Saturday, November 17, 2007

عمر أفندى فى الحديقة

عمر كان بيحس بإحساس جديد امبارح
خرجنا و لآول مرة خروجة مخصوصة علشانه
يعنى فى مكان مخصص ليه موش خارج مع بابا و ماما فى اى مكان و خلاص
يعنى كان بيستحمل و يجى معايا جراند كافيه يتفرج معايا على مطشات الاهلى اللى مشفرة فى البطولة الافريقية كلها مع انه اكيد موش مهتم قوى بالموضوع ده على الاقل فى الوقت الحالى
كمان كان بيروح مع مامته لصحباتها فى السودان و يفضل قاعد جنبها لحد متخلص زيارتها ليهم قصرت ام طالت الزيارة و هو غير مهتم بيهم الا اذا كانت واحد من صاحباتها جايبه بنتها معاها و هنا اكيد الوضع بيختلف شوية
لكن المرة دى اصطحبنا عمر افندى الى (منتزه الرياض العائلى) و دى حديقة اشبه ما تكون الى الحديقة الدولية اللى فى اخر عباس العقاد بمدينة نصر و كمان جزيرة الورد فى المنصورة
الباشا ضرب الطقم اللذيذ و الكوتشى الخفيف و انطلق يلهو و يلعب فى الحديقة و انا طبعا انتوا عارفينى مبعملشى حاجة غير انى قاعد اصور فيه كالعادة ...و كانت حصيلة خروجة امبارح بس من الصور 107 صورة بالتمام و الكمال
مامته و زى كل الستات المصريات جاية الرحلة دى و لها اهتمامات اخرى ...فلم تنسى ان تحضر معها السكينة و البرتقال و التفاح و الموز و اللب و الحاجة الساقعة و المية و هاتك يا انشغال فى امور التغذية و الترفيه و الذى منه
عمر كان فرحان قوى بالمرجيحة و ان كان حركتها المنتظمة فى الاهتزاز جعلت الباشا يسقط بفتح السين و تشديد القاف يعنى ينام عليها و كمان فرح قوى بالزحليقة و لعبت معاه كورة و جرينا ورا بعض كتير انا و هو
زيارة كانت جديدة و موفقة و سنكررها كثيرا الى منتزه الرياض العائلى
شعور الاسرة و الخروجة العائلية بالعيال وصلنى امبارح و الحمد الله و اسيبكم مع بعض الصور


وقت الخروج من المنزل استعداداً للانطلاق للحديقة

طبعا الباشا سبقنى على عجلة القيادة بالسيارة من شدة فرحه بالخروجه
اول ما وطأت قدمه ارض الحديقة
مباراة كرة قدم ساخنة بينه و بين والدته
يشكو لى خشونة لعب والدته و حسبتله فاول و اديتها انذار

فقرة المرجيحة
قاعد على الكرسى ولا كرسى العرش

انا طير فى السما....
و نظرا للحركة المنتظمة للمرجيحة و اهتزازها الباشا بدأ ينام على الكرسى و هو طاير

متنزلونى من على البتاعة اللى عملتلى دماغ دى

بيطلعولهوها ازاى دى ...ميعرفشى ان فى سلم من ورا

هييييييييييييييه

و للحديث بقية مع عمر افندى و قصة حب

(قريبا على عمر افندى دوت كوم)

7 comments:

Anonymous said...

بارك الله لك فى ولدك وانبته نباتا حسنا وجعله من القوامين الصوامين المهتدين واقر به عين والديه فى الدنيا والاخره صور جميله ياباسم ربنا يباركلك فيه

AbdElRaHmaN Ayyash said...
This comment has been removed by the author.
AbdElRaHmaN Ayyash said...

ما شاء الله
:D الواد ده عسل
بس سؤال
هو بيبص فعلا فعلا يعني على بنات السودان :D
امال هيعمل ايه لو خدته لبنان
يا لهوي يا عمر
ده بادئها بدري اوي
:D ربنا يخليهولك يا سيدي و يباركلك فيه
و يبارك له فيك
سلاام

Anonymous said...

السلام عليكم يا ابو عمر و ام عمر

ماشاء الله علي صور عمر و اخباره
انا متابعة اخباره من زماااااااااان

و بما ان الست ام عمر بقي ليها اصحاب و معارف في السودان ماتخليها تساعدني و تسألي عن صاحبتي السودانية اللي نفسي ارجع و اكلمها و اعرف اخبارها تاني من بعد ما افترقنا من يجي 10 سنين

لو ام عمر عندها استعداد تاخد فيا ثواب ممكن ابعتلكم المعلومات اللي عندي

و لو ماسعتونيش برده هفضل ادخل عندكم
سلام

اسامة يس said...

بسم الله ما شاء الله
ربنا يخلهولك يا رب ...

ويفرحك ديما بيه .,...
الصور جميلة وهوه بيسقط على حد قولك شكله ممتع
وفي انتظار بقية القصة
خالص تحياتي

اسامة يس said...
This comment has been removed by the author.
عمر أفندى و أبووه said...

الاخت ام محمد و عمر

طبعا على اتم استعداد على قد ما نقدر و خصوصا ان اصحاب ام عمر كلهم مصريات عايشين فى السودان و ليس سودانيات بس نحاول ...

ارسلى كل اللى نفسك فيه على الايميل

basemelsherbiny@gamil.com