القاهرة فى 8 مايو 2029
عزيزى علي بيك
السلام عليكم و رحمة الله و بركاته
كل سنة و انتا طيب
كبرت يا علوة و بقيت عشرين سنة بالتمام و الكمال.. وكبرتنا معاك...تخيل يا على يا حبيبى ان زى النهاردة من 20 سنة انتا نورتنا و شرفتنا و حليت ضيفا كريما على اسرتنا السعيدة...فى الجمعة يوم 8 مايو 2009 الساعة 10 صباحا كان مولدك فى يوم عيد المسلمين يوم الجمعة ...كان مولدك و نحن نقرأ سورة الكهف و انا بقرأ سورة مريم زى ما كنت بقرأ وقت ولادة عمر اخوك برضه و متسألنيش ليه...موش جاية فى الاثر ولا حاجة بس يمكن تبركا و تيمنا بستنا مريم عليها السلام...كل سنة و انت طيب يا حبيبى
عايز اعتذرلك يا على لانى مكنتش جنب ماما اثناء الولادة نظرا لسفرى خارج مصر...بعتذرلك لانى مكنتش قريب منك فى فترة الحمل الا ايام معدودات...بعتذرلك لانى مجهزتلكشى لوحات استقبال زى بتاعت عمر أفندى اخوك الكبير..الظروف فى الفترة دى كانت صعبة شوية لكن اهوه الحمد الله اهية مرحلة و عدت الله لا يعودها يا علوة...
على فكرة يا على ...انا اه كنت بعيد عن مصر فى الفترة دى لكن وصيت ماما تشترى جرايد الاهرام و الدستور و المصرى اليوم يوميها ...اللى انتا شوفتهم من سنين دول متعانين ...شايف اخبارنا ايامها كانت بتتكلم فى ايه...كان العالم كله خايف من وباء اسمه انفلونزا الخنازير ربنا يعافينا من كل ضرر ...و كان رئيسنا لسه هو الرئيس محمد حسنى مبارك الله يرحمه وكان عمر افندى اخوك يدوبك لسه مكملشى 3 سنين وحتى النادى الاهلى كان بينافسه الاسماعيلى على الدورى فى السنة دى و مدربه كان برتغالى اسمه مانويل جوزيه بما انك اهلاوى يعنى..
على فكرة يا عم على انا معملتلكشى مدونة جديدة انا دخلتك فى المدونة القديمة اللى كانت شركة بينى و بين عمر أفندى اخوك مناصفة دى ...دخلتك فيها بالتلت يعنى بقت المدونة دى شركة بينا احنا التلاتة من سنة 2009 كل واحد فينا له تلتها يبرتع فيه براحته...
على...انا بحمد ربنا انى قدرنى انى اساعدك تحفظ كتاب الله و تختمه فى سن صغير قوى كده انتا و عمر أخوك...و كمان فضلتوا تراجعوا و منسيتهوش تانى و من اسعد اوقات حياتى لما بتؤمنا فى قيام الليل انا و مامتك و اخوك عمر زى ما ببقى طاير من الفرحة لما عمر أخوك هو اللى بيصحينا ننزل نصلى الفجر بالجامع كلنا كل يوم
تفوقك الدائم فى دراستك ده يا على مفرحنى و موش هقولك عليه بقى انك طالع لابوك زى ما كل الاباء بيقولوا و اخنق عليك...انتا عارف اننا اصحاب اساسا وموش ههجص عليك و اقولك انى كنت جامد...انا اخرى علوم كيمياء يعنى كلية متوسطة المستوى انما انتا ماشاء الله فى كلية من كليات القمة.
عايزك تطمنى بقى بعد امتحانات الكلية بتاعتك انتا و عمر اللى على الابواب دى انتا قولتلى انكم هتخلصوا على اخر مايو 2029 و هتبدأوا الاجازة ...طمنى انكم جامدين كالعادة و هتكسروا الدنيا فى الامتحانات وهتبدأوا فى مشاريع خدمة المجتمع اللى بتشاركوا فيها كل صيف دى...ربنا يتقبل منكم يا رب و يجعلكم كده دايما فى خدمة الدين و المجتمع و عون للناس دائما يا رب.
على بيك ...موش هتبطل تتنطط على عمر أفندى اخوك علشان انتا اخدت لقب بيك و هو أخد لقب أفندى....يا بنى كلها القاب و هزار موش ...تبقوا كبار كده و بتتناقروا على النقطة الفرعية دى...بحبكما فى الله
على بيك...اللهم انى استودعك و جميع اعضائك و قلبك و عقلك و ملكاتك...اللهم حسن خلقه كما حسنت خلقه...اللهم انصر به الاسلام و اعز به الدين و اجلعه من عبادك الصالحين و ارزقه بر والديه ...
يا رب...يا رب ارزق ولداى عمر و على ايمان مثل ايمان سيدنا ابوبكر و قوة مثل قوة سيدنا عمرو حياء مثل حياء سيدنا عثمان و علم مثل علم سيدنا على و اخيرا غنى مثل غنى سيدنا عبالرحمن بن عوف رضى الله عنهم جميعا و احشرهما مع هؤلاء الصحبة الصالحة فى الفردوس الاعلى مع حبيبك محمد صلى الله عليه و سلم.
أبوك
أبوعمر و على
ما شاء الله
ReplyDeleteالف الف الف مبروك يا عم باسم :)
ربنا يباركلك فيهم يارب
:D و ان شاء الله علي و عمر يكونوا زي ما انت عاوز و احسن كمان
يبقو زي ما هم عاوزين :D
بس انت مين قالك ان سيادتو هيكون مات سنة 2029 !!
انت بتفول على الزعيم وللا ايه :)
لا حقيقي ربنا يباركلك
بورك في الموهوب
و شكرت الواهب
و رزقت بره
و بلغ أشده
ربنا يخليك يا عبدالرحمن
ReplyDeleteو عقبالك يا رب
لا يا عم موش بفول على الزعيم ولا حاجة الرحمة بتجوز على الحى و الميت
ربنا يرحمه بجد من اعماق قلبى ...لانه محتاجها قوى الدعوة دى و هو رايح يقابل رب كريم ..
الف الف مبروك يا بسوم
ReplyDeleteبورك لك في الموهوب وشكرت الواهب ورزقت بره وبلغ اشده
ربنا يبارك فيه يارب ويجمعك به وبزوجتك عن قريب ان شاء الله
وربنا يقر عينك باولادك ويكونوا من حفظه كتاب الله ويكونوا من الصالحين المؤثرين في نهضه هذه الامه
بس نفسي أعرف شعورك الان ..الولاد كبروك يا باسم ولا لسه القلب شباب
الف الف مبروك يا بسوم
ReplyDeleteبورك لك في الموهوب وشكرت الواهب ورزقت بره وبلغ اشده
ربنا يبارك فيه يارب ويجمعك به وبزوجتك عن قريب ان شاء الله
وربنا يقر عينك باولادك ويكونوا من حفظه كتاب الله ويكونوا من الصالحين المؤثرين في نهضه هذه الامه
بس نفسي أعرف شعورك الان ..الولاد كبروك يا باسم ولا لسه القلب شباب
سامر
ربنا يكرمك يا سامر و عقبال ما تخاوى لينا انشالله
ReplyDeleteسامر انا موضوع الكبر و الصغر ده موش بيقلقنى انتا عارف بس احساس المسئولية عن تربية جيل جديد هو اللى زاد عندى و خوفى من المستقبل و تأثير فساد المجتمع عليهم هو اللى راعبنى...كلام كبير بس انتا سألتنى عن شعورك
و نهاية ...هو يعنى اول ولا اخر عيل يا عم سامر ...لسه الجايات كتير انشالله
الف مليوون مبروك يا باسم وحمد الله علي سلامه علي بيك وحمدالله علي سلامه ام علي وربنا يباركلك فيهم ويرزقك برزقهم وتربيهم تربيه اسلاميه زي مانت بتحلم بكده
ReplyDeleteابو جودي
Hi Bassem,
ReplyDeleteAlf Mabrouk!
Inshallah yertraba f 3ezak!!
w 3oabal lil Amira inshallah!!
Ha tsemeha eh ba2a????
Waiting for Ali basha pictures!!
Rabena yhafzhoum inshallah!!
Omar& Ali, you must know that you have a Moroccan anty:)
Asmaa
Princess Asmaa
ReplyDeleteMiss u ya afandem , how is france and morocco as well
thanks for your sweet words and 3o2balek ya oustaza....
el amira lesa later will decide inshallah but i will keep u updated ...:)))
ابوجودى
ReplyDeleteجزاكم الله خيرا يا بوب و عقبالك انشالله قريبا
الف الف مبروك ياعم باسم بورك لك فى لموهوب وشكرت الواهب ورزقت بره وبلغ اشده لن شاء الله
ReplyDeleteوابدا تعليقى على جزئين جزء ليك ياعم باسم وجزء ليك يا على بيك
اولا تعليقى ليك ياباسم انت عرفت منين ان 2029هيكون البيه الله يرحمه انا اشك
تعليقى ليك ياعيلوه
اولا انا بحبك قوى وعلى فكره انت فترة حمل ماما فيك كانت اكتر فتره قربت فيها لبباك واكتشفت انى بحبه فى الله قوى لانه بحد شخصيه لذيذه قوى ياريتك تبقى زيه لا لما ققولك خليك احسن منه وياما كنت بعدى عليه بعد ما نخلص شغل ويقعد يقولى انه نفسه يبقى جمب مامتك وهى حامل فيك وانا اصبره شويه ولكن اهيه عدت الايام ونورت الدنيا بحالها وما اسرع الزمن وكمان بقى عندك عشرين سنه مبروك ياعم
ثانيا اناروحت انا وبباك عمره قبل ولادتك باسبوع ودعيتلك هناك انا وبابا بالادعيه الى بابا كتبهالك فى المدونه دى ده حتى انا فاكر الزمان والمكان عارف ليه علشان انا بحبك كنا ياسيدى على الصفا والمروه فى المسعى الى فى الدور التانى فى الشوط الخامس اوالسادس ودعينالك بالدعاء ده غير ادعيه تانيه كتير لاننا كنا سمعين شريط ادعيه فى العربيه قبل ما نوصل على طول
ثالثا مع انك جيت فى ظروف مش كويسه زى ما بابا بيقول يعنى بابا مكنش جمب ماما وانفلوانزا الخنازير والخ بس انت حظك حلو عارف ليه علشان بابا عملك عمره مخصوص قبل ولادتك باسبوع مش كده وبس ده حتى انت جيت ونورت يوم عيد المسلمين يبقى حظك حلو ولا لاه
رابعا انا مش عايزك تبقى اهلاوى بالوراثه شجع النادى الى يعجبك يعنى نقى الى انت عايزه حتى لو مش عايز تشحع كوره زى عمو سامر انت حر احنا عايزين نربى حيلكم ده على الحريه ماشى ياعيلوه
خامسا عموما ياعيلوه وحشتنى جدا انت وزياد اخوك الى شرف قبل منك بواحد وغشرين يوم مع الف سلامه وسلامى لكل الى عندك وعقبال ما نكتبلك وانت بتم عقدك التلاتين
بورك لك في الموهوب وشكرت الواهب ورزقت بره وبلغ اشده
ReplyDeleteأخي الحبيب باسم
مبارك عليك وصول ابنك علي إلي الدنيا
وأنا فعلا سعيد أنك مهتم تعلمه أشياء كتير علشان يبقي إنسان له قيمة
إنسان عارف ربه كويس وعارف حقوقه وواجباته
وكنت عايز أقترح عليك حاجة
زهي إنك زي ما حتجتهد إنك تخليه يحفظ القرآن
اجتهد كمان أنك تخليه يفهمه
وده أهم بكتير من الحفظ
أنا نفسي ولادنا والجيل الجديد يطلع يحب أنه يكون فاهم أكتر من إنه يحب إنه يكون حافظ
ويارب يقر عينيك بعلي وعمر ويكونوا خير سند ليك في الدنيا والأخرة
إيهاب دره
مبرووووووووووووووووك يا أبو علي وعمر
ReplyDeleteطيب الأول كان عمر أفندي امال ده علي بيك الكبير
انا عارف نوياك في تغيير التاريخ من زمان يا باسم
بس عموما ألف مبروك وربنا يبارك لك فيهم ان شاء الله
الف مبروك يا أبو عمر و ربنا يبارك لك في عمر أفندي و علي بيك و عقبال ما تجيب رفيده و يجعل ايامك مباركه أنت و الاسره الكريمه. وترجع من غربتك بألف سلامه.
ReplyDeleteألف ألف مبروك يا بيسو ويتربى فى عزك إن شاء الله
ReplyDeleteعلى فكرة لما أنت سميت الأولانى عمر قلت فى نفسي إن شاء الله هسمى أول مولود ذكر على ,ولكن برضه سميت التانى على مش عارف أعمل فيك ايه,على العموم ماشي هعديهالك المرادى عشان ماكنتش تعرف, و أنا مستنى عيد ميلادك بفارغ الصبر عشان ألحق المرادى .
ألف مبروك مرة تانية وأشوفك يارب على خير دايماً إن شاء الله
ساهورة
ReplyDeleteموتشكرين يا باشا على الكلام الجميل ده و بجد كانت نعم الصحبة فى هذه العمرة و كنت خير رفيق فى السفر و جزاكم الله خبرا على هذا الكلام
ايهاب
ربنا يكرمك و عندك حق مليون فى المية نحن امة ينقصها فهم...فهم لدينها فهم لغايتها فى الحياة فهم لعقيدتها فهم لاسلوب معيشة عندما يتحقق الفهم تحدثالقناعة و عدم التكالب على الدنيا و يعم الاستقرار و راحة البال
منعم
عقبالك يا معلم و تجيبلنا ميدو مشاكل صغير كده يقرف فينا برضه و يعملنا دوشة وصداع دايما.
سرور
تسلميا معلم و ربنا يباركلك فى فرح بنتك و تخاويها قريب انشالله
جادوون
اى خدمة فكر بس انتا وهتلاقينى ظبطك و لاطش منك المصلحة وقتى و مسمى اللى هتتمنى تسميه ...انتا عارفنى مسيطر دائما...اخبار هنا بنتك ايه؟؟ربنا يخليهالك
الف الف مبروك يا باسم وبعد عمر افندي وعلي بك الكبير تجيب لنا سعد باشا ومش بعيد ربنا يرزقك كمان ببكباشي عامر او جمال مش هاتفرق قوي
ReplyDeleteانا ملاحظ حاجة . . هو انت كاتب له ايميل ليه لإبنك بعد 20 سنة!! هو انت لسه مشتغل مامته ومفهمها انك بتشتغل علشان تجيب فلوس وكده وسايبهم في المنصورة؟ يا بن اللعيبة :) حلوة الفكرة دي انا باشجع اي لعبة حلوة وغرضي بس اني اهدي النفوس
حاجة تانية لاحظتها . . انت الخطاب الديني عندك اصبح قوي . . انت بقيت سني ومشيت مع الناس اللي بتبوس في الكتف؟ ربنا يهديك يا عم :) :) بورك لك في الموهوب وشكرت الوهاب وبلغ اشده ورزقت بره
اسلام بيه حامى حمى حقوق الانسان فى مصر و الجامعة الامريكية
ReplyDeleteواضح انك بتهدى النفوس ...و لما تسمع ام عمر منك الكلمتين دول على اللى شافنى فى المهنددسين من يومين موش شايف انها ممكن الخيط يكر و الموضوع يتكشف هههههههه
موضوع الناس اللى بتبوس على الكتف لا صدقنى على الاطلاق بس دى توابع رحلة السودان المباركة لكن هنا موش عايز اقولك خلينا ساكت احسن
بورك لك فى الموهوب وشكرت الواهب ورزقت بره وبلغ اشده
ReplyDeleteربنا يباركلك في على وعمر ويرزقك بابو بكر وعثمان ويارب تقفل ال10 المبشرين بالجنه كلهم
ويارب تحقق امنيتك ويختموا القرآن فى سن صغير
وترجعلهم بالسلامة يارب
آمين
طارق عبد الجواد
alf mabroook ya basem.. we 7amdela 3ala salemt shaymaaa2 we 3ali
ReplyDeleterabena y5aleehom we ybarek feehom we tshofhom regala add el donya isa homa we zayoooda
Tant SoZy
رووقة
ReplyDeleteام عمر هتكرهك موووت علشان موضوع العشرة ده...بس عقبالك انتا كمان يا باشا
SoZy
thanks we 3o2balkoum ya afandem inshallah we yekoun qareban ya rab...
الف مبروك لحضرتك يا ا\باسم ربنا يخليهوملك يارب ويطلع كمان احسن من الى حضرتك بتحلم بيه ونورت ياعلى ياسكر الدنيا كلها وبجد عندك ماما طيوبة وعسل خالص وبابا كمان وعمورة اخوك الى زى السكر ماشاء الله اسرتك جميله اوى وانت ان شاء الله هاتبقى اجمل
ReplyDeleteوربنا يبارك لحضرتك فيه يارب ويبقى ابن بار وصالح وخادم لدينة وامة نبيه ويصلح من حال الامة يارب ..آلاء
يا استاذة آلاء
ReplyDeleteنورتى مدونتنا المتواضعة ..دى اولمرة تعلقى عندى صح ؟؟
جزاكم الله خيرا كثيرا على الكلام الجميع ده و عقبال اللى بالى بقى انشالله و يكون عن قريب بإذن الله و ان يرزقه الله الذرية الصالحة من جموع الصحابة و ليس الخلفاء عمر و على بس...
فين بوستاتك يا شاعرة يا كبيرة؟؟؟
أبوعمر و علي
السلام عليكم يا باشا
ReplyDeleteبورك في الموهوب وشكرت الواهب وبلغ أشده ورزقت بره
وسلام خاص من مروى ليك ولزوجتك
وربنا يطمنا عليك وعلى زوجتك وعمر أفندي وعلي بيك
ويا رب تقدر تحقق معاهم كل أمانيكم
آآآآآآآمين
وادعيلنا عشان احنا في انتظار مولود قريبا جداً
1000 Mabrook Ya BESOO we rabenaa yeberelk ffeh ,
ReplyDeleteanaa tab3n kont ma3ak we antaa 2a2an MOOOOT 3ala om omer, rabena ye7`lekoo leba3d
Khaled El Haddad
عبدالرحمن باشا خليل
ReplyDeleteالف الف مبرووووووك و ربنا يتملكم على خير يا رب و تبقى خير ذرية صالحة بمشيئة الرحمن
جزاكم الله خيرا انتا و مروى على التهنئة الرقيقة
khalooda
thanks ya ma3alem for ur support during these hard times ....u r the closest one to me alwayes whereever u are....thanks again.
Basem
"حالاأتك برجالاتك
ReplyDeleteيارب يا ربنا تكبر و تبقى قدنا"
السلام عليكم
الحقيقه أنا سعدت جدا لما عرفت خبر وصول على بك بالسلامه
1000 1000 مبروك يا "أبو عمر و على" و ربنا يطرح فيهم البركه و فيك و يرزقك برزقهم و يجعلهما سببا لدخولك الجنه
مش عارف أقولك إيه بس يا ريت تعمل العقيقه فى الرياض و خلاص و أمرنا لله و ياريت قبل ما يخلص شهر 6 علشان ممكن أكون سافرت
هاهاهاهاهااها
شد حيلك و بتمنالك كل التوفيق و النجاح و السعاده فى الدارين
و أشوفك على خير
أنس
السلام عليكم
ReplyDeleteنورت الدنيا كلها يا أبو على
يارب تكون زى على بن أبى طالب رضى الله عنه
إوعى تخلى حد يقولك على بتخفيف الياء ولكن على بشديد الياء
عمك وعم أبوك
شريف الدكرورى(أبو مريم)
طبعا اتاخرت عليك فى التهنئة ولكن الظروف فرضت نفسها يا حبيبى ..من جنوب الوادى اقدم لك ارق التهانى بقدوم السيد على بك الكبير ويا ريت تجيب لنا صيدناوى المرة الجاية يا باشا ..ألف مبرووك وبورك فى الموهوب وشكرت الواهب ..ولك منى خالص الهتانى وارق التحيات
ReplyDeleteحافظ
الخرطوم
الف مبروك يا ابو عمر يتربو في عزك ربنا يباركلك فيهم ويجعلهم الخلف الصالح إن شاء الله
ReplyDeleteانا اسف ان التهنئةبس انا مكنتش اعرف وكمان الاتصالات مع معظم الاصدقاء تقريبا بتكون من السنة للسنة يعني في الاجازة بس عموما الف مبروك مرة تانية وربنا يبارك فيهم وتشفهم احسن ناس
ReplyDelete