصيفية:اراه يوميا في المسجد وتحفيظ القران ومبدع في الاشراف علي الرحلات.

باسم في الجامعة:الحيوية وخدمة الدين ومذاكرة اخر 3 اسابيع

بعد التخرج مباشرة:مدمن نت لدرجه عدم التواصل الا عبر الماسنجر

بعد عمله في A.R.T :لازم احكي لكل أصحابي إن أعز أصدقائي يعمل هناك.

أثناء عمله في I2:فترة بعد وغربه واراه في صلاه العيد ويبعت عديه امي معايا.

باسم في السودان:فترة ايمانية قوية يمتد أثرها حتي الان.

باسم الزوج: محب لزوجته جدا وينتظرها بفارغ الصبر يابخت زوجته به.

باسم الأب:مثالي لأقصي درجة .

باسم بالسعودية:قمه التعايش مع المجتمع والظروف بأقصي سرعه.

باسم في كلمة : الاصرار .

باسم : اني أحبك في الله