نعيما يا حاج

نعيما يا حاج

ايه يا مجدى الصورة التحفة اللى انتا حاطتها على الماسنجر دى و ايه النظرة الجبارة بتاعت الحلاق لقفا الراجل دى
دى صورة من قلب مصر و عندها غيرها كتير عندى الست المصرية الطيبة و عندى و عندى تحب ابعتهوملك
لا موش عايزهم انا عايز دى بس و كمان هستعير اسمك على الماسنجر لو سمحت "نعيما يا حاج"
يا بن اللذينا ...دا انا كنت ناوى بعد العيد اعرضها مع بعض الصور دى فى سلسلة تدوينة بدون كلام و اطلب عليهم تعليقات
يا مجدى ابقى اعمل كده متقلقشى انا هتتطرق لحاجة شخصية موش هتكلم عن الصورة

انتا تأمر يا بن عمى...الصورة اهيه استقبل انتا بس

دا كان الحوار اللى دار بينى و بين مجدى سعد صاحب مدونة يلا موش مهم اللى لقيته بيفكرنى بحالتى دلوقتى التى امر بيها الان

قبل ما ابتدى الكلام عايز اشكر كل اللى دعالى علشان الحفلة اللى كنت مشغول فيها الحمد الله خرجت بشكل ممتاز و خلاص بدأت افضى تانية شوية علشان ارجع للمدونة مرة اخرى.

نرجع لموضوع نعيما يا حاج

انه 21 يونيو 2007...اخر مرة حلقت فيها يعنى منذ 100 يوم بالتمام و الكمال منضربشى فى راسى مقص...

اخر مرة حلقت فيها كانت يوم ما عمر حلق لتانى مرة فى حياته...و كان مدحت الحلاق بتاعى بيودعنى و هو شاريلى عده حلاقة كاملة (فوطة و امشاط و فرش و مقصات) لتكون الحصن الواقى لى من الامراض فى السودان او فى مصر فيما بعد ...خوفا من انتقال الامراض و لانه خوفنى فا انا وسوست و قررت الا احلق فى السودان حتى اجد مكان احس بالامان فيه ... و اطمن له.

صورة لعمر افندى خلال اخر حلقة له عند مدحت

طيب عمر افندى...عمر افندى جربت فيه مرتين و بطريقتين مختلفتين تجربة الحلاقة البيتى و فشلت للاسف فشل ذربع...ففى المرة الاولى عقد العزم و قعدته على كرسى و ضربتله الفوطة و بدأت اشرع فى استخدام المقص و كما كان يقوم مدحت بالضبط ...حتى ابراهيم مساعد مدحت الذى نوهت عنه فى حادثة المزين من قبل فكانت تقوم بدوره ام عمر و بقولها زى ما كان مدحت بيقول لابراهيم (لاعبه يا ابراهيم ) و هية تلاعبه بنفس الادوات و لكن هيهات هيهات...فبعد عشر دقائق فقط بدأت الفجوات تظهر فى شعر الافندى بتاعنا و بدأنا نحس بفشل التجربة و بدأت علامات التذمر تظهر على ام عمر و هى تعلق بقولها ادى العيش لخبازه...و اصبحت رأس عمر لا تسر عدو ولا حبيب...

صورة لعمر افندى خلال اخر حلقة له عند مدحت

مضى شهر على هذه الحادثة و سعرى يزداد فى النمو و شعر عمر افندى بدأت تلتئم فجواته و يظهر بمظهر مقبول و هنا لاحت لى فكرة ...انا اقوم بشراء ماكينة كهربائية بدل من مقص المحترفين اللى عندى ...و بالفعل اشتريت الماكينة و اخترت افضل مكينة فى السوق على الاطلاق رغم ارتفاع ثمنها...و بالطبع قررت التجربة فى عمر افندى قبل انا اخوض التجربة بنفسى...و جاءت ام عمر لتقوم بدور ابراهيم و تلاعبه ...و بدأت انا و كلى ثقة بانى الموضوع موش كيمياء و هظبط درجة الماكينة و اخد الاجناب و من ثم اظبطها على درجة اعلى و اخد قلب الرأس...و بعد مرور نفس العشر دقائق ظهرت نفس الفجوات و باءت التجربة بنفس النتيجة الفاشلة مع استياء شديد من ام عمر لما آل اليه رأس عمر افندى المحبب اليها.

ها نحن مرت علينا 100 يوم على اخر مرة لمست يد حلاق محترف رأسينا و ها نحن عائدون الى قاهرة المعز فى عيد الفطر لنسترجع تلك اللحظات و لاكتساب قورص مهنى من مدحت فى كيفة التعامل مع الاداوت فلم يكفى الاستحواذ على الادات كى نتمتع بحلاقة مرضية.

و اخيرا صورتى بعد اخر حلقة و صورة حديثة من حفلة الامس التى نوهت عنها سابقا علشان تشوفوا الفرق بين حجم الشعر بعد مرور 100 يوم
و نعيما

ابقوا معنا

ابقوا معنا

مشغول قوى فى تنظيم الحفل ده و علشان كده موش فاضى يا جماعة ...مطلوب منكم تدعولى

الحفلة تنجح و تدعولى اقضى رمضان بخير و مقبول من الله وجميعا انشالله معتوقين ...

هرجع ادون انشالله لما الدنيا تروق شوية متقلوقوش...و عندنا حاجات كتير عن عمر و عن ابو عمر هنكتبها بس لما نروق.

و على سبيل المثال لا الحصر للمدونات المنتظرة قريبا انشالله

عمر أفندى للموز

نعيما يا حاج

اسكندرية السودانية

ابوعمر و الاستحقاق الرئاسى

جيمى و رشيد و وجهة نظر

كل دى مواضيع انشالله ربنا يعينى و تطلع للنور قريبا

ابقوا معنا

ابو عمر و ابوه

اشوفكم على خير

اعتذار واجب

اعتذار واجب

السادة رواد المدونة الافاضل

نعتذرعن عدم التدوين للفترة الماضية لظروف خارجة عن الارادة و كل سنة و انتم طيبين و رمضان كريم و سنعاود التدوين قريبا انشالله و معى شريكى فى المدونة عمر افندى بالطبع...فانتظرونا

عمر أفندى و أبووه

رمضان من السودان

رمضان من السودان

كل عام و انتم بخير بمناسبة شهر رمضان المعظم اعاده الله علينا جميعا بالخير و اليمن و البركات

خلونى افضفض شوية علشان انا مبقوق (مصطلح يطلق فى لحظة غيظ شديد) مبوقوق من السودان و السودانين فى رمضان...

ابدأ منين...

خلينا نبدأ من استقبال الشهر اصلاً ...عادى ...يعنى ايه عادى؟؟؟ يعنى عادى ...عادى بكل ما تحمل الكلمة من معانى...يعنى مفيش تهانى و لا فرحة...مفيش زينة بالشوارع نهائيا...مفيش فانوس منور فى شارع واحد يوحد ربنا....مفيش لمبة على جامع...مفيش فرع نور فى حارة ....كل المعالم الجميلة اللى بتحسسك ان اه فى حاجة حصلت فى شهر كريم هل فى مناسبة عظيمة على الابواب...مفيش...كل شىء (عادى)

حتى الناس ...فى جملة فى مصر بتسمعها موش اقل من مليون مرة فى اخر اربع خمس ايام فى شعبان و اول اربع خمس ايام فى رمضان ...اى حد يشوفك يقولك رمضان كريم يا عم باسم و انتا تقوله الله اكرم يا حتومة...كل الناس بتقول لبعض رمضان كريم ...الله اكرم ...كل الناس بتهزر مع بعض و بتقول هتصوم ولا زى كل سنة.. و التانى يرد بابتسمامة و يقوله طبعا زى كل سنة...كل الناس بتقول لبعض كل سنة و انتا طيب ....

و انا شغال فى الاى ار تى لمدة خمس سنوات ...كانت فى عادة جميلة قوى و دى الاى ار تى يعنى ممكن الناس تقول دى مؤسسة اعلامية و ملهاش فى الدين...كان المينى الرئيسى 6 ادوار و فيه ما لا يقل عن 300 موظف و كان اخر يوم فى شعبان معظم الموظفين بيلفوا على المكاتب لمجرد تقديم التهانى لبعضهم حتى لو مكنتش اعرف المكتب ولا الناس اللى فيه كنت بعدى عليه و هو بدوره بيعدى علينا فى مكتبنا...وفى اى تو مصر كان العدد اقل فا كنا كلنا بنهنى بعض و الشركة كمان بتظبطنا بشنطة ياميش محترمة و لو مفيش ياميش فى منحة اسمها منحة رمضان....انما هنا...عادى مفيش اى حاجة ...

SMS

انا جالى لحد دلوقتى 132 رسالة تهنئة برمضان على موبايلى السودانى و فى 23 واحد بعتولى على موبايلى المصرى اعتقادا انى لسه فى مصر و هو علشان معايا فى السودان و فاتحه فا وصلونى....مفيش فيهم رسالة واحدة من شخص سودانى....موش كلاللى بعتولى من مصر فيهم من مصر و من السعودية و من الكويت و من الامارات و من امريكا و من المغرب ...لكن ان سودانى يبعتلك رسالة يحسسك انه فى رمضان هنا ...لا ابدا

افضل الرسائل اللى جتلى هستعرضها معاكم برضه على السريع

فاطمة نور الدين من مصر
" أسأل الله الذى اخرج ماء زمزم فرجا لهاجر ان يخرج لك فرجا و بركهو سعادة لا شقاء بعدها و ان يعفو عنك و يجعلك من عتقائه من النار و ان يختصك من بين خلقه فى شهر رمضان و يقول و عزتى و جلالى لا ارد لك دعوة"

محمد الشحات من السعودية
"أسأل الله ان يعطيك اطيب ما فى الجنة (محبة الله)وان يريك اجمل ما فى الجنة(رؤية الله)و ان ينفعك بانفع الكتب(كتاب الله)وان يجمعك بسيد الخلق(رسول الله)صلى الله عليه و سلم و كل عام و انت بخير.

دكتور احمد عبدالعاطى من الجزائر(و دى رسالة لمستنى جدا)
"رمضان كريم بكل حب و شوق و أمل فى لقاء بالفردوس الاعلى نستقبل رمضان مفتقدين احبة كنا نحب ان نكون معهم و لكن حسبنا اتصال القلوب و دعاء بقبول الطاعات احمد و الاسرة"

خالد الحداد من السعودية (و دى اظرف رسالة جتلى السنة دى)
"يا مشمش قلبى يا بلح حياتى يا كنافة عمرى كل رمضان و انتى قمر الدين بحبك و بموووووت فيكى"

غالبا كان باعتها لمراته فى مصر بس و قال يتحى معايا و يبعتهالى انا كمان يمكن احب ابعتها لمراتى بس موتتنى من الضحك امبارح .

انا عايز عادل مسلم

ركبنا العربية ...تذمرت تذمرا‘ شديدا و قولت لمراتى مليش دعوة انا عايز عادل مسلم

دا اللى حصل بالضبط بعد انتهائنا من صلاة الترايح امس فى اول ليلة من ليالى رمضان....نجيب الحكاية من اولها ...ضربت الجلبية البيضة و البرفان الجامد و عمر افندى كذلك و نزلنا ثلاثتنا استقلينا السيارة البيضاء ايضا ..تقولشى ملائكة ..و انطلقنا فى شوارع الخرطوم بحثأ عن مسجد كويس نصلى فيه التراويح...وصلت لانظف مسجد تقريبا بالخرطوم خلف المطار و كانت المفاجأة..مفيش مكان للنساء, و المفاجأة التانية بيصلى بتلات اربع ايات و اقلب على الركعة اللى بعدها ...نزلت انا من العربية صليت العشا و رجعت خدنا بعضنا و انطلقنا جريا و بحثا عن مسجد اخر افضل شوية ...
وصلنا مسجد فى شارع عبيد ختم و دخلنا قولنا نصلى بقى و امرنا لله و فى خلال تلت ساعة كان الراجل مفور الثمان ركعات مل ركعة بتلات ابع ايات و مرواح يا ولاد..
دخلت عربيتى و قولت لمراتى مليش دعوة انا عايز عادل مسلم....
عادل مسلم ده قارئ فى المنصورة صوته ملائكى ...بيصلى بينا القيام هناك منذ اربع سنوات ...بيصلى بربع فى الركعة يعنى جزء فى الليلة ولا تحس بطول الصلاة من جمال صوته و خشوعك و عدم سرحانك و تركيزك فى الايات خلفه...المسجد نفسه بيطفى جميع الانوار ليزداد تركيزك و خشوعك معه...أذكر انى صليت خلفه منذ سنتان فى صلاة تهجد و قرأ سورة يوسف فى ركعة و لميتذمر احد و خرج الجميع من الصلاة كانهم كانوا فى حفلة سينما يشاهدون فيها قصة سيدنا يوسف عليه السلام من شدة تحكمه فى طبقات صوته و ارتفاعه و انخفاضه بحيث يجعلك تعيش داخل الايات بكل معانيها...

اللى يعرف عادل مسلم يقرؤه السلام و يقوله انى احبه فى الله و مفتقده جدا ...و مفتقد ياسر سلامة فى مصر و مفتقد الشيخ رجب فى الرواس اللى كان بيصلى بينا السنة اللى فاتت بجزئين و اكتر كمان فى الليلة و هو الشيخ الكبير و الضرير مع ذلك لا يمل الناس و لا يتذكروا بل بالعكس الاعداد بالاف موش صف و نص زى اللى حصل معايا امبارح....
صف و نص يا عالم فى رمضان...صف و نص فى الجامع اللى صليت فيه العشا و صفين و نص فى الجامع اللى صليت فيه القيام

فانوس عمر أفندى

خرجت من الجامع مخنوق و قررت انى لازم على الاقل اروح و انا جايب لعمر افندى فانوسه ...السنة اللى فاتت روحت كارفور و قولت اجيبله فانوس مختلف موش تقليدى ...و لقيت الصين عاملين بطة فرو ظريفة كده بتغنى مرحب شهر الصوم مرحب بتاعت العزيز عبدالعزيز محمود طيب الله ثراه فا جبتهاله احسن من الفانوس ...السنة دى بقى الف و انحل فى البلد امبارح انى الاقى وحد يا ناس بيبيع فوانيس ...اى فوانيس...لا ممكن ابدأ زهقنا من اللف و كبينا بنزين من الترمبة على حد قول السودانين لما تحب تمون عربيتك علشان نكمل بحثنا عن الفانوس السحرى لحد ملقينا اللى قدامكم فى الصورة دى

خلى بالكم انا تعمدت اصوره ابيض و اسود علشان هو موضة سنة 1920 تقريبا و يليق عليه الابيض و الاسود...فانوس صغير صفيح و بشمعة و بخمسة جنيه يعنى خمساتر جنيه مصرى ...الراجل قد يحس قد ايه انا مستاء منه بس ما باليد حيلة و كده فا عطانى الشمع هدية بدون ما ياخد فلوسه...مراتى فى العربية و احنا مروحين بتقولى دا مشكاة اصلا موش فانوس ...محاولتش اسألها يعنى ايه مشكاة و اقنعت نفسى ان هو ده الفانوس اللى اسماعيل ياسين حكه فى فيلمه الشهير اسماعيل ياسين و الفانوس السحرى و طلعله منه العفريت قاله (أؤمر يا مصطفى)

عمر افندى فضل يحك الفانوس مطلعشى حاجة فا بدأ فى تفكيكه لقطع للبحث عن العفريت

حتى الهلس يا ناس

حتى الهلس يا ناس موش موجود هنا....يعنى لا خيم رمضانية ولا سهرات ولا قهاوى ولا شيش ...يا جماعة الحياة هنا عادى ...انا موش بقول عايز اروح بس الروح نفسها بتاعت الشهر بصفة عامة موش موجودة ...انا بحكم شغلى فى التسويق و فى شركة كبيرة فا السنة اللى فاتت لبيت اكتر من دعوة لحضور سحور و فطار فى خيم زى عمر الخيام و سوليدير و سى عمر و سنجارية و غيره...فى رمضان حتى عند اللى بيهلوسوا و عارفينازاى يحيوه على طريقتهم الخاطئة..انما هنا حتى دى كمان موش عاملينها.

و كمان الياميش و المكسرات و الفرش الفظيع للمعروضات دى فى مصر امام المحلات و الهايبر ماركتس ...مفيش هنا غير صندوق بلح و شوية زبيب على مدخلكل سوبر ماركت و كان الله بالسر عليم

خاتمة

نهاية ادعو لنا بأن يوفقنا الله تعالى فى هذا الشهر و يتقبله مننا و اللى عايز يكتب كلمة يصبرنا بيها يكتب و اللى عايز يشمت فينا برضه يكتب و يطلعلنا لسانة علشان هو بيصلى ورا الشيخ رجب ولا الشيخ عادل...و كمان اللى عايز يدعى لوالدى(اللى على يمين الصورةو اللى على الشمال ده حبيبى عمو سيد حمايا) يا ريت ندعى لبابا من قلبنا فى وقت الافطار و القيام لانه كان راجل طيب رحمه الله و كان موجود معانا رمضان الماضى فخلينا كلنا نفكر و نشوف يا ترى مين فينا موش هيبقى موجود رمضان اللى جاى ...و لو انا طيب انا هعمل ايه بقى فى رمضان ده لو هو فعلا اخر رمضان ليا ...فكر فيها براحة و انتا هتعرف انتا عايز تعمل ايه كويس و هتشوف همتك عاملة ازاى.

و كل عام و انتم بخير

عمر افندى يصوم فى رمضان

عمر افندى يصوم فى رمضان

خبر عاجل/ لقد قرر السيد عمر أفندى مشاركة والديه مشاعرهم فى رمضان و البدء فى الصيام و ذلك حتى الشروق فقط هناك احتمال انه لو فضل نايم كمان شوية ممكن توصل فترة صيامه حتى الساعة العاشرة صباحا على أكثر تقدير و هذا الامر يعد إنجازا بكل الاحوال فهو الذى طالما يحرص على مشاركتنا افراحنا و اطراحنا فلم يكن من الطبيعى ان يفوت هذا الحدث و هو شهر الخير شهر رمضان بدون ان يشاركنا اللحظة بما يستطيع .

رمضان شهر الخير

و الله بجد الاسم ده على مسمى ....فعلا رمضان شهر الخير ...خير فى كل حاجة ,خير فى الاكل الكتير ,خير فى عمل الطاعات,خير فى الاجر و الثواب,خير فى صلة الرحم,خير فى رواد المساجد,خير فى القيام و التهجد,خير فى قراءة القرآن و العودة للمصحف...

بلغة التسويق اللى هية اكل عيشى كل سنة بيبقى فى بيك سيزون يعنى الموسم البيعى الاعلى و اللى بيكون فى مصر طبعا موسم الصيف ...و ده كنا بنعمل علشانه تجهيزات جامدة جدا و لازالنا ...الاهتمام بموسم الصيف لا يفوقه اهتمام..لان دى الحملة اللى لو عملناها بشكل جيد و ضربت بتعلى مبيعات الشركة من الضعف ..تقدر تقول التلات اضعاف لو عايز و دا حصل بالفعل فى حملة صيف 2006 اللى كانت باسم (وان تو هنصيف مع اى تو) ..طيب يعنى ايه اتعملت بشكل جيد اللى عدت علينا من شوية دى...يعنى اتعمل البرموشن اللى يجذب العميل انه يشترى انه يجرب و يشارك و بيقولك كمان فى علم التسويق ان البرموشن حلاوته انه يكون ليه وقت محدد ..ليه بداية و نهاية و معروف...و انك كعميل لازم تحس بفرق انك تشترى دلوقتى و تستفاد بالبرموشن من عدم الشراء و انك تفوت عليك الفرصة.

و ربنا سبحانه و تعالى جعلنا شهر رمضان ده شهر البرموشن ...و موش اى برموشن ...دا بيقش كل الحملات التسويقية اللى فى الوجود كله ...و فترة تنطبق عليها الجملة اللى فاتت انك لو ملحقتش عروضه ...موش هتعرف تعوضها فى اى وقت تانى فى السنة ...يعنى السنة هتجازى عليها باجر فرض ...و الفرض هتجازى عليه باجر 70 فرض ولا الصدقة ولا صلة الرحم ...جزاؤهم عظيم فى هذا الشهر الكريم ...ناهيك عن قراءة القرآن ..و فوق دا كله ربنا سبحانه و تعالى علشان منتوهشى مقسملنا الشهر لتلات اتلات ..اوله رحمة عشر ايام نطلب منه الرحمة و لما يرحمنا ندخل على التلت التانى و اوسطه مغفرة و لما يرمتا يغفر لنا انشالله و عندها نبقى مؤهلين لدخول التلت التالت و هو العتق من النار فبعد ان يغفر لنا يكون جزاؤنا العتق من النار انشالله.

الجراند برايز

زى ما دايما فى اى برموشن بيكون فى جراند برايز او جائزة كبرى كل الناس بتلهث وراءها و بتخش البرموشن طمعا فى الفوز بها ...فى فى برموشن رمضان جائزة كبرة برضه و هية ليلة القدر ....فهى ليلة خير من الف شهر يعنى 83 سنة ...يعنى انا اتصلت لماما و سلمت عليها و صلت رحمى هاخد ثواب انى قعدت اتصل بيها كل يوم لمدة 83 سنة ....يعنى انتا لو تصدقت بنص جنيه على فقير او مسكين فى الشارع هتاخد ثواب انك فضلت يوميا تنزل تتصدق بنص جنيه و لمدة 83 سنة ...انتا متخيل هية اد ايه جائزة كبرى...صلاة قيام صوم عن كل ما يعصى الله قراءة قراءان كل ده اضرب يا معلم فى 83 سنة ....استغفار تسبيح ذكر ...كل ده اضرب فى 83 سنة ...يا جماعة دى فرصة لا تضيع الا على من لا يرضى الله عنه ولا يسمح له بان ينال هذا الاجر العظيم ...صدقونى و اللى موش راضى ربنا عنه ده اللى موش هيدى كويس فى اول عشرين يوم ...يعنى لازم اظبط كل امورى فى اول عشرين يوم علشان ربنا يكرمنى بيها فى العشر الاواخر..

و فى عرض خاص مميز جدا فى البرموشن ده كمان ...عارف ايه البلاوى اللى انتا هببتها فى حياتك من يوم متولدت و الى الان...كلها ممكن تتخلص منها و تخرج من رمضان ناصع البياض زيك زى عمر افندى فى حجم السيئات اللى يملكها.... قال رسول الله صلى الله عليه وسلم :"من صام رمضان ايمانا واحتسابا غفر له ما تقدم من ذنبه

يعنى انت مصليتشى الظهر يوم الاربعاء فى شهر اكتوير سنة 1990 كل ده انتا اتنيلت نسيته خلاص لكن مكتوب و هتتحاسب عليه يوم القيامة ...طيب اتخلص من البلاوى اللى عليا دى ازاى ...تتخلص منها بالصوم بس موش اى صوم ...الصوم ايمانا و احتسابا.

خلى بالك من نقطة مهمة ان كل العبادات اللى شرعها ربنا سبحانه و تعالى معروف البرايس ليست بتاعتها و معروف سعرها كام ...الصلاة ب27 حسنة و الصدقة بكذا و السلام عليكم هتاخد عليها كذا حسنة انما لو قولت لباسم يا طخين هتتاخد كام سيئة ...كل الحاجات معروف سعرها الا الصوم ...ربنا سبحانه و تعالى بيقول
روى البخاري عن النبي صلى الله عليه وسلم قال:
"يقول الله تعالى:كل عمل بن آدم له الا الصيام فانه لي, وانا اجزي به,
من عظم اجره فا خلونا نستفيد بالميزة السعرية الكبيرة اللى فى المنتج ده.

العرض سارى حتى نفاذ الكمية

طيب ينفع اخده بضعف التمن ...ايوة طبعا
يعنى بما انه حلو كده و بيكسب جامد موضوع الصوم ده ....هاتلى منه اتينين يمكن يشح فى السوق بعد كده او يمكن اموت قبل ما اخد منه تانى فى السنة الجاية ....ربنا سبحانه و تعالى سمحلك انك تاخد من المنتج ده زى منتا عايز بالعدد اللى انتا تختاره و مفيش كمية محدودة بطريقة بسيطة خالص ..
قال رسول الله صلى الله عليه وسلم :"من فطر صائما كان له مثل أجره غير أنه لا ينقص من أجر
الصائم شيئا"
يعنى كل يوم 10 جنيه بس اعملى فى الشهر 300 جنيه دول طلعتهم فى اول الشهر بنية افطار صائم ...اخدت ثوايى و ثوابه...و يمكن ثوابه يكون اكتر لو اخلصت فى لحظة تصدقى لانى مضمنشى اخلاصى طول فترة صيامى على مدار الشهر...و ال 300 جنيه دول ممكن تدفعهم فى عشوة فى فرايديز انتا و مراتك فا خرجهم و فك الكيس شوية.


خلاصة القول

يا عم الحاج يا ست الحاجة
كل سنه بتدخل رمضان بقلب جامد وتقول هعمل واسوى . وكل سنه بتيجى بعد اول اسبوع وتبدء همتك تنزل واحده... واحده ... واحده وانت شايفها ومش قادر تعمل حاجه وكل سنه تقول السنه دى غير كل سنه انا السنه دى
هكسر الدنيا و....... ايه رايك بقه ان انت السنه ديه هتكسر الدنيا بجد وهتعمل اللى مكنتش قادر تعمله

فكر فيها بمعايير المكسب و الخسارة اللى كلمتك بيها فوق و اللى اتعمدت اكلمك بيها علشان ميبقاش كلامى مكرر و اسهل للوصول لينا كلنا ...و تخيل لو انتا كمان خدت لينك الموضوع ده و بعته لكل اللى تعرفهم و الله هتاخد اجرهم كلهم و تدينى انا كمان حتة من التورتة دى ....يعنى مصلحة مشتركة ...و صدقونى انا موش عايز من ورا الانتشار للموضوع ده دعاية للموقع اد منا عايز دعاية للبرموشن و ثواب من رب العالمين ....ربنا يتقبل منا جميعا

كل سنة و انتم طيبين

ابو عمر افندى

عيد جوازى الثانى

عيد جوازى الثاني

2 -9-2007

على رأى المصرى اليوم...زى النهاردة

صورتى و انا عندى 6 سنوات بس انا لعبت فيها بالادوب بالشكل ده سنة 1997

زى النهاردة من سنتين كان فرحى ...النهاردة عيد جوازى الثانى...مر عامان على زواجى من احب خلق الله الى قلبى..زوجتى شيماء....مناسباتنا كلها فيها بركة و يمكن ده اللى مباركلنا فى جوازنا.

شوفتها اول مرة من غير ما تعرف علشان اخد قرارى بالتقدم اليها فى صلاة القيام فى رمضان 2004 بمسجد مجمع الرحمن بطلخا دقهلية و كنت واخد اجازة من شغلى فى ال اى ار تى 3 ايام مخصوص علشان الموضوع ده و فضلت الثلاث ايام اخرج من الجامع و استنى لحد ما اشوفها و اروح اصلى استخارة.

اتخطبنا فى العيد الضغير و ده كان نفس يوم كتب كتاب واحد من اعز اصدقائى و هو خالد الحداد..

انا و بابا الله يرحمه و حمايا فى حفل الخطوبة و تلبيس الدبل

و كتبنا كتابنا فى العيد الكبير بعد شهرين خطوبة بس و قصرنا فى المتكسر علطول بعد ما كل واحد فينا حس ان هو ده الشخص اللى كان مستنيه.

و عملنا حفلة بالمناسبة دى و كانت حلوة قوى و فى يوم برد قوى قوى قوى و هو الثالث من فبراير 2005.

بابا الله يرحمه و انا فى المنتصف يوم عرسى و عمو صالح ابو خالد الحداد صديق عمرى اللى اشرت اليه فى التدوينة هنا

و اتجوزنا فى الاسراء و المعراج...و هو نفس التاريخ اليوم الثانى من سبتمبر و لكن منذ عامان يعنى 2005 برضه...و فرحنا كان عبارة عن زفة عربيات خفيف خفيف من المنصورة رأسا الى القاهرة مع توديع اصدقاء المنصورة للفرح على حدود الدقهلية و استقبال اصدقاء القاهرة للفرح فى ميدان مصطفى محمود بالمهندسين و الانطلاق الى منزل الزوجية بفيصل...و الطريف ان جارى اللى فى الشقة اللى فوقى وافق زواجه نفس يوم زواجى و اسم زوجته نفس اسم زوجتى مما ابهجنا و جعلنا نصر على دخول العمارة فى نفس اللحظة ...باسم و ايمن و الشيماءتان.

هذا الزاوج حدث قبله بثلاث اسابيع فقط حدث مؤثر و هو استقالتى من الاى ار تى و التحاقى بالعمل فى شركة اى تو....تابع تدوينة ابوعمر فى سطور2..و دى كانت مغامرة و الحمد الله ربنا وفقنى فيها جدا.

الى جميع العزاب

حلو الجواز...اه حلو و فيه من الاستقرار النفسى و العاطفى و الاجتماعى الكثير و حسيت بعد الجواز انى اتجوزت فى 2005 و انا مديون زى كل شباب مصر و فى شقة ايجار جديد زى كل شباب مصر و كنت اقدر اتجوز مثلا فى 2003 و انا مديون برضه و فى شقة ايجار جديد بس النصيب و لكن نخرج من ده بقول لا تؤجل جوازة اليوم الى الغد ...استعن بالله ولا تعجز...جدد نيتك انك تبتغى بالجوازة دى وجه الله و هو هيرزقك و هيفتحلك ابواب الرزق الواسعة من عنده ,,,

الى جميع المتزوجين

ربنا يكرمك و يهدى سركم و انصحكم نصيحة غالية جدا ...بالا تسمحوا لانفسكم ان يمر عليكم عيد جواز و انتم فى السودان ابدا ...لانى لا اعرف اى مكان اجيب منه حاجة عدلة لمراتى ولا لابنى ...ولا تى مكان عدل نقعد نتعشى فيه..يعنى يوم كان ممكن يكون احسن بكتير لو كنت فى مصر او حتى فى السنغال.

الى ايمن و مراته

انتم اصدقاء و رفقاء كفاح منذ عامان تزوجنا فى يوم واحد ...و عندنا دلوقتى عمر و انتم عندكم رفيدة و خليدة...ربنا يكرمكم بيهم و نشوفهم عرايس و ينبتهم نباتا حسنا.

الى النادى الاهلى

سايق عليكم النبى يا رجالة لتنصفونا النهاردة قدام اسيك و ترمونا من ام البهدلة اللى اتهدلناها هنا كمصرين من يوم ما وكستونا امام الهلال و يا عم ابو تريكة اتعب شوية معانا النهاردة علشان خاطر اخوك باسم فى السودان ...خليها تبقى هدية عيد جوازنا منك انتا و الشيخ حسنى...و يا حضرى و الله بتاع الخضار امبارح بيقولى راح نجابلكم فى النهائى و نرجصلك الحضرى تانى بالتلاتة برضج....طب اقوله ايه يا حضرى بزمتك بعد ما فضحتنا.

الحضرى و رجالته و هما راجعين من ستاد ام دورمان عقب مباراة الهلال و ابوتريكة مصاب فى فندق هيلتون و قبل سفرهم بساعة و التصوير لعلى عبدالمنعم

كفاية كده علشان اخيرا فى واحد سودانى حن عليا و وصفلى محل ورد هنزل اروح اشوفه يمكن يطلع حلو و اعرف اشترى منه ورد لمراتى...

كل سنة و احنا طيبين

تحديث الاثنين 3 سبتمبر:

إلى النادى الاهلى..انا متأكد ان ابوتريكية نزل علشان هو قرأ التوينة دى قبل المطش فا ضغط على نفسه و جاب جون علشان ميزعلنيش ...هو ده دور الاعلام يا جدعان...شكرا يا تريكة على انك فرحتنا امبارح و اخيرا عقت علم الاهلى على الشباك بتاع العربية و لبست الزمبيل و لفيت بالعربية زى ما كنت ناوى اعمل يوم مطش الهلال بس محصلشى نصيب ...

إلى كل بتوع الورد فى مصر...اللى يعرف يجى يفتح كشك هنا فى السودان يا ريت يجى ..لان الوردة الواحدة و خلى بالك من الواحدة دى قوى موش الكبشة ولا البوكية وولا اللفة زى ما هو موجود عندنا فى مصر ...الوردة الواحدة بعشرة الاف جنية سودانى قديم اللى هية عشرة جنية سودانى جديد يعنى حوالى 30 جنية مصرى ...يعنى لو عملت لفة فى ايديك بعشرة وردات زى اللى العيال بتوع الجامعة فى مصر بيبوعوها قدام الجامعة يوم عيد الحب بخمسة جنيه...هنا هتتكلفلها 100 الف جنيه سودانى قديم اى ما يعادل 100 جنيه سودانى جديد يعنى 300 جنيه مصرى...و البنت لما سألتها بتعجب عن السعر العالى قوى قوى ده ...قالتلى موش لسه بنستورده من عندكم من مصر و طيران و تلاجة و غيره يعنى بيكلفنا كتير ...روح افتح مزرعة عندك فى مصر و انتا تكسب كويس قوى لو استغلت على السودان بس ...ده ردها...مفيش حد من بتوع الورد المصريين بيفكر بقى.