Saturday, July 21, 2007

الاهلى من السودان



الاهلى فى كل حتة...عمال يجيب اجوان
و زى ما راح افريقيا ...برضه راح اليابان
وبعده جاى السودان


هكذا كان يتغنى المطرب الفذ صاحب الصوت قصدى الوسط لانى بعتبره لا مطرب و لا زفت سعد الصغير جداً فى نظرى اللى بكرهه زيه زى محرم فؤاد بالظبط مع اختلاف لون الغناء لكل منهما


مبارةالاهلى و الترجى ...اول مبارة للأهلى منذ مغادرتى البلاد ...احساس مختلف انى نفسى اشوف المطش من منطلق وطنى قبل ما يكون من منطلق حبى للاهلى...عايز اتفرج عليه لعله يكون المتنفس عايز اتفرج عليه و انا معرفشى اى حاجة فى البلد نهائيا فلم يمض على وجودى بالخرطوم اكثر من اسبوع


لبس عمر افندى الطقم الاحمر الذى يعبر عن هويته الكروية و نزلنا الشارع الساعة السادسة و معنا اقرب شىء الى ايدينا طوال الاسبوع الماضى و هى الخريطة الخاصة بالخرطوم ..


استقلينا السيارة و حددنا موقع حوالى 6 كافتيريات على الخريطة فى اماكن مختلفة و انطلقنا للبحث عنهم و معاينتهم للتأكد ايهم ستكون انسب لنشاهد المباره بها انا و عمر و ام عمر.
احساس مختلف تماما لما تبقى فى بلد جديد عليكو مفيش فيها معين ولا مرشد ليك...معاك خريطة و كل يوم بتنزل تلف منطقة بناء على الورقة اللى فى ايديك و تستكشفها و تتهوه و ترجع على البيت و هكذا فى اليوم التالى منطقة اخرى


و رسى بينا الحال على جراند كافيه الموجود بطريق المطار...محل مصرى و كل موظفينه مصريين و الجميل ان دخلنا لقينا الاهلى هو الاهلى اينما كانت الوجه برضه عدد لا بأس به من المصريين من مشجعى الاهلى موجود و ملتف حول الشاشة ولا اكننا فى جراند كافيه فى المعادى مثلا.


اول ما دخلنا الكافيه ابوتريكة جاب جون مما بشرنا بمباراة ستكون ممتعة و شاهدنا المبارة بالكامل فى جو ممتع و حماسى


عمر افندى طبعا لان مكنشى على نفس درجة اهتمامنا بالمباراه اتصاحب على الوايتر بتاع المحل ...ولد مصرى اسمه مصطفى و بدأ يلعب معاه و مصطفى حبه لدرجة انه كان بيروح ياخد الاوردرات من الطربيزات التانية و هو شايله على ايديه.


انتهت المباراة و ملقيتشى حواليا حد زملكاوى احس عن طريقه بمتعة النصر على راى بلال فضل فى احد مقالاته اللى علق فيها على مبارة الاهلى و الزمالك الاخيرة فى الدستور فما كان منى الا انى بعت رسايل لاصحابى المهتمون بالشأن الكروى على الموبايل للتهنئة بالفوز.


زول صديق بالشركة نصحنى بعدم الاصرار على اشهار هويتى الكروية فى هذه الفترة تحديدا بعد ما الحضرى و شوقى ضربوا العيال بتوع الهلال فى مطش الذهاب فى ستاد القاهرة حفاظا على حياتى ...كمان نصحنى بعد الذهاب للاستاد يوميها لان السودانين مجانين كورة و ممكن اتبهدل و خصوصا انى كنت ناوى اروح الاستاد و مجهز علم للاهلى و زمبيل احمر لعمر...بس خلاص عدولت عن الفكرة

عمر بالزمبيل


حلوة عدولت دى....و هتفرج فى جراند كافيه برضه


و ابقوا تعالوا نورونا هناك لو قدرتوا ...عندهم مهلبية مصرى جامدة و موش غالية ب 6000 جنية الطبق بس

11 comments:

Anonymous said...

بيسو .....ايوه كده ياعم طمنتنا عليك انت والاستاذ عمر ......ربنا يوفقك في شغلك ويباركلك فيه ....واحب اقول بالمناسبة دي ......بيب بيب اهلي .....افرقيا كلها بتنادي وتقول اهلاوي عالطول...........صحيح المهلبية ب600 جنيه علشان المصريين يعرفوا انهم في نعمة ..زربنا يخلنا عمو حسني واونكل جيمي ...صحيح مش خديجة حامل

مشروع انسان said...

يدعوكم موقع مدون خانه (تحت الانشاء)الى الاجتماع من اجل الاتفاق على الخطوات النهائيه لنشاء مجمع المدونين (مدون خانه)وذلك يوم السبت القادم الموافق 28 / 7 / 2007 وذلك الساعه 6 مساء يوم السبت فى مركز العربى للدرسات العنوان 23 شارع باهر زغلول من شارع المنيل

Anonymous said...

awlan 6000 geniah 3ashan el geniah henak baytwzenn bel kilo ya besoo mesh hatshtaghalana , ya3ni ghalban el 6000 geniah el soudany dol ya3melo nos geniah masry ,,, sanian hawa grand cafe dah warana warana uff ana bakrahooo , salasann 3amoura ya3geb el pasha mesh el waiter ,, raba3an PEEEEEEEEPPPPPP PEEEEEEEEEEEEEEEPPPPPPPPPPPPPP ZAMALEKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKKK

Khalooda (Abou Ziyad) said...

Rabenaa yawfa2k ya besoo antaa we el family beta3tk fe el sudan , we ya rb tekoon mabsoot fehaa , m3 any bakrh ay 7ad sudany henaa fe KSA (Ya ZOOOL) ya (Abn AL Nile)

أنتا عارف يا بيسو أنى كليش فى الكورة من زمان بس أنا طبعا طبعاً أهلاوي بالتبعيه لأن أبويا الحاج صالح أهلاوىىىىى على طوووووووووول

Many Thanks
صديقك الصدوووق :)
Khaled EL Haddad (Riyadh - KSA)

ahmad senosy said...

انا كمان اهلاوى و بحب الاهلى
و مطش كان حلو و الاهلى كسب بسهولة
حلو اوى موضوع الخريطة ده
يعنى من غير الخريطة تقول يا غربتى
ربنا ييسرلك الحال
و خلى بالك من السودانين المتعصبين
و سلامنا لعمر

احمد سنوسى

يلا مش مهم said...

صاحبي
مدير فرع الثقب الاسود بالسودان
لسة دماغك مطرقعة زي ما هي
ومت علي نفسي من الضحك وانا متخيلك شايل الخريطة وماشي في شوارع السودان وعامل فيه عنتر اللي اكتشف القمر وفجاءة تلاقي نفسك في غابات اكلي لحوم البشر
المهم
بجد واحشني ونفسي اقعد معاك قعدة مخلطة يعني بزنس علي صحوبية علي حاجات شخصية علي نميمة علي هلس
زي زمان
بس معلش الدنيا وحشة وربنا يجازي اللي كان السبب ويجعله في ميزان حسناتك
بالنسبة لموضوع الاهلي
اياك تكشف هويتك خليك في مرحلة جهرية الجنسية وسرية التشجيع علشان متتعرضش لوقف مش كويس من السودانينن وخاصة بعد ماتش الاهلي
وبخصوص طبق المهلبية اللي بست الاف جنيه يعني كدة انا ممكن اتجوز بخمس اطباق مهلبية
يا اخي
بلاش علشان عيب
ويللا مش مهم

Anonymous said...

بسم اله والصلاةوالسلام على رسول الله من يهيده الله فلا ضالا له وما يضلل فلا هاديا له الا الله العزيز الجبار وصلى الله وسلم على نبينا وامامنا وقائدنا محمد وعلى ال واصحابه اجمعين .
اولا لازم تعرف يا استاذ باسم انى زملكاوى بس بصراحه ان كنت بشجع الاهلى علشان كان بيلعب باسم مصر والكلام اللى انت عارفه دة لكن انا كنت عايز اقولك ان الانسان لازم يتعود على المواقف اللى بيتحط فيها وانت يا ابنى شكلك محطوط فى موقف لاتحسد عليه على راىء خالتى .المهم تبقى تطمنى علسك وانا بشكرك جدا يا بابيسو على النصائح الغاليه اللى انت بتدهالى وربنا يوفقك ويخليلك عمر وام اعمر وعايزينك تخاوى عمر بقى علشان لازم نكتر نسلنا والسلام عليكم ورحمه الله وبركاته اللهم ما عليك باليهود ومن عاونهم
صديقك الى ار تيهاوى الدكتور / محمد سعد

Anonymous said...

واحشني يا راجل
وتليفونك غير متاح والشبكه عندكوا نيله

المهم
خلي بالك من نفسك ومن أهلك

miro said...

اه ده خديجه حامل...على طول كده والله وهتبقى جد يا حسنى

Abdelnour.Mervat said...

باسم قرأت تعليقات زملائك الجميلة .. بس انا عايزة اقولك حاجة مهمة .. انا سودانية وعايشة في مصر يا جماعة .. ونفس الشئ بيحدث لي .. يوم ما يكون في مباراة بين مصر والسودان اخي ما بينزل القهوة . وطبعا احنا في البيت بنضحك عليه وبنقوله انت النهارده هتتضرب هتتضرب .. لو السودان غلب هتضرب من المصريين هيضربوك المتعصبين زي ماقال احمد السنونسي صديقك يا باسم .. وبرضه بننصحه بسرية التشجيع..والله انا بعتبر الواحد يستمتع بالكورة بغض النظر عن مين كسب او خسر دا هيكون احسن

Anonymous said...

ربنا يخلي