Saturday, December 13, 2008

رحاب القارى



رحاب القارى فى ذمة الله


زميلة عزيزة من راديو و تليفزيون العرب ...عملنا سويا من2001 الى 2005 صدمت كثيرا عندما جاءنى تليفون من نور الزينى بالخبر امس..حزنت انى خارج البلاد ولم استطع حضور الدفن ولا مراسم العزاء حيث انى غادرت القاهرة امس فقط عائدا الى عملى .رحاب اللى كانت البسمة لا تفارقها ...و كانت فى ريعان شبابها....رحاب كانت سعودية الجنسية مصرية الدم و الروح ..رحلت عن دنيانا امس الجمعة..خلاص أصبحت فى عالم اخر..قد ايه الدنيا دى ملهاش قيمة...قد ايه كلنا ممكن نلاقى نفس مصير رحاب فى لحظة و يغلق ملف عمرنا ...ماذا قدمنا ؟هذا هو السؤال ...هل استعدينا كويس للقاءالله؟ هذا هو لب القضية...تفتكروا لو فعلا حاطين فى دماغنا اننا ممكن كنا اى حد فينا مكان رحاب دلوقتى هل هيبقى ده حالنا من النسيان و اللامبالاة اللى كلنا واقعيين فيها...من تركيزنا بس على لقمة العيش من مشاكلنا التى لا تنتهى فى الحياة و مع كل الناس.


يمكن كلامى تحسوا انه عاطفى بسبب اللحظة و كلها يومين و هترجع ريما لعادتها القديمة و يا دار ما دخلك شر و هية دى طبيبعة النفس البشرية و الانسان اللى اتسمى من النسيان .


رحمك الله يا رحاب و ادخلك فسيح جناته ...ابتلاك الله بالمرض فى اواخر ايامك ليكون تكفير لذنوبك و ابتلاء فى الدنيا يمنع عنك ابتلاء الاخرة ان شاء الله..


لم نتقابل منذ اربع سنوات تقريبا و للأسف لن نلتقى مجددا فقد خرجتى بلا عودة امس و اتمنى من الله ان يحسن خاتمتنا جميعا و نلحق بكى فى الجنة .


ولا يسعنا فى النهاية الا ان نقول


إنا لله و إنا إليه راحعون

9 comments:

AbdElRaHmaN Ayyash said...

ربنا يرحمها ..
و يصبر أهلها

Anonymous said...

ربنا يرحمك يا رحاب . اللهم احشرها مع النبيين و الصديقيين و الشهداء و الصالحين و حسن أولئك رفيقا .
انا لله و انا اليه راجعون

هاني عفيف

Anonymous said...

ربنا يرحمك يا رحاب . اللهم احشرها مع النبيين و الصديقيين و الشهداء و الصالحين و حسن أولئك رفيقا .
انا لله و انا اليه راجعون

هاني عفيف

Anonymous said...

allah yer7amek ya rehab..i just met you few times.. but really loved you and felt sad losing you ..

Rabena yer7amek

May El-Hosseiny

Anonymous said...

بصراحة كده الصورة دى مش كويسة فى حقك ولم يكن هناك داعى لوضعها ..يا ريت تفصل شوية وتتميز فى قالبك وليس عيبا أن يكون لك سمت خاص بك لا تتنازل عنه ...افصل شوية يا عمدة ...ربنا يرحمها ويرحم الجميع

عمر أفندى و أبووه said...

اخى الحبيب مجهول الهوية

جزاكم الله خيرا على نصيحتك

انا اوافقك الرأى انه ليس عيبا ان يكون لى سمتا خاص لا اتنازل عنه و كذلك متوافق معك فى ان يكون لى قالبى و لكنى لماذا لا يكون قالبى مختلف عن قالبك و قالب غيرنا و قالب اخر و هكذا....هذه نقطة و النقطة الثانية امين يا رب فربنا يرحمها و يرحمنا جميعا

Anonymous said...

لية الفلسفة اللي ملهاش لازمة يعني اية مش لازم نكون شبة بعض في كل حاجة هل علشان نكون مخلتفين نتجاوز لهذه الدرجة ( لاتفعل إنك إمام ينظر إلية ونتمي لها الرحمة والمغفرة الله يكرمك شيل الصورة وكفاية كدة انت ما تقدرش تشيل صورة واحدة في محفظتك عارف لية علشان غلط وتخاف من مراتك لتزعلك خلص الكلام

عمر أفندى و أبووه said...

صديقى مجهول الهوية...موش عارف ليه مبتكتبشى اسمك...بس موش هية دى مشكلتى مشكلتى انك متعصب و و اسلوبك اعلى من مستوى الحدث فى نظرى ...لازم تفهم ان اللى انتا شايفه تجاوز الى هذه الدرجة على حد قولك انا معرفشى الدرجة دى كام عندك انا يمكن الدرجة عندى اقل يا سيدى ...انا موشضوع الصورة موش هو مشكلتى و اشيلها او اسيبها موش قضية كبيرة بالنسبة لى...بس انا موش متقبل اننا نسمع بعض للأسف

و بالنسبة بقى لموضوع مراتى مين قالك انى مقدرشى اشيل صورة فى محفظتى و ان كان دى نقرة و دى نقرة ....بس موضوع مراتى و مدى تفهمها دى حاجة تخصنى و لو خايف احط صورة فى محفظتى على حد قولك من باب اولى موش هحطها على النت للناس كلها بما فيهم مراتى يتفرجوا عليها و يشوفوها...انا دا اخر تعليق ليا على الموضوع ده معلشى علشان مياخدتشى اكتر من حجمه و انا برد عليك احتراما ليك ليس اكثر

Lamia Gouda said...

الله يرحمها يا رب... كان قلبها طاهر وأخلاقها جميلة... هانم بكل معنى الكلمة... صديقة وزميلة وأخت وبعشر رجالة... من فضلك لو عندك صور تانية إبعتهالي. أنا مش مصدقة التعصب والجهل والسطحية حول موضوع الصورة. أصحاب العقول في راحة. معلش
شكراً. لمياء جودة