فى اكتر من مسمى للحفل البسيط اللى كان معمولى فى تريانون على النيل امام فندق شيراتون القاهرة من زملائى و افراد ادارة التسويق فى مصر
ممكن نسميها حفلة وداع...على اعتبار انى ماشى من الشركة و كان اخر يوم ليا فى الشركة الاربعاء الماضى و يعلم الله كم انا مستاء مفتقد الجو المرح للعمل مع هؤلاء المجانين .
و فى ناس بيسموها فوردور بارتى (Forward Party) على اعتبار انى ماشى على نقل من فرع للشركة لفرع اخر و على موقع وظيفى اعلى فبالتالى دى حاجة كويسة بيتعملها حفلة ...
و فى ناس بيسموها حفل الاحتفال بانتهاء عهد باسم الشربينى و التأمين على انه خلاص ماشى بجد و بالمرة نكسر القلل اللى نقدر عليها وراه...
بغض النظر عن المسميات ...انا بجد كنت مبسوط قوى قوى بالحفلة البسيطة...كنت مبسوط بالمشاعر اللى انتقلت بينى و بين قلوب الافراد كلهم مع كل احترامنا للكلام اللى اتقال فى الحفلة و عبارات الثناء لكن فى مشاعر نبيلة اتنقلت من القلوب و الى قلبى مباشرة و بدون تحريف...
نعم مشاعر رقيقة ...من طارق و هو يحاول اسعادى بجمع توقيعات الشركة كلها على تيشرت ليكون ذكرى لى لعلمه ان
ذلك سيدخل السرور على قلبى..من هبة و هو تحاول استنطاقى بافضل الاماكن التى اود الذهاب اليها و بمجرد خروجها بمعلومة انى احب الجلوس على النيل خططت و مسحت الاماكن للبحث عن مكان جيد على النيل لنجلس فيه...
من احمد سمير اللى كان فاكهة الحفلة بالبرنامج الثرى و حرصه على ان كل الناس تخرج مشاعرها تجاهى فى الحفلة و العكس و اصراره على ان يضفى روح الاخوة المجردة من اى مصالح على الحفل.
من هادى اللى تعب فى لف الهدية علشان تطلع فى ابهى صورة و اللى قد ايه كلامه اللى قاله فى الحفلة كان قوى و مؤثر ...من المهندس حاتم اللى اتكلم فى حقى بكلام اول مرة كنت اسمعه منى فشكراً يا بشمهندس
و حتى من خالد اللى ملحقناش نقعد مع بعض بس كان حريص على الحضور و المشاركة فى هذه اللحظات الجميلة.فعلاً كانت حفلة جميلة و آثرت فيا جداً...
العودة للأقاليم
نعم عدت الى المنصورة...
نعم سلمت شقتى و قطعت عقدها و رميت مفاتيحها...
نعم عدت الى المنصورة...
نعم جمعت حاجياتى و عفشى فى عربة و ركبت انا ومراتى و ابنى (عمر افندى) فى عربة و عدنا الى المنصورة امس الجمعة 15 يونيو 2007 بعد 11 عام من الاقامة بالقاهرة منذ يوليو 1996
فجأة وجدت نفسى ليس لى اقامة ولا مكان للمبيت بالقاهرة ...فجأة احسست هذا الاحساس و انا استيقظ من نومى اليوم...و لكن هذه هى الدنيا ...اجازة لمجة اسبوعين بالمنصورة لانتقل بعدها الى العيش فى دولة اخرى (السودان الشقيق) و العمل و الاقامة هناك...ادعو لى بالتوفيق
4 comments:
teroo7 tegee bel salamaa ya besoo , wala million 7aflet wada3 na7ki feeha 3an masha3arna hatkafii. ya rab tekoon mabsoot w ya rab yakon kol el khier mestaneek fe sudan :) We love u ya besoo ... mafeesh fe donit kol wa7ed feeena 2 basem el sherbeiny.
انا هبدأ من الأخر :
أولا انت ليك مقر اقامة فى القاهرة يا معلم .. بيت الأمة فى ميدان لبنان الشهير بمقر طارق عبد المحسن هو مقر اقامة ليك حتى لو ليك شوية تحفظات عن الأختلاط فى الشقة بس بردو هتفضل مطرحك .
ثانيا : ايه راجع الاقاليم دى ؟ عيب عليك أنت من المنصورة .. عارف يعنى ايه من المنصورة ؟ المنصورة اللى الراجل منها بالف ويزيد ... طب ياريت ربنا يمن عليا وارجعلها أبوس ترابها وامرمغ راسى فى ثراهاالطيب بدل القرف اللى هنا ده ..
اما بالنسبة للحفلة فدى أققل حاجة يا معلم بجد أقل حاجة ده انت طول عمرك صاحب واجب وفضل علينا كلنا بلا استثناءوانت فاهم... جمعاء ..جمعاء ..ده بالاضافة الى ان اللى ملوش خير فى اهله ملوش خير فى حد .وخلاص بقى اصل موضوع الفراق ده حديث ذو أشجان والمكتب بقى بيضان أوى أوى والواحد بقى ملوش مزاج يشتغل بس يالا . كنت بردو بتحفز الواحد على انه يبدع علشان يجيبك وينافسك .. دلوقتى قعدتى مع هادى هتجيبلى تخلف عقلى .
بسم الله الرحمن الرحيم
"وَمَا لَنَا أَلاَّ نَتَوَكَّلَ عَلَى اللّهِ وَقَدْ هَدَانَا سُبُلَنَا وَلَنَصْبِرَنَّ عَلَى مَا آذَيْتُمُونَا وَعَلَى اللّهِ فَلْيَتَوَكَّلِ الْمُتَوَكِّلُونَ (12)وَقَالَ الَّذِينَ كَفَرُواْ لِرُسُلِهِمْ لَنُخْرِجَنَّـكُم مِّنْ أَرْضِنَا أَوْ لَتَعُودُنَّ فِي مِلَّتِنَا فَأَوْحَى إِلَيْهِمْ رَبُّهُمْ لَنُهْلِكَنَّ الظَّالِمِينَ (13) وَلَنُسْكِنَنَّـكُمُ الأَرْضَ مِن بَعْدِهِمْ ذَلِكَ لِمَنْ خَافَ مَقَامِي وَخَافَ وَعِيدِ (14)
حسبنا الله ونعم الوكيل
الى المجهول الاول
شكراً جزيلاُ على المشاعرالجميلة دى
إلى طارق
يا باشا ربنا يخليك انا عارف انك سداد و صاحب واجب ...و دى طباع قوم المنصورة الاصليين امثالك
و خلىبالك من هادى و احمد اولادى عندكم فى المكتب
الى المجهول اتنين
جزاكم الله خيراً على مساندتك ليا ...و نصيحتك اللى فى تعليق مدونة منمصر للسودان موش قادر انساها...فجزاكمالله خيراً يا ابوحميد
Post a Comment