السلام عليكم و رحمة الله و بركاته
منذ فترة ليست بالقليلة لم ادخل حتى على الانترنت الا من خلال موبايلى لمتابعة ايميلات الشغل ليس اكثر ...ما يزيد عن 22 يوم بالتمام و الكمال لم ارى مدونتى على الاطلاق..و هو ده عيب المركزية فى الشغل و الفردية فى الاداء و ان كيان كامل يبقى قائم على فرد فاذا كان الفرد ده موجود يقوم البناء و اذا وقع الفرد انهار الكيان ...يعنى مثلا تخيلوا مصر من غير الرئيس مبارك ولا بلاش بدل متحصلوا ابراهيم عيسى...طيب تخيلوا مدونتى من غيرى هتبقى عطلانة و مفيش تحديث ولا يحزنون زى حالها الفترة اللى فاتت...طيب تخيلوا مجلس الشعب من غير احمد عز ولا فى موافقة ولا فى فلوس ولا فى حضور حتى من نواب الحزن الوطنى حتى... ولا تخيلوا النادى الاسماعيلى من غير يحيى الكومى ولا فيه لعيبة هتروح الاهلى ولا فى فلوس هتتصرف على النادى و زيه عبس بتاع الزمالك بالظبط...فا هية دى مشكلة المركزية و شخصنة المؤسسة فى فرد...فا معلشى علشان انا كنت بعيد عن الانترنت الفترة اللى فاتت فا المدونة كانت بعيدة هية كمان عن اى تحديث..
عقيقة عمر
عقيقة عمر افندى كانت الحمد الله ناجحة جدا و اشكر كل من حضر و اعذر كل من لم يستطع الحضور و اتمنى ان يرزقنا الله ذرية صالحة كتير و نعمل عقايق تانية كتير علشان نفرح تانى كتير...
كتير من الناس هتسأل زى ما سألوا فى التعليقات اللى على البوست اللى فات عن صور العقيقة و فى حد تانى سأل عن عمر بلبس العيد...و اود ان اقول انه نظرا لظروف ما المت بعمر افندى خلال الفترة الماضية لذا فسيتعذر علينا نشر صور جديدة له فى الفترة الحالية حيث انه للاسف الشديد منذ ما يقرب من شهرين و هو مريض بصورة مستمرة يخرج من سخونية على برد على كحة على التهاب رئوى على تلبك معوى على على على مما اضطرنا الى اتخاذ القرار بالتوقف عن نشر اى صور خاصة به الفترة القادمة حتى يتعافى تماما و ربنا يكرمه و يبعد عنه عيون الناس...و اللى متفق معانا فى القرار و اللى مختلف كمان معانا فى القرار يدلى يدلوه ويقول رأيه فى التعليقات و بدون خوف او تردد خلينا نتناقش..
عودة الى نفس الخرطوم
عدنا الى نفس الخرطوم و الحمد الله نفس حياة تماما و بدون اى تغير بس يمكن التغير الوحيد اللى حصل اننا قدرنا نعمل ريفريشمينت اللى هية بالعربى تجديد و نعنشة كده باجازة كويسة فى مصر فا راجع السودان نفسى مفتوحة للشغل.
الرابح الاكبر
لو فيكم حد بيحب قناة ام بى سى هيفهمنى لان ده برنامج دايت و انا دلوقتى بعمل دايت و ادعولى اخس بقى علشان عامل نظام قاسى الى حد ما و الله المستعان.
و زى ما اتفقنا خلاص المدونة دلوقتى مدونة ابو عمر افندى فقط وليست مدونة عمر افندى و ابوه زى زمان و ذلك حتى اشعار اخر.
ابو عمر افندى
4 comments:
أبو عمر
ألف سلامة على عمر باشا وياوم بالسلامه وينور الموقع بتاعه
أنا آسف لعدم حضور العقيقة بس أظن إنك إتعودت إني دايما مقصر معاك وانا اتعودت إنك تسامحني بقلبك الكبييييير
المهم ربنا يطمتا عليك دايما
وبجد واحشني
الف حمد لله على سلامتك
انا عارف انا محاصرك
وبزن
لكن رد عليا لتكون خرطوم اخرى
:)
سلامه عموره ألف سلامــــــه
ربنا يديلو الصحه والعافيه
اعتقد ان سر اعجاب الكثيريين بالمدونه ..فكرتها الاساسيه وارتباطها بعموره وأخباره واعتقد أنها ستكون بالنسبه له قوه دافعه في مستقبله ان شاء الله ممكن تاخد فتره نقاهه لكن لا تتوقف وسياتى اليوم الذي سيكمل فيه عمرو مابناه ابوه
الف سلامة على عمووور حبيبنا كلنا لكن انا عاوز اقول ان لو خفنا من عيون الناس مش هنقدر نوريهم نفسنا تانى ولكن لو خفنا من الله فقط وتوكلنا علية حق توكلة هنعرف ان كل شئ محسوب وبدقة ومفيش حد متوكل على الله ودايما ذاكرا الله كثيرا يصيبة اى شئ الا بامر الله حتى الحسد واتمنى من الله ان يظهر عمر مرة اخرى وبصحة جيدة
Post a Comment