Sunday, October 7, 2007

و بحبك وحشتينى

و بحبك وحشتينى

"مصر هية امى..نيلها هو دمى...شمسها فى سمارى ..دمها فى ملامحى...حتى لون قمحى ..لون نيلك يا مصر...مصر ...مصر" دى كانت كلمات الاغنية التى تغنت بها المطربة عفاف راضى من زمان قوى و اتربينا عليها...اتربينا على ان مصر هية امى...غنيناها فى المدرسة فى الابتدائى فى حفلات المدرسة و قولنا مصر هية امى ..و انا بدورى بقولك يا سيد عمر افندى...من هنا و رايح (مصر هية امك) و لازم تفهم ده كويس.

نروح بقى على فنان تانى و اغنية تانية ..الفنان ده موش مصرى بس غنى اغنية كتير حلوة و كسرت الدنيا الصيف الماضى و هو الفنان حسين الجاسمى و اللى غنى اغنية بحبك وحشتينى و مقطعها بيقول (و بحبك وحشتينى ..بحبك و انتى نور عينى..لو انتى مطلعة عينى...بحبك موت..لفيت قد ايه لفيت..ملقيت غير فى حضنك بيت...الى اخر الاغنية التحفة)





ايوة و الله العظيم وحشتينى ...ولو انك مطلعة عينى و عين 90% من افراد الشعب بس كلهم مبيحبوش غيرك ...90% هما اللى بيشتكوا من العطش و الفقر و الفساد و التعذيب و البطالة و العنوسة و التهميش و التغريب و القهر وحبس الصحفيين...و العشرة فى المية الباقية دى اللى متروقة فى البلد و معندهاش اى مشاكل ...و مع ذلك كل الناس بتحبك صدقينى و انا و على رأسهم انا ووحشتينى.

وحشتينى بسحابتك السودا و ترابك...وحشتينى بأكلك و شربك..وحشتينى بشوارعك المكسرة..كمان وحشتينى بزحمتك ...وحشنى عساكر الامن المركزى اللى واقفين قدام نقابة الصحفيين...وحشنى الفول و البطاطس بتاع جاد جامعة الدول على الصبح فى المكتب ..وحشنى عربيات الفولكس البيضا بتاعت فيصل و تجمدها فى الشارع حتى الساعة 2 بليل ولا حد بيحل ولا حد بيربط و يبقى الوضع على ما هو عليه و اللى موش عاجبه ياخد شارع الهرم
امى

وحشتنى امى كتير قوى ..زوحشنى قعدتها معايا و هية تحكى و تتكلم و انا بسمعها و انا عارف انى مجرد انى بسمعها هية دى اقصى امنياتها انها تلاقى حد يقعد جنبها و يسمعها و هية بتفضفض...امى اللى مهما عملت عمرى ما هوفيها حقها...امى اللى كانت بتتصل بيا فى مصر علشان تقولى باسم انتا فى حاجة حصلتلك و اقولها لا صدقينى فى الوقت اللى بكون راجع فيه من المستشفى و اتعجب انا و مراتى من هذا التليفون العجيب و نقول دى مكشوف عنها الحجاب ولا دا قلب الام اللى بيقولوا عليه...وحشتنى البطاطس المهروسة منها على السحور و يا رب يكون يوم الجمعة الجاية لسه رمضان علشان الحق و لو سحور واحد فى مصر قبل ما رمضان يخلص و ادوق البطاطس من ايديها .
عمو سيد

عمو سيد و هو بيفسح عمر افندى فى رأس البر


وحشنى عم سيد قوى ...الراجل الجدع ...جدع بمعنى كلمة جدع ...صديقى و فى رواية اخرى حمايا...اللى من اول يوم شوفته فيه و انا حاسس اننا مضينا عقد صداقة ابدية بينا و بين بعض ...بحبه جدا و بعتبره زى والدى الله يرحمه بالضبط...




عمو سيد و هو بيوصل عمر افندى للقاهرة فى رحلة مكوكية

الراجل ده بيتعب معايا قوى لدرجة انه منذ قدوم عمر افندى و هو لم يتركه يركب مواصلات عامة قط...فكان بيجى من المنصورة


يوصلنا الى باب شقتنا فى القاهرة و يعود مرة اخرى للمنصورة فى نفس الوقت حتى لا يتبهدل فى مواصلات قبل ما ربنا يكرم عمر افندى و ابوه بعربية ..و فرحان قوى انى هشوفه فى المطار يوم الخميس الجاى انشالله.
استاذ وجدى و هشام يحي

استاذ وجدى فى احدى الجلسات مايو 2004

هشام يحيى و هو يسدى لى بعض النصائح الصحفية يناير 2005

وحشتنى قوى قعدتى مع استاذ وجدى و هشام يحيى فى مكتب الاى ار تى و دردشتنا فى كل شىء وحشنى نقاشنا عن الدين و السياسة و الاخوان و الكورة و الاهلى و الزمالك وحشنى كلامنا فى الفن و حشنى الشاى الاخضر اللى كنا بنشربه مع بعض قوى.
وحشتنى نصائح الاستاذ وجدى الهامة لى فى حياتى على الاطلاق و التى من اهمها والذى لا انساه الا الان (ان لم تجد ما تحبه فيجب ان تحب ما تجده)حتى لا تعيش فى كرب و ضيق..و ده لما كنت بشتكيله من ادارتى او اى حاجة...و هشام يحيى و نصائحة الصحفية الدائمة فهو صحفى ذو خبرة ...و كمان مناكفته ليا دايما على موضوع ال البيت رضى الله عنهم جميعا.
الثقب الاسود

جانب من افراد الثقب الاسود فى احد التجمعات

مجدى و قصاص فى احدى الجلسات على قهوة ابو امين مقر الثقب الدائم

وحشنى الثقب الاسود و العشا عند الطيب...وحشتينى ياقصاص و توصيلتك العظيمة ليا اخر شارع الملكة بعد منتصف الليل علشان ترجع تانى بيتك مصر الجديدة وحشتنى يا غزلان ويا اسلام ويا منعم و يا عبدالرحمن و يا مصطفى و مبروك على الاغنية بعد التوزيع الجديد احلى كتير ..وحشتنى يا مجدى وجورنال المصرى اليوم اللى كنت بتعزمنى عليه كل يوم وحشنى مشتهرى و الكوكتيل بتاع ابو امين مع اللب الابيض و الفول الاسوانى و النص ضربة بتاع فرغلى.

المنصورة و شلتها

انا و شريف فى حفل شواء قبل سفرى بشهر


وحشتنى شلة المنصورةايهاب و شريف و على و الجمال و فوزى...وحشنى احمد عنتر و ربع المشكل وكمان وحشتنى الكنافة بالكاستر بتاعت مامتك قوى يا توابتى. و احب اشكرك شكر خاص جدا جدا انتا و الجمال على اهتمامكم بامى و سؤالكم عنها فى غربتى.


زنجو

زنجو و(خطيبته سابقا) زوجته حاليا و انا و مراتى فى احدى عزومات السمك ابريل 2006

وحشتينى يا زنجو و وحشتنى اسكندرية و البحر...اخبارك ايه بعد الجواز ...تفتكر هعرف اجى ازورك بما انى محضرتش فرحك و تعزمنى على اكلة السمك المعتادة بتاعتك ولا موش هلحق الاجازة دى.





تفتكروا اجازة اسبوع ينفع اعمل فيها الحاجات دى كلها...تفتكروا هقدر اشوف كل الناس اللى وحشونى دول...تفتكروا

حتى لو ملحقتش موش مشكلة فما لا يدرك كله لا يترك كله و اهية زيارة قصيرة احسن من مفيش خالص ادعولى ربنا يباركلى فيها.

18 comments:

محمد الجمال said...

تجربة

عمر أفندى و أبووه said...

طيب و بعد التجربة دى احساسك ايه يا محمد

Anonymous said...

ya beessoo enta kaman wa7ashtena kolena :) Ya rab tekoon agaza sa3iada , w ya sidee Masr lou daia2etk shwaia 3adeelaha ma enta yamma 3adetlaha lama kont 2a3ed 3ala albaha , w ba3deen mahy madia2a kol 3ayalaha w roo7aha ba2eet fe markhiraha w e7na sakteen w katmeeen fe 2lobana..w meen feena ekhtar ghorbeto b edeeh ya beso... Kol sana w enta ya rab tayyab , slem 3ala mama w shosho w 3amoura :)

أحمد عبد العاطي said...

أخي باسم تعود الخميس إنشاء الله سالما غانما وتسعد بحماك واكل والدتك وصحبة أصدقائك وربنا يفك أسر مصر

Ahmed AlShafee said...

ترجع بالسلامة يا بسوم إنت وعمور
أنا نفسي أشوفك جدا
على فكرة أنا رزقت بـ"جودي" يوم الثلاثاء الماضي
كده بقى عندي علي الدين وجودي
عقبالك لما تخاوي عمر أفندي
وترزق كده ببنوتة أمورة
أخوك
أحمد الشافعي

Anonymous said...

ماكنتش اعرف انك عاطفى اوى كده على العموم هانت بكره ترجع للفول والامن المركزى والهواء الملوث ورايي ممكن تعمل مشروع ونصدر شويه من الحاجات دى للسودان تيجى بالف سلامه ياباسم حاتم ثابت

غــرـريــبـــة said...

السلام عليكم و رحمة الله و بركاته


بجد أنا اقشعرت و انا بقرأ اول الموضوع ،، بجد مصر غالية علينا ،، مصر دى حته منى مهما نبعد مش نقدر ننساها مش نقد نكرها ،، سبق و قولت فى مدونتى احنا مش بنحب الكيان الى جواها لكن مصر الام هى الام حنينه و طيبه و ارضها لنا سكن و حضنها دفى ،،مش ممكن تقسي علينا


أعادك الله لاراضى الوطن سالما ،، و يارب الجمعه يكون رمضان علشان تلحق السحور و لو مش لحقته يلا مش تزعل هو هتلحق الكعك ،، و كمان يكفى انك هتكون بين أهلك

زمردة said...

السلام عليكم ورحمة الله
ربنا يبارك لك فيها
وترجع بالسلامة
وتتآنس بالحبايب كلهم

الـفجـريـــة said...

توصلوا بالسلامة ان شاء الله

مع ان الموضوع كان ممكن ياخد تفكير اكتر ويبقى حملة من بتوع شباب مصر يستقبلون عمر افندى فى مطار القاهرة

هو اقل من د.عبد الوهاب المسيرى يعنى

ربنا يكرمكم وتلحقوا تزوروا كل الناس..وتكون اجازة سعيدة

Unknown said...

سلام عليكم
بوست جميل ومؤثر وفية ريحة مصر
ترجع بالسلامة وتنور بلدك انت وعمور
وكمان يباركلك في وقتك ان شاء الله وتعمل كل اللي انت عايزة المهم انت متكسلش وتزور كلة بسرعة وتعمل بروجرم مكسف علشان تقدر تزور كلة وتعمل كل اللي انت عايزة
وشكرا علي زيارتك ليا ويارب تتكرر
وربنا يخليلك عمر افندي ماشاء الله زي العسل
بس هو انت مسافر فين
سلام
مني

عمر أفندى و أبووه said...



ya anonymous

thanks for this sweet words :)

استاذ احمد عبدالعاطى

شكرا جزيلا و يا رب فعلا فك اسر مصر و كمان يا رب ترجع انتا كمان لاهلك يالم غانم يا رب

احمد شافعى
يخرب بيت الكفرة ...انتا فين يا بنى وحشتنى جدا و معرفشى عنك حاجة من زمن....الف الف مبروك على جودى هانم و خليه تجهز نفسها علشان تعرف تقنع عمر افندى بيها لان الطلب عليه زايد قوى اليومين دول

حاتم توفيق
لا يا حاتم انا عاطفى بس انتا اللى موش واخد بالك ...مركز فى الشقق و العقارات

غريبة
شكرا على كلامك الجميل و اتمنى ان تكررى الزيارة

زمردة

الصورة بتاعت البروفايل بتاعتك تحفة

الفجرية
سعيد جدا بمشاركتك معى
و عمر هيفرح قوى بكلامك ليه و انك فكرت فى استقباله مع شباب مصر فى المطار بس هو موش بيرغب فى انه يتعمل منه بطل بدرى بدرى كده علشان كل الابطار بيغير منهم النظام و بينفيهم او بيطلع عين اهاليهم فا خليه كده خفيف خفيف الفترة الاولى دى على الاقل

hope$
منى منورة مدونتى و اتمنى ان تكررى الزيارة
كمان عايز اقولك ان عمر افندى فى السودان

Anonymous said...

ربنا يجيبك بالسلامه وتحاول على قد ما تقدر تعمل الى تقدر عليه ربنا يوفقك

nour el 3ozamaa said...

كل عام وانتم طيبين بمناسبة عيد الفطر المبارك وانشاء الله نصلي صلاة العيد الجاى في المسجد الاقصي وتكون القدس متحرره

تحياتى لكل عظيم وعظيمه

Eman Eltaher said...

هههههههههه
مصر هيا الماما بتعات الأنا
:)
مصر هيا مامتك
انا بقولك أهوه

سيب السودانيات ف حالهم :) ههههههههه
بس بجد ربنا يخليهملك أهلك كلهم
و اصحابك و الكل ان شاء الله

تحياتى

Anonymous said...

كل عام و انتم بخير يا عمر افندى

Anonymous said...

نورت مصر يا عمر افندى

Anonymous said...

انت تخين
لازم تخس

Anonymous said...

zingo el3ageeebb
اللى حاقدر اقولهولك هو حاجة واحدة هو
انك قاعد فى مصر اسبوع بس ونفسك تشوف كل الناس انا بعد ما اتجوزت حسيت كتيير يعنى ايه صاحب ويعنى ايه انت مفتقد صاحب بجد يا باسم مش كلام فى الهوا انت اكتر من اخ عزيز الواحد بيبقى دايما محتاج يقعد يكلم ويفضفض معاه على فكرة انا مش بخش كتير على النت لانى من اول يوم كنت قلرات كنت كتبت تعليق ادعيلى ربنبنا يوفقنى وانا حدعيلك انه يكرمك وعلى فكرة خبر الموسم المدام حامل وان شاء المولى حجيب عيل بيكهام وعيل دروجبا او او او