Sunday, November 4, 2007

بيروت





بلد المقرارات على رأى سعيد صالح و رأى كل اللى كان بيعرف انى مسافر بيروت فى رحلة عمل لمدة اربع ايام عقب عيد الفطر مباشرة ضمن اجازة مصر الماضية...كل الناس اول ما يخطر ببالها عن بيروت هية المقررات...المقرر من دول تقوله تعال يا مقرر يجى علطول ...انتا حتى موش محتاج تقوله تعالى ...انتا تعمل ايديك كده هتلاقى المقرر شبك علطول ...

هو ده positioning اللى معمول للبلد دى فى دماغ كل الناس دا لو اتكلمنا بلغة الماركتينج اللى هية اكل عيشى.

و ها هى الرحلة بالتفاصيل...

سافرت يوم 20 اكتوبر و عدت فى 23 اكتوبر الى مصر يعنى قضيت يوم 22 اكتوبر ببيروت ...انتهت السنة التاسعة و العشرون من عمرى و بدأت السنة الثلاثون فى لبنان فهذا الاثنين 22 اكتوبر كان يوم مولدى.

بلد جميلة بكل ما تحمل الكلمة من معانى ....جوها جميل ...شوارعها جميله...ناسها بشوشين...و بيرحبوا بيك كسائح من لحظة نزولك من سلم الطائرة...فهى بلد قائمة على السياحة و جميل ان تكون البلد كلها مجتمعة على هدف واحد ...تخيلوا لو بلدنا دى فكر واحد اجنبى و سألنا هية بلدكم اقتصادها قائم على ايه.,..هل هية صناعية ولا زراعية ولا سيايحية ولا بتاعت بترول ولا علم ولا ايه بالظبط....احنا مصر اقتصادها قائم على ايه ...بالصلاة على النبى احنا بتوع كله ...و ولا حاجة فالحين و عارفين نتميز فيها....يعنى السعودية اهية بتاعت بترول...بلد زى الهند بقت بتاعت برمجيات ...بلد زى المانيا بتاعت صناعة و ماكينات و كده...بلد زى موريشيوس ...حد فيكم يعرف موريشيوس اصلا ...حتة جزيرة فى المحيط الهندى قائمة على السياحة و متميزة فيها جدا ...و كمان بيروت برضه قائمة على السياحة و البلد كلها بكل طوائفها عارفين ان ده اكل عيشهم و مركزين فيه يعنى سائق التاكسى بيرحب بيك و يديك معلومات عن البلد و اهم الاماكن اللى ممكن تزورها و اسعارها ...دا امتى ..دا و هو واخدنى من المطار للفندق ...مبيضعشى وقت و موش عايزنى انا كمان اضيع دقيقة من غير ما استفاد بيها و افيد البلد بدولارتى كسائح..

نفس الكلام فى المولات و المحلات...كل الناس هناك يتكلمون العربى و الانجليزى و الفرنساوى بطلاقة للتحدث معك كسائح باللغة التى تريدها انت موش يالشبه و الفهلوة زى البنت اللى فى المطار عندنا ...واقفة فى مطار القاهرة و بتتعاملى مع اجانب طول اليوم و ده اساس شغلك و مبتعرفيش انجليزى ...يا شيخة حرام عليكى...

المهم ...سافرت و البلد على موعد مع الإستحقاق الرئاسى ....و هناك و سمعت هذه الجمله من اكثر من لبنانى فى خلال الثلاث ايام و هى ان اللبنانى بمجرد ما يفك الخط يشترى جورنال و يبدأ يقرأ سياسة ...بدليل انهم مولعون بالسياسة و جميعهم منخرطون فى طوائف سياسية و لهم اراء و لا يوجد هناك المصطلح المصرى الذى اطلقه ابراهيم حجاجى فى احدى مقالاته خارج داشرة الضوء منذ سنوات (الاناملية) يعنى مبدأ و انا مالى البلد بلدهم...و انا مالى هو انا اللى هغير الكون و انا مالى هو انا اللى هنجح المرشح ده فى الانتخابات...اه هما هناك حاسين انهم مالهم و نص كمان....و علشان كده تلاقى منتجات كتير هناك يروج لها عن طريق السياسة زى الهدايا و المجات و الكتب و الديفيدهات حتى الخمور عليها علم لبنان






سألت موظف الريسيبشن فى الفندق فين خيم المعارضه اللى معتصمين منذ عام تقريبا فى وسط المدينة ...عايز اروح اشوفها و لانه سياسى فا رد عليا طبقا لتوجه السياسى اللى عرفت من رده انه من فريق 14 اذار لما قالى و هية هتشوف فيها ايه دول شوية ناس دقوا خيام فى الميدان و احتلوه ...فى فريق حاكم مضايق من حاجة عملاها المنعارضة و اعتصام و خيام فى وسط المدينة و مع ذلك منذ عام و هم معتصمون ولا يتعرض لهم احد ...عندنا فى مصر تخيل المعارضة قررت الاعتصام لمدة ثلاث ليال فقط فى ميدان التحرير...ثلاث ليال ليس الا ...اكيد هيحصل فيهم اللى حصل فى اخوانا السودانين فى ميدان مصطفى محمود فى المهندسين من سنتين.... دا المكان اللى اغتيل فيه رفيق الحريرى

جربت التليفريك...و كانت تجربة حلوة قوى قوى بيطلع بيك بخمسة دولار من تحت فى بيروت الى اعلى قمة الجبل و ينزلك تانى
صورة من داخل التليفريك
و هناك بتشوف كل لبنان من اعلى و كمان تستنشق هواء عليل و تقدر تاخد صور تحفة من فوق و فوق ده كله بتزور بعض المزارات السياحية و الدينية زى تمثال السيدة مريم ...سيدة لبنان و اللى مكانها كله سكينة و وقار و ذلك بناء على تعليمات من الادارة هناك لكن زوار المكان سواء سياحة زي حالاتى او عبادة زى اخوانا المسيحين...بس بجد مكان حلو قوى


كل اللى اتكلم على المقررات عنده حق ...فقد كنت فى بيورت و لمدة اربع ليال و لم التقى سوى بثلاث محجبات ...البلد هناك على راحتها على الاخر ....بس لما رجعت السودان صديقى مازن اللبنانى قالى اه ماهى غعلطتك لانك كنت فى بيروت ...انزل تحت الضاحية الجنوبية و لو شوفت شعراية واحدة يبقى لك الكلام...كمان الخمور تباع فى جميع الاماكن هناك و منتشرة بصورة كبيرة و طبيعية.

اكلت معمول بالقشطة و بسبوسة بالجبنة و طعم البسبوسة بالجببنة معجبنيش على الاطلاق ....حسيت الحلو ميمشيش مع الجبن مطلقا ...

و اتصورت كم صور كبير جدا بس طبعا للاسف كان ينقصنى الرفيق اللى يجعل الرحلة افضل و امتع ...و من احلى الصور اللى اتصورتها صورة فى مول و ورايا شماسى كتير كده و حطيتها فى التدوينة السابقة
اجازة مصر و صورة على الجبل فوق و صورة عند صخرة لبنان اللى كل الافلام العربى تقريبا صورت عندها و على راس الممثلين اللى عدوا من تحتها عبدالحليم حافظ فى فيلم ابى فوق الشجرة...

من اظرف الحاجات اللى قابلتنى هناك لما دخلنا نشترى نظارة من مغربى هناك فى لبنان ...مغربى بتاعنا بتاع مصر فاتح هناك فدخلت انا و المهندس حاتم اشتراله نظاره و عندها قالت لنا الموظفة خدوا الايصال ده علشان تستلموا بيه فارق الضريبة من المطار حيث انكم غير مقيمين ببيروت و لذا فليس من حقنا الاستفادة بضرائب منكم تصرف على خدمات للمقيمين ....


بصفة عامة كانت تجربة مفيدة جدا و سفرية حلوة تزيد من رغبتى فى انى لما ربنا يكرمنى كده و اتقاعد عن العمل بعد عمر طويل يبقى اكتر حاجة اعملها انى اطلع سفريات كتير استكشف فيها العالم .

11 comments:

يلا مش مهم said...

بيروت يا باسم
بيروت يا باسم
فين شارع التعاون
وقهوة ابو امين
وتقسيم عمرو
وطلخا حبيبة القلب
علي العموم هنيالك يا عمنا ببيروت
وعجبنا قوي التنوع اللي البلد فيه
فعلا فسيفساء دينية ومذهبية وسياسية
يعني مسيحيين ومسلمين
سنة وشيعة ومارون وارذثوكس
يساريين وقوميين واسلاميين
معارضة وموالاة
يا لهوي علي البلد اللي عملة زي النص ضربة بتاعت فرغلي
ويلا مش مهم

Anonymous said...

ربنا يكرمك ما شفتوش توك توك هناك
أصله هنا في المؤتمر العظيم
من إنجازات الريس في البرنامج
تشغيل 63.7 ألف وحدة توك توك
في 13 محافظة
حسب المصري اليوم

عمر أفندى و أبووه said...



مجدى يلا موش مهم...
يا باشا بيروت دى رحلة معدية كده عارضة لكن اللى باقيلنا هية قهوة ابو امين طبعا و طلخا و غيرها انما تقسيم عمر خلاص ربنا تاب علينا منه و من مصايبه...

حمادة

لا يا باشا و الله مشوفتشى جنس توكتكاية واحدة هناك...بقولك بلد سياحية

انما موجود عندى هنا فى السودان بغزارة و اسمه هنا ركشة موش توكتوك

Unknown said...

3ndk 72 el r7la kan na2sha el rfik eli ykml 7lawetha ..... elmohm fin el sor eli 27na mstniha kgmhork .. 2nta mesh 3aref ya basem el gmhor by7b eih wala eih ??
2nta ragel bta3 marketing w el klam eli 2nta katbo dh mykhlish el gmhor y3brk .. 2nta keda ht3ml aflam mn ghir mtstna 2irad ..zi aflam dawod 3bd el sid .. 7awel trkz shoia ya 3mna

Anonymous said...

ايه ياعم باسم الحلاوه دى بيروت وجبال بيروت والتليفريك مفيش صباح وهيفاء ونانسى بالذمه مصر أحلى بالناس اللى فيها ولا ايه
ياراجل الواحدمش بيطمن اللى فى حضن امه وحمدالله على السلامه وعقبال أمريكا وأنا وياك والعائله
اخوك /أبو ياسمين

Anonymous said...

yabasha 7amdellah 3la elslama wen shallah kant re7la mwafaka?
bas yabasha enta 3mal t2olna 3la elmokrarat elmokararat w7atet sowar kotb wmgat da klam bardo fen yabne el7gat wla hatb3athlna 3la elmail 3shan da site mo7tram?

Anonymous said...

3la fekra ana Anonymous 3shan etkhana2t 2dakhal eluser welpassword
samady
basha

أحمد عبد العاطي said...

بداية كلامك عن وصف بيروت وسعيد صالح هي نفس الكلام اللي داعبني به محمد حافظ -فك الله أسره - عند أول زيارة عمل لي لبيروت بس الفارق أني لم أشاهد كل ما شاهدت لأني ربما مش من هواة السياحة لكن بأحاول أتعرف علي البلد عامة
وفقك اله وحفظك
ملحوظة دجاء لو كان من الصور المعروضة زجاجات خمر أن تزيلها لأنها تضايق من يراها وأنا للأسف لم أستطع التمييز هل هي أم لا ؟؟؟

Anonymous said...

Enaha Thaqaft el ekhtelaf ya 3alammmmmmmmmmm ya nassssssss ... 7ata w lou afsad lel wedd qadiaaaa thaqaft el ekhtelaf... ya beeso mubarak 3alik enk zoorrt wa7eda men aksar el dwal el 3arabia democratiaaaa w hania2an lana bekk lol bas ya besso ma3lesh e3zorny fe el so2al , feen sewar el mozzaz ???? hawa e7na malnash nefs e7na kaman ??

Unknown said...

الله جميلة قوي
الصور دي
وكمان شكلها كانت رحلة حلوة
اهم حاجة انك مالكش دعوة بالمقررات
خليهم في حلهم
بس فعلا
بيروت العاصمة فا لازم تبقي كدا
يلا سلامممم

klmat said...

جميل اوى ان الواحد يقوم
برحله فى بلد جميل زى لبنان
عطتنا فكره كويسه عن اهتمامهم بالسياسه هم شاطرين كمان اوى فى التجاره ومنتشرين وناجحين فى
امريكاوغيرها
عجبنى اوى تأكيدهم على قدسيه
الاماكن الدينيه والاحتشام فيها
خدتنا فى رحله سياحيه ظريفه
تحياتى لك