اهرام الجمعة

اهرام الجمعة

اهرام الجمعة من الجرائد اللى بعتبرها مهمة جدا فى حياتى...عادة اعتدت عليها منذ اكثر من عشر سنوات و هى قراءة اهرام الجمعة ...و يوم الجمعة ميبقالوش طعم من غير اهرام الجمعة...بقرا كل صفحاته على الاطلاق و كل اعلاناته بلا استثناء...

منذ ايام الجامعة و انا اقراه لحبى للرياضة و كنت ببدأ الجورنال بابراهيم حجازى خارج دائرة الضوء...و بعد كده اتخرجت و كان لزاما عليا انى اقرأه علشان اعلانات الوظايف لشركات الادوية بحثا عن عمل و كان يتبع ذلك بيومى السبت و الاحد ببعت سيفيهات لكل الشركات و لا كان حد بيعبرنى.

بعد كده دخلت فى مرحلة عبدالوهاب مطاوع و بدلت افتتاحية القراءة للجورنال من ابراهيم حجازى لعبدالوهاب مطاوع بريد الجمعة (الله يرحمه) الى ان دخلت عالم التسويق و بقيت ببدأ الجورنال من صفحة 17 الى صفحة 30بصة سريعة الاول و بعدين اقراه بالتفصيل...طيب من 17 الى 30 بصة سريعة الاول ليه علشان اشوف الاعلانات اللى نزلت كله لان من 17 الى 30 بس دى الصفحات الالوان فى الجورنال يوم الجمعة و عليه بتكون هية دى اللى فيها الاعلانات و احللها و اتفرج على اماكن الشركات فى الصفحة و الرسايل الموجهة من كل اعلان و غيره و غيره و بعد كده برجع اجيب الجورنال من اوله تانى الى اخر جلدة ..

غالبا ما بتبدا قراءتى للجورنال من بعد الصلاة الى العصر...كنت دايما زوجتى تنبهنى الى انى فى زيارة الاهل و مبيصدقوا يقعدوا معانا ساعتين علشان هنرجع القاهرة تانى و نسيبهم بفضل ممقق عينيا فى الجورنال ولا بتكلم مع حد ولا بهتم بالاجتماع العائلى الاسبوعى على الاطلاق ...فكنت بحاول اتغلب على هذا الامر و غالبا ما كنت بفشل.

وصلت السودان منذ 17 يوم و 11 ساعة و اهرام الجمعة من الحاجات اللى فى اول جمعة نزلت بالخريطة المعتادة بتاعت الخرطوم و دورت العربية و انطلقت للبحث عنه...و لمدة ساعتين من البحث عن بتاع جرائد اساسا وجدت باعة جائلين بس معندوش جرائدمصرية و بعدها وجدت مكتبة كبيرة معندهاش من الجرائد المصرية غير روزا اليوسف...ليه موش عارف ؟؟؟

و بعدين لقيت كشك ظريف قالى صاحبة " لسه حسة جاى" يعنى لسه دلوقتى واصل على طيارة مصر للطيران و لقيته هو و الاخبار و الاهرام و روزا اليوسف برضه .. ومن يوميها فاتت جمعة تانية روحت للحاج بتاع حسة ده و جبت منه برضه و ربنا يديمها عادة و يكرمنا بيه.

بس اللى عايز اسأله اخبار و اهرام و جمهورية اهي جرايد قومية و محدش يقدر يقول عليها حاجة ...انما روزا اليوسف ...اشمعنى؟ على اساس ايه ؟ على اساس انها بتوزع كويس فى مصر ولا على اساس انها بتعبر عن المعارضة فى مصر ولا علشان كلمات عبدالله كمال تتوزن بالدهب فا لازم كل الوطن العربى ميتحرمشى منها...طيب متبعتولنا على الطيارة عددين مصرى اليوم على عدد دستور كمان يا جماعة ...

بالمناسبة نبذة بسيطة عن جرائد السودان للثقافة العامة...فى اكثر من جريدة هنا و لكن افضلهم و اكثرهم مبيعا هى (الصحافة- الرأى العام-السودانى-اخبار اليوم-اخر لحظة و دى اقربهم للمصرى اليوم عندنا كده و بقالها سنة بس)

و فى جريدة رياضية يومية اسمها (قووون) يعنى جوون بالمصرى و دى الاكثر مبيعا هنا لان البلد مهوسة كورة وبقالها 17 سنة بتصدر.

كمان عندهم 3 جرائد اعلانية زى الوسيط عندنا اسمهم (الوسيط -انتشار-لها و له)

عندهم كمان اذاعتين شبيهتين جدا باذاعة نجوم اف ام عندنا بس هنا اسمهم راديو الرابعة و مانجو96

اشوفكم على خير و اسلم عليكم بالسودانى (مع السلام و الرحمة)

الاهلى من السودان

الاهلى من السودان

الاهلى فى كل حتة...عمال يجيب اجوان

و زى ما راح افريقيا ...برضه راح اليابان

وبعده جاى السودان

هكذا كان يتغنى المطرب الفذ صاحب الصوت قصدى الوسط لانى بعتبره لا مطرب و لا زفت سعد الصغير جداً فى نظرى اللى بكرهه زيه زى محرم فؤاد بالظبط مع اختلاف لون الغناء لكل منهما

مبارةالاهلى و الترجى ...اول مبارة للأهلى منذ مغادرتى البلاد ...احساس مختلف انى نفسى اشوف المطش من منطلق وطنى قبل ما يكون من منطلق حبى للاهلى...عايز اتفرج عليه لعله يكون المتنفس عايز اتفرج عليه و انا معرفشى اى حاجة فى البلد نهائيا فلم يمض على وجودى بالخرطوم اكثر من اسبوع

لبس عمر افندى الطقم الاحمر الذى يعبر عن هويته الكروية و نزلنا الشارع الساعة السادسة و معنا اقرب شىء الى ايدينا طوال الاسبوع الماضى و هى الخريطة الخاصة بالخرطوم ..

استقلينا السيارة و حددنا موقع حوالى 6 كافتيريات على الخريطة فى اماكن مختلفة و انطلقنا للبحث عنهم و معاينتهم للتأكد ايهم ستكون انسب لنشاهد المباره بها انا و عمر و ام عمر.

احساس مختلف تماما لما تبقى فى بلد جديد عليكو مفيش فيها معين ولا مرشد ليك...معاك خريطة و كل يوم بتنزل تلف منطقة بناء على الورقة اللى فى ايديك و تستكشفها و تتهوه و ترجع على البيت و هكذا فى اليوم التالى منطقة اخرى

و رسى بينا الحال على جراند كافيه الموجود بطريق المطار...محل مصرى و كل موظفينه مصريين و الجميل ان دخلنا لقينا الاهلى هو الاهلى اينما كانت الوجه برضه عدد لا بأس به من المصريين من مشجعى الاهلى موجود و ملتف حول الشاشة ولا اكننا فى جراند كافيه فى المعادى مثلا.

اول ما دخلنا الكافيه ابوتريكة جاب جون مما بشرنا بمباراة ستكون ممتعة و شاهدنا المبارة بالكامل فى جو ممتع و حماسى

عمر افندى طبعا لان مكنشى على نفس درجة اهتمامنا بالمباراه اتصاحب على الوايتر بتاع المحل ...ولد مصرى اسمه مصطفى و بدأ يلعب معاه و مصطفى حبه لدرجة انه كان بيروح ياخد الاوردرات من الطربيزات التانية و هو شايله على ايديه.

انتهت المباراة و ملقيتشى حواليا حد زملكاوى احس عن طريقه بمتعة النصر على راى بلال فضل فى احد مقالاته اللى علق فيها على مبارة الاهلى و الزمالك الاخيرة فى الدستور فما كان منى الا انى بعت رسايل لاصحابى المهتمون بالشأن الكروى على الموبايل للتهنئة بالفوز.

زول صديق بالشركة نصحنى بعدم الاصرار على اشهار هويتى الكروية فى هذه الفترة تحديدا بعد ما الحضرى و شوقى ضربوا العيال بتوع الهلال فى مطش الذهاب فى ستاد القاهرة حفاظا على حياتى ...كمان نصحنى بعد الذهاب للاستاد يوميها لان السودانين مجانين كورة و ممكن اتبهدل و خصوصا انى كنت ناوى اروح الاستاد و مجهز علم للاهلى و زمبيل احمر لعمر...بس خلاص عدولت عن الفكرة

عمر بالزمبيل

حلوة عدولت دى....و هتفرج فى جراند كافيه برضه

و ابقوا تعالوا نورونا هناك لو قدرتوا ...عندهم مهلبية مصرى جامدة و موش غالية ب 6000 جنية الطبق بس

الحب النقى

الحب النقى

(من غير علشان؟؟)

" ياترى اللى بيقولى بحبك ده ...بيحبنى بجد...طيب و لوبيحبنى بجد بيحبنى ليه؟؟؟ هل بيحبنى علشان هو ابويا...ولا علشان هو اخويا...ولا علشان هو صاحبى...ولا علشان انا زميله فى الشغل...بيحبنى ليه؟؟

علشان انا بعامله كويس ...و لا علشان انا لو قدرت اساعده بساعده...اللى بيحبنى بيحبنى ليه؟؟؟ حد فاهم حاجة"

كنت فى اسكندرية من فترة , و بينما انا قاعد على على بعد متر و نص من مياه البحر و فى تمام الساعة الرابعة فجراً نشبت فكرة التدوينة دى ..و هي عن اللى بيحبنى ليه بيحبنى ...وهل فى فى حياتى حد بيحبنى من غير سبب؟؟طيب و لو فى حد كده انا عرفت منين و كمان هو مين الحد ده؟؟

قبل ما ابدأ عايز اقول انى بتكلم عن مرحلة من الحب ملهاش دعوة بالحب الشريف و الحب الخبيث و ملهاش دعوة بالحب الصادق و حب المصلحة ...لآ دى فى الحب الشريف الصادق الكويس الحلو بس فوق ده كله الحب" المشفى " –بتشديد الفاء- يعنى الخالى من اى شوائب و فوق ده كله منزوع الدسم قصدى السبب يعنى لو جيت تدور على سبب للحب ده موش هتلاقى ...حتى لو السبب منطقى و قوى زى مثلاً انى حب الام لآبنها ...حب صادق و جميل بس فى نفس الوقت فى سبب قوى للحب ده و هو ان دى امه فا لازم تحبه...انا موش بتكلم عن الحب ده بقى ...انا بتكلم عن الحب اللى ملوش اى سبب ...اعتقد كده وضحت الفكرة المجنونة.

طيب ممكن اسال سؤال ...هو يعنى ايه حب أصلاً؟؟؟ هل هو موجود فعلاً ؟؟ ممكن حد يقول انى بسأل سؤال قديم جداً و تقليدى لكن للأسف ...محدش عارف يجاوبه اجابه شافية الى الان ...يعنى ملامحه ايه الحب ده ...مواصفاته ايه ...طعمه ايه؟؟؟

انا فى حياتى ناس كتير بحبهم و بيحبونى و منهم اللى لسه معايا الى الان و منهم اللى كنت بحبه فى مرحلة ما فى حياتى وافترقنا لظروف ما فا انقطعت علاقتنا زى بعض اصحابى فى الابتدائى منهم واحد اسمه جابر ...كنت بحبه بس خلاص لانى موش بشوفه منذ ما يقرب من 20 سنة فا معنتش بحبه حتى لو شوفته دلوقتى ...نطلع فوق شوية و فى الثانوى هتلاقينى كنت بحب ناس تانية و نفس الكلام و هكذا ...ليه؟؟ لانى كنت بحبهم علشان هما زملائى او اصحابى ...كمان فى الجامعة كمان حصل نفس الكلام ..الناس دى بحبهم علشان هما زملائى و ده موش عيب ينتقص من قدر حبهم فى قلبى لكن فى ناس بقى تحس انهم بيحبوك بجد ...كده ...بدون اى سبب منطقى...بدون اى علاقة وقتية ..و الناس دول حتى لو انتفى الرابط بينك و بينهم بيفضلوا يحبوك و تحبهم و بين فين و فين بتتطمنوا على بعض و ممكن ينطبق عليهم قول ان الناس دى كيمياتهم راكبه لى بعضها و زى ما الرسول صلى الله عليه و سلم بيقول الارواح جنود مجندة , فما تعارف منها ائتلف ، وما تناكر منها اختلف

و هذكر بعض الناس دول و هنور عليهم الكشاف شوية

وجدى الشناوى

استاذ وجدى الشناوى ...ابن المنصورة ...مدير قنوات الموجهات براديو و تليفزيون العرب و من قبلها مدير فرقة الفنانين المتحدين و حاجات تانية كتير...كان موش مديرى فى الشغل لكن كنا بنحب بعض و لا زلنا ...لازال بيحبنى و بحس انه بيحبنى كده بدون سبب انى زميله فى شغل او انى فى سن ابنه الوحيد كريم او اى حاجة,

حب نقى من اللى بحكى عنه...حتى بعد مرور سنتين على غيابنا عن بعض كنا كل فترة لازم تليفون منى او تليفون منه نطمن على بعض و لما روحت اسلم عليه من اسبوع علشان مسافر قعدنا اكننا كنا مع بعض امبارح و فى مكتبه زى مكنا متعودين يومياً اتناقشنا فى كل اللى كنا بنحب ندردش فيه كل يوم لمدة ثلاث سنوات انا و هو و صديقنا التالت هشام يحي اتناقشنا فى الكورة و الاهلى و الزمالك و اتناقشنا فى السياسة و وضع البلد المهبب ..و اتناقشنا فى الشركة و احوالها و فى كل الامور بيرد و بيتناقش بهدؤه المعهود دائماً و تعليقاته الطريفة...حسيت انى فعلاً ان العلاقة بينى و بين استاذ وجدى مختلفة عن اى حد تانى.

نصرة فتحى

(بنت من شبرا)

نصرة و استاذ وجدى اثناء عملنا فى راديو و تليفزيون العرب فى 2003

نصرة ...اول من قابلنى من زملائى بالاى ار تى منذ ست سنوات و من يوميها و هية زميلة عزيزة و بحس اننا فعلاً بنعز بعض كده بدون ابداء اسباب و موش علشان زملاء عمل بدليل ان بعد ما هاجرت قبرص و عاشت هناك هية و جوزها و واحنا لسه على اتصال مباشر و الى الان انا و مراتى و هية و جوزها احمدو لما بينزلوا مصر دايماً لازم بنتقابل ...علشان كده نصرة حد مختلف عن اى حد تانى

أحمد آدم

فى جلسة الوداع قبل ما اسافر السودان فى مطعم باباجونز بالمهندسين
اللى تقريباً بقى راشق فى كل تدوينة بكتبها الفترة اللى فاتت راجع تدوينة اسكندرية كمان و كمان ..من الناس اللى بحس انهم بيحبونى كده برضه ...مع اننا كنا فى الكلية اصحاب كتير و حبايب بس فى النهاية هو اللى خرجت بيه من الكلية صديق صدوق...و على اتصال الى الان حتى بعد مرور سبع سنين ...نحب نتقابل كل شوية ...نحكى مع بعض على اخبارنا ...و نطمن على بعض بالتليفون كل فترة ...مفيش مانع اسقط عليه فى اسكندرية اتغدى معاه و نتكلم و العكس صحيح..لان علاقتى بزنجو فعلاً مختلفة عن اى حد تانى..

بدوى الشريف

شخص اتعرفت عليه من 4 شهور بس وسبق ان ذكرت اسمه فى مدونة الكوباية المليانة بس نفس الاحساس بكلمكم عنه بالظبط...بحس ان الشخص ده بيحبنى كده ...من غير علشان ...من غير ابداء اى اسباب حتى لو اسباب منطقية...بس بيحبنى و بنحب نقعد مع بعض و بنحب نحكى مع بعض غير اى حد نانى حتى و ان كنت لسه عارفه قريب جداً

هيثم العزازى

او (عز) زى ما كنا بنندهله فى ايام شغلنا مع بعض فى بزناس من ثلاث سنين تقريباً ...على فكرة فى مجموعة اصحابى طلعت بيهم من بزناس من اعز اصحابى دلوقتى (هوانا والبناو محمد على و احمد زكريا و احمد صمدى) لكن عزازى من الناس اللى بحس انهم بيحبونى كده وش موش علشان احنا اصحاب ...ولا علشان اى حاجة تانية ..و للسبب ده علاقتنا مختلفة شوية ...نتقابل كل فترة لوحدنا نحكى و نطمن على بعض على قهوة قشتمر فى الظاهر اللى كان بيقعد عليها نجيب محفوظ زمان...و قد ايه بفتقد تليفونه كل فترة بس علشان نسلم على بعض موش اكتر لان انا و عز غير اى حد تانى.

و دول على سبيل المثال لا الحصر علشان محدش يزعل منى ...و قبل دول كلهم تيجى مراتى اللى بحس انها بتحبنى موش علشان انا جوزها لا كده و خلاص و بدون ابداء اسباب...

و ارجع اأكد ان دا موش معناه ان اخواتى موش بيحبونى ...لا بيحبونى بس علشان انا اخوهم و زمايلى فى الشغل بيحبونى بس علشان انا زميلهم فى المكتب و اللى ساكن جنبى بيحبنى علشان انا جاره و بعامله كويس ...فى سبب كويس او وحش موش هي دى قضيتنا ولا بننتقص منقدر الانواع دى من الحب.

يلا كل واحد قرأ الموضوع دلوقتى يشاركنى بتعليق فيه راية فى المنطق ده و لو موافقنى يعصر دماغه و يكتب عن الناس اللى هو حاسس انهم بيحبوه بجد حب نقى مفيهوش كلمة علشان كذا كمان هايز الناس اللى تقدر توصف العلاقة دى بشكل ادق أو تسميها بمصطلح تبقى كده ساعدتنا كتير