Thursday, May 29, 2008

ابنى بيتك


مشروع كان فكرة فى جورنال فى شهر فبراير 2007 تحت عنوان برنامج السيد الرئيس الانتخابى لدعم اسكان الشباب محدود الدخل ...و بما انى من هذا الشباب و ينطبق على هذه الصفة فلذلك فقد استرعى انتباهى الاعلان و بدأت اقرأ التفاصيل...

قطعة ارض 150 متر لكل شاب (زى الفل الكلام ده) تبنى عليها 67 متر بس (موش زى الفل قوى) بس يجوز بما ان الباقى هيبقى حديقتى الغناء و ال67 متر دول انا افنن فيهم براحتى اعملهم فيلا محترمة من ثلاث ادوار و ادلع نفسى بقى بحمام سباحة و صالة جيم فى البدروم و روف ببرجولة على السطح و كلام كده يخليك تحلم و تحلم و تحلم....و لكن انتهت الشرط بكلمة (وفقا للتصميمات المقدمة من قبل الوزارة) اتارى الوزارة هتفرض علينا التصميم اللى هنعمله كمان....

التقديم متطلباته بسيطة فمقدم تعاقد الف جنيه و الباقى على 10 سنين و الحكومة هتدينا دعم 15 الف جنيه للبناء (ربنا يخليها لينا) بعد ما نطلع بأول دور و الشرط الاهم بقى ان لازم نطلع بأول دور ده فى اول سنة و إلا تسحب الارض....

كمان فى نقطة مهمة ان القطع الممنوحة للشباب فى المشروع ده 20 الف قطعة فقط مقسمة على المدن الجديدة فى (اكتوبر-بدر-العاشر من رمضان-الصالحية الجديدة-اسوان الجديدة...)

و تقدمت بالفعل و شحذت همم اصحابى كلهم بلا استثناء للتقدم لدرجة انى كنت عامل زى مندوب المبيعات فى الشركة عندى اللى بيسوق للمشروع و بكتب الطلبات بتاعته فى ورقة لكل من يريدها ...تحس انى ليا كوميشن فى الموضوع مما اوحى لبعض زملائى فى المكتب بجد انهم يزعلوا منى ...عارفين ليه...علشان قالولى الراضى اللى هتطرح فى المشروع 20 الف بس و انتا كده خلصتهم فى اى تو ...خف شوية و لم الدور علشان نلاقى حاجة ناخدها...طبعا دول بينتقدوا و خلاص و لا حتى هما شخصيا قدموا ولا حاجة..

ابويا الله يرحمه فرح قوى بالخطوة انى هيبقالى بيت ملك و كده ...بس للاسف توفاه الله فى نفس الشهر قبل ما يشوفه .

فين يا جماعة بقى مفيش لا حس ولا خبر...و يمر الشهر تلو الشهر ولا حس و لا خبر...خلاص كده مات الكلام ...ايوة تقدر تقول كده ...و الألف جنيه..بح ...و طبعا لا اخفيكم سرا بدأت احسب ان فى 105 الف اتقدموا للمشروع و دفعوا 105 مليون جنيه يعنى الحمد الله برنامج السيد الريس تم ضخ موارد ليه من جيب الشباب الغلبان تقدر ب 105مليون جنيه..

و سافرت السودان بحثا عن عمل ...و فى شهر يوليو الماضى وصلنى خطاب على البيت بأنه تم الموافقة على طلبى لارض ابنى بيتك....يا منتا كريم يا رب...انا بعض الظن اثم ....الناس دى زى الفل ...و ربنا يخليك لينا يا ريس...و موش كده و بس دا خبر فى الجرايد ان الريس كمان وافق على ان اللى قدموا كلهم ياخدوا اراضى موش قرعة بين عشرين الف بس زى ما كان متفق عليه...خلى الشباب يتجوز و يتستر...

بعد كده ...تمر الشهور تلو الشهور و برضه لا حس ولا خبر و كل شوية نتصل نسأل يقولولنا لسه...لما يجيلك الجواب التانى...


موقع مشروع ابنى بيتك فى 6اكتوبر



فى خلال هذه الشهور انا احساسى بقى مختلف...فى بيت بقى ممكن يوجد عن قريب...فى حلم ممكن يتحقق عن قريب...و لذلك بقى ليا اهتمامات تانية غير طريقة هروب الحضرى لسويسرا و اختيار رئيس جمهورية للبنان و المعارك الضارية بين الحركة الشعبية و قبائل المسيرية فى ابييى فى جنوب السودان....يعنى بقيت بهتم اعرف هو سعر طن الحديد وصل كام دلوقتى...و طن الاسمنت وصل كام ...و مفيش مانع اتابع خبر جواز احمد عز بشاهيناز النجار ما هى جوازة اه مليش فيها قرايب بس ملمسه برضه مع سيخ الحديد اللى هستخدمه فى بناء بيتى للأسف الشديد...

تخيلوا مثلا انى عمرى ما كنت اتخيل انه هيجى اليوم اللى انزعج فيه انزعاج شديد بسبب زيادة اسعار المازوت بنسبة 100% لانى اصلا مكنتش اعرف يعنى ايه مازوت ولا بيستخدم فى ايه و لكن عرفت انه ده بالتبعية رفع سعر الطوب جدا و الطوب ده زى جوازة شاهيناز بالظبط ملمس مع بيتى اللى هبنيه....

السنة اللى انا قعدتها فى السودان دى بقى تحس ان مصر كانت مستنيانى اخرج منها بفارغ الصبر علشان تعلى كل الاسعار بشكل جنونى ....و تحصل الازمات الاقتصادية و العيش و البنزين والحديد و الاسمنت وغيره و غيره...لدرجة انى مكنتش مصدق التقارير بتاعت ازمة العيش دى لحد ما واحد صاحبى محامى ساكن فى شارعنا قالى انها بالفعل ازمة فى المنصورة عندنا...

طيب الحديد وصل 6500 للطن يا رجالة فين الجواب التانى فين الارض فين اى حاجة....


صورة ضوئية لاعلان الاهرام بتاريخ20 ابريل 2008 الماضى


ظهرت الحكومة اخيرا فى ابريل الماضى و قالتنا يلا يا ولاد هنسلمكم الاراضى علشان تبدأوا ....الله اكبر

بس هنسلم بالهداوة موش يوميا عايزين سربعه....بالهداوة ازاى يا حكومة دا الحديد وصل 6500 قصدى 7000 ...ماهو فى خلال كلامنا الاسعار متقفشى تستنانا...قالولنا اه بالهداوة ...يعنى هنسلم شوية الشهر ده و شوية الشهر الجاى و شوية اللى بعده و هكذا لحد ما نخلص اخر واحد فيكم فى 2010 ...


صورة محضر استلام ارض لاحد المستفيدين فى مدينة العاشر من رمضان



تخيلوا ...اه و الله العظيم فى 2010...و مع اول ارض اتسلمت لاول شاب واعد من شبابنا الحالم بالبيت وصلنا لسعر الطن 8000 جنيه بالصلاة على النبى...متسمعونى الصلاة على النبى..تخيل بقى لو انا واحد من اللى هيستلموا فى 2010 ...تفتكروا هيبقى الطن بكام و هبنى بكام ... اه الحمد الله ان الناس زمايللنا فى بدر و العاشر و السادات بدأوا يستلموا بس فين اكتوبر بقى فين بقيت الناس







تخيلوا الدور كان على حسبة التقديم كان هيكلفنا بتاع 35 الف جنيه او 40 الف على اكتر تقدير ...دلوقتى دا و انتا رافع ايديك موش هيقل عن 75 الف جنيه...الدور موش البيت و دلوقتى موش فى 2010 ....





شباب ابنى بيتك صرخ...شباب مصر اللى كان بيحلم قرر انه ميتنازلشى عن حلمه ...علشان كده انشئت جمعية اهلية اسمها جمعية ابنى بيتك ...جميعة لا تهدف الى ربح جميع اعضاءها و مجلس ادارتها و العاملين و القائمين عليها من الشباب اللى بيحلم ببيته فى المشروع...و عملتلها جروب على النت و بدأنا نعرف بعض بقى ونفكر مع بعض و نوحد افكارنا و مطالبنا...انا اه فى السودان بس عرفتهم عن طريق النت ببحثى عن كلمى ابنى بيتك على جوجل و اشتركت و شاركت بأفكار معاهم ...و دلوقتى بقى لينا مجتمع جديد اسمه ابنى بيتك بنبعت و نستقبل اكتر من 35 ايميل يوميا تقريبا.


صورة للإقرار اللى بنمضى عليه عند استلام الارض



الجروب ده فى ناس مختلفة الافكار و المدن و المستويات ...ولاد و بنات...يجمعهم حلم واحد و هو حلم ابنى بيتك...

الجروب ده بيفكر ازاى نتغلب على المشاكل اللى بتقابلنا دلوقتى و اللى نقدر نلخصها فى التالى:

تأخر تسلم الارض و بالتالى استمرار حرب زيادة الاسعار اللى ملهاش سقف و بالتالى كل يوم تأخير بيصعب مهمة تحقيق الحلم و القدرة على البناء.

التغلب على مافيا تجار الاراضى و سماسرة التسقيع اللى بيلعبوا على الشباب علشان يبيعوا الاراضى بتاعتهم دلوقتى...

التغلب على مشكلة الحديد بأننا نفكر فى افكار مبتكرة للبناء بعيدا عن الحديد زى فكرة الحوائط الحاملة اللى تبناها مشكورا
المهندس ممدوح حمزة و اتبرع انه يجهز التصميمات الخاصة بيها مجانا خدمة للشباب و للمشروع.




المهندس ممدوح حمزة الاستشارى العالمى مع الاستاذ محمود العسقلانى من مواطنون ضد الغلاء فى اجتماع مع اعضاء الجمعية



مواجهة المقاولين اللى اكيد هيلعبوا بينا لما يلاقوا فوق ال 90 الف شاب عايزين يبنوا بيتوهم فى نفس الوقت و مضطرين علشان الارض متتسحبشى منهم...









  1. و المطالب اللى متبنياها الجروب برضه محددة الى حد ما علشان مجزمشى او اتكلم بإسمهم و لكنها اهم المطالب تتمثل فى الاتى:

    ان تتبنى الوزارة فكرة البناء بالحوائط الحاملة كبديل للبناء بالخرسانة المسلحة اللى بتكلفنا كم حديد كتير جدا و بالتالى نخفض تكلفة البناء...

    هذه الحوائط الحاملة بتاخد جزء اكبر من المساحة و لذلك نأمل بأن يزيد مساحة الارض المسموح بالبناء عليها الى 90 متر بدلآ من المساحة المسموح بها حاليا لتعويض الفارق...

    زيادة الدعم من 15 الف الى 30 الف جنيه جيث ان الاسعار حتى الان زادت الى اكثر من 120% و بالتالى فمن المنطقى زيادة الدعم الى على الاقل الضعف.

    زيادة المدة المسموح بها للبناء من سنة الى اكثر من ذلك

    سرعة تسليم الاراضى للمنتفعين
    .

    كل اللى له ارض فى ابنى بيتك او يعرف حد ليه ارض فى ابنى بيتك ياريت يشاركنا فى مجتمعنا الافتراضى على الياهو جروب من خلال اللينك ده

    http://groups.yahoo.com/group/ibnybetk

    الاشتراك فى الجمعية غاية فى البساطة... الامر محتاج فقط صورة البطاقة الشخصية وصورة شخصية وسداد اشتراك 20 جنية ورسم كارنية 5 جنية فقط لاغير او دفع مصاريف الاشتراك فى حساب الجمعيه فى اى فرع من فروع بنك الاسكان و التعميررقم الحساب هو 5020 /109411 بنك التعمير والاسكان - فرع الزمالك
    وتصبح عضو معنا وتتمتع بالمزايا التى تسعى الجمعية لتحقيقها باذن الله..

    الجمعية مقرها : شارع رقم 41 ش 28 من ش طلعت حرب- مدينة التحرير – امبابة

    و حروب الجمعية كمان على الفيس بوك على الرابط التالى

    http://www.facebook.com/group.php?gid=12732995010


ادعولنا بقى يا جماعة نحقق الحلم و نبنى بيتنا بجد و توقيعى على التدوينة دى هو توقيعى فى ايميلات الجروب اللى بدأت اشارك فيها بإيجابية بقالى فترة.

باسم الشربينى
من مستفيدى أكتوبر
الخرطوم-السودان

5 comments:

A.SAMIR said...

اهم حاجة انك تبني بيتك
مش مهم بكام
انما الاهم سنة كاااام؟
انا اتوقع على 2015
تحياتي

Anonymous said...

تبني .......هاهاهاهاها........عايز تبني........هاهاها.......والله انتوا عالم مسخرة...فاكر اعلان انسى ياعمرو...هو ده ردي الوحيد....ومتوليش يائس ومحبط ومش عارف ايه.....لان ببساطة ف 2010 دي تقريبا هنكون في المعتقلات او هاجرنا بره البلد...وسلملي على توجيهات الريس


Ahmed Samir i2

foxamr said...

انا برضو علي فكرة ليا واحد صاحبي واخد قطعة ارض زيك كده بس مش عارف عمل ايه بعد كده
بس ربنا يسهل
انا من رايي انك تبني البيت كده بالطوب اللبن عادي يعني المهم انك يكون ليك وضع يد و مسور القطعة باي حاجة لان اكيد الحوكمة مش مشترطة انك تبنيه بالحديد و الايمنت و كده يعني
يعني اعمل عبيط و ابنيه بالتصميم بتاعهم بس بمادك انت اللي تقدر عليها
اضحك عليهم يعني و طلعه عينهم

عمر أفندى و أبووه said...



a.samir

عندك حق و الله المهم سنة كام...و تخيل يا ابوحميد علشان يجهزورا الاراضى للتسليم بس حتة صحراء خدوا 3 سنين و برضه مصرين نبنى احنا البيت فى سنة حاجة غريبة و الله

ahmed samir i2

الظاهر كل اللى بيعلقوا هنا اسمهم احمدسمير بس

انسى ليه بس ....و 2010 دى موش بعيدة قوى دى تعتبر السنة اللى بعد الجاية و 2008 دى اتخطفت و الله و بقينا فى نصها فجأة و فين ايام ما كنا فى الجامعة و خايفين موش مشكلة الصفرين على الكمبيوتر بتاعنا من 8 سنين ...الايام بتحرى يا عم احمد و مفيش اسرع منها و لكن مين اللى هيكرز و يلحق يعمل حاجة فيها

foxamr

الحمد الله ان بقى في عمرو موش كله احمد سمير

مينفعشى و الله يا عمور لان الحكومة فعلا لازم نبنيلها بالاسمنت و الحديد اومال الراجل العريش ده يصرف على مراته الجديدة شاهيناز هانم منين ...و بعدين لو كده مكنشى حد غلب يا باشا دا علشان نفكر فى فكرة بديلة لازم الجكومة توافق عليها برضه

ربنا ياخد ولا بلاش خليها يخليلنا الحكومة لحد ما استلم الارض هههه

Anonymous said...

يا اخونا بالنسبة لبرنامج العاشرة مساء انا الى منزلة واسمى نادر