Thursday, September 6, 2007

عمر افندى يصوم فى رمضان




خبر عاجل/ لقد قرر السيد عمر أفندى مشاركة والديه مشاعرهم فى رمضان و البدء فى الصيام و ذلك حتى الشروق فقط هناك احتمال انه لو فضل نايم كمان شوية ممكن توصل فترة صيامه حتى الساعة العاشرة صباحا على أكثر تقدير و هذا الامر يعد إنجازا بكل الاحوال فهو الذى طالما يحرص على مشاركتنا افراحنا و اطراحنا فلم يكن من الطبيعى ان يفوت هذا الحدث و هو شهر الخير شهر رمضان بدون ان يشاركنا اللحظة بما يستطيع .

رمضان شهر الخير

و الله بجد الاسم ده على مسمى ....فعلا رمضان شهر الخير ...خير فى كل حاجة ,خير فى الاكل الكتير ,خير فى عمل الطاعات,خير فى الاجر و الثواب,خير فى صلة الرحم,خير فى رواد المساجد,خير فى القيام و التهجد,خير فى قراءة القرآن و العودة للمصحف...

بلغة التسويق اللى هية اكل عيشى كل سنة بيبقى فى بيك سيزون يعنى الموسم البيعى الاعلى و اللى بيكون فى مصر طبعا موسم الصيف ...و ده كنا بنعمل علشانه تجهيزات جامدة جدا و لازالنا ...الاهتمام بموسم الصيف لا يفوقه اهتمام..لان دى الحملة اللى لو عملناها بشكل جيد و ضربت بتعلى مبيعات الشركة من الضعف ..تقدر تقول التلات اضعاف لو عايز و دا حصل بالفعل فى حملة صيف 2006 اللى كانت باسم (وان تو هنصيف مع اى تو) ..طيب يعنى ايه اتعملت بشكل جيد اللى عدت علينا من شوية دى...يعنى اتعمل البرموشن اللى يجذب العميل انه يشترى انه يجرب و يشارك و بيقولك كمان فى علم التسويق ان البرموشن حلاوته انه يكون ليه وقت محدد ..ليه بداية و نهاية و معروف...و انك كعميل لازم تحس بفرق انك تشترى دلوقتى و تستفاد بالبرموشن من عدم الشراء و انك تفوت عليك الفرصة.

و ربنا سبحانه و تعالى جعلنا شهر رمضان ده شهر البرموشن ...و موش اى برموشن ...دا بيقش كل الحملات التسويقية اللى فى الوجود كله ...و فترة تنطبق عليها الجملة اللى فاتت انك لو ملحقتش عروضه ...موش هتعرف تعوضها فى اى وقت تانى فى السنة ...يعنى السنة هتجازى عليها باجر فرض ...و الفرض هتجازى عليه باجر 70 فرض ولا الصدقة ولا صلة الرحم ...جزاؤهم عظيم فى هذا الشهر الكريم ...ناهيك عن قراءة القرآن ..و فوق دا كله ربنا سبحانه و تعالى علشان منتوهشى مقسملنا الشهر لتلات اتلات ..اوله رحمة عشر ايام نطلب منه الرحمة و لما يرحمنا ندخل على التلت التانى و اوسطه مغفرة و لما يرمتا يغفر لنا انشالله و عندها نبقى مؤهلين لدخول التلت التالت و هو العتق من النار فبعد ان يغفر لنا يكون جزاؤنا العتق من النار انشالله.

الجراند برايز

زى ما دايما فى اى برموشن بيكون فى جراند برايز او جائزة كبرى كل الناس بتلهث وراءها و بتخش البرموشن طمعا فى الفوز بها ...فى فى برموشن رمضان جائزة كبرة برضه و هية ليلة القدر ....فهى ليلة خير من الف شهر يعنى 83 سنة ...يعنى انا اتصلت لماما و سلمت عليها و صلت رحمى هاخد ثواب انى قعدت اتصل بيها كل يوم لمدة 83 سنة ....يعنى انتا لو تصدقت بنص جنيه على فقير او مسكين فى الشارع هتاخد ثواب انك فضلت يوميا تنزل تتصدق بنص جنيه و لمدة 83 سنة ...انتا متخيل هية اد ايه جائزة كبرى...صلاة قيام صوم عن كل ما يعصى الله قراءة قراءان كل ده اضرب يا معلم فى 83 سنة ....استغفار تسبيح ذكر ...كل ده اضرب فى 83 سنة ...يا جماعة دى فرصة لا تضيع الا على من لا يرضى الله عنه ولا يسمح له بان ينال هذا الاجر العظيم ...صدقونى و اللى موش راضى ربنا عنه ده اللى موش هيدى كويس فى اول عشرين يوم ...يعنى لازم اظبط كل امورى فى اول عشرين يوم علشان ربنا يكرمنى بيها فى العشر الاواخر..

و فى عرض خاص مميز جدا فى البرموشن ده كمان ...عارف ايه البلاوى اللى انتا هببتها فى حياتك من يوم متولدت و الى الان...كلها ممكن تتخلص منها و تخرج من رمضان ناصع البياض زيك زى عمر افندى فى حجم السيئات اللى يملكها.... قال رسول الله صلى الله عليه وسلم :"من صام رمضان ايمانا واحتسابا غفر له ما تقدم من ذنبه

يعنى انت مصليتشى الظهر يوم الاربعاء فى شهر اكتوير سنة 1990 كل ده انتا اتنيلت نسيته خلاص لكن مكتوب و هتتحاسب عليه يوم القيامة ...طيب اتخلص من البلاوى اللى عليا دى ازاى ...تتخلص منها بالصوم بس موش اى صوم ...الصوم ايمانا و احتسابا.

خلى بالك من نقطة مهمة ان كل العبادات اللى شرعها ربنا سبحانه و تعالى معروف البرايس ليست بتاعتها و معروف سعرها كام ...الصلاة ب27 حسنة و الصدقة بكذا و السلام عليكم هتاخد عليها كذا حسنة انما لو قولت لباسم يا طخين هتتاخد كام سيئة ...كل الحاجات معروف سعرها الا الصوم ...ربنا سبحانه و تعالى بيقول
روى البخاري عن النبي صلى الله عليه وسلم قال:
"يقول الله تعالى:كل عمل بن آدم له الا الصيام فانه لي, وانا اجزي به,
من عظم اجره فا خلونا نستفيد بالميزة السعرية الكبيرة اللى فى المنتج ده.

العرض سارى حتى نفاذ الكمية

طيب ينفع اخده بضعف التمن ...ايوة طبعا
يعنى بما انه حلو كده و بيكسب جامد موضوع الصوم ده ....هاتلى منه اتينين يمكن يشح فى السوق بعد كده او يمكن اموت قبل ما اخد منه تانى فى السنة الجاية ....ربنا سبحانه و تعالى سمحلك انك تاخد من المنتج ده زى منتا عايز بالعدد اللى انتا تختاره و مفيش كمية محدودة بطريقة بسيطة خالص ..
قال رسول الله صلى الله عليه وسلم :"من فطر صائما كان له مثل أجره غير أنه لا ينقص من أجر
الصائم شيئا"
يعنى كل يوم 10 جنيه بس اعملى فى الشهر 300 جنيه دول طلعتهم فى اول الشهر بنية افطار صائم ...اخدت ثوايى و ثوابه...و يمكن ثوابه يكون اكتر لو اخلصت فى لحظة تصدقى لانى مضمنشى اخلاصى طول فترة صيامى على مدار الشهر...و ال 300 جنيه دول ممكن تدفعهم فى عشوة فى فرايديز انتا و مراتك فا خرجهم و فك الكيس شوية.


خلاصة القول

يا عم الحاج يا ست الحاجة
كل سنه بتدخل رمضان بقلب جامد وتقول هعمل واسوى . وكل سنه بتيجى بعد اول اسبوع وتبدء همتك تنزل واحده... واحده ... واحده وانت شايفها ومش قادر تعمل حاجه وكل سنه تقول السنه دى غير كل سنه انا السنه دى
هكسر الدنيا و....... ايه رايك بقه ان انت السنه ديه هتكسر الدنيا بجد وهتعمل اللى مكنتش قادر تعمله

فكر فيها بمعايير المكسب و الخسارة اللى كلمتك بيها فوق و اللى اتعمدت اكلمك بيها علشان ميبقاش كلامى مكرر و اسهل للوصول لينا كلنا ...و تخيل لو انتا كمان خدت لينك الموضوع ده و بعته لكل اللى تعرفهم و الله هتاخد اجرهم كلهم و تدينى انا كمان حتة من التورتة دى ....يعنى مصلحة مشتركة ...و صدقونى انا موش عايز من ورا الانتشار للموضوع ده دعاية للموقع اد منا عايز دعاية للبرموشن و ثواب من رب العالمين ....ربنا يتقبل منا جميعا

كل سنة و انتم طيبين

ابو عمر افندى

8 comments:

Anonymous said...

كل سنة وانت طيب يا باسم والعائلة الكريمة كلها
وطبعا لازم خطيبي يتعلم الصيام من الان ربنا يحفظه ويحفظك
وجزاكم الله خير علي التوجيه بالخير

أميرة محمد محمد محمد said...

ربنا يكرمك يا ابو عمر ويخليلك عمر وقول لايمان ان ده خطيبي انا وتبعد عنه علشان مانتخانقش

حلو الاسلوب اللي كاتب بيه البوست اسلوب جديد وبصراحه باين ان كل دماغك في شغلك

علي فكره انا عاشقه للجزيره الوثائقيه .كل قنوات الجزيره بعشقها ما عدا الرياضيه مش بتابعها قوي

سلملي علي عمر وشيماء

Anonymous said...

دلوقت عرفت مين عمر...ومين هو أبوه !!!
كل سنة وانتم طيبين...
وعقبال تطبيق نظام " صيام اليوم الكامل"...!!
بس طبعاً من غير نوم !!

Anonymous said...

التربية وتغيير الذات في رمضان
إن من الواجب علينا في هذا الشهر هو أن لا يكون كأي شهر من الشهور بل يجب أن يكون شهرا خاصا نتخذه قنطرة للنجاح في سواه من الشهور ولهذا علينا أن نتربى في هذا الشهر وتبري أولادنا وأهلينا ونربي المجتمع من حولنا ، فرمضان فرصة كبيرة لإصلاح الذات وتغيير النفس (samer)

عمر أفندى و أبووه said...



يابنات

تقدروا تبعتوا سيفاتكم لعمر افندى و هو يقراها و يحددلكم انترفيوهات و انشالله يكون فى امل

متتخنقوش

عمر أفندى و أبووه said...



يابنات

تقدروا تبعتوا سيفاتكم لعمر افندى و هو يقراها و يحددلكم انترفيوهات و انشالله يكون فى امل

متتخنقوش

Anonymous said...

التربية وتغيير الذات في رمضان
إن من الواجب علينا في هذا الشهر هو أن لا يكون كأي شهر من الشهور بل يجب أن يكون شهرا خاصا نتخذه قنطرة للنجاح في سواه من الشهور ولهذا علينا أن نتربى في هذا الشهر وتبري أولادنا وأهلينا ونربي المجتمع من حولنا ، فرمضان فرصة كبيرة لإصلاح الذات وتغيير النفس

miro said...

فكره جامده والله انه يعرف اصلا ان فى حاجه اسمها صوم من وهو صغير كده