Palm Island

Palm Island

كنت بتفرج امبارح على الجزيرة الوثائقية...طبعا القراء الافاضل مستغربين قوى ان فى حد اساسا حاطط الجزيرة الوثائقية على قائمة المفضلة ...بس اهو مرض و ربنا يتولانا برحمته قريبا..
و اتفرجت على فيلم (وثائقى طبعا) اسمه الانشاءات الضخمة بيحكى قصة البالم (PALM) جزيرة النخيل اللى فى دبى و دى مدينة مكونة من مجموعة من الجزر الصناعية اللى بينشئوها على شواطىء دبى على هيئة زعف نخل علشان يزودوا مساحة الشواطىء بقدر الامكان و يجعلوا جميع قلل المدينة تطل على البحر مباشرة و بعيدا عن تفاصيل المدينة.

...دبى اللى لقوا البلد ضاقت عليهم فى استثمارتهم و تطويرهم ليها فاتجهوا لانهم يردموا البحر و يبنوا مدن جديدة و يستثمروا فى الطبيعة اللى عندهم...زى ما عملوا مدينة الثلج فى وسط الصحراءوبنوا اكبر و اعلى برج فى العالم و واحدة من اكبر المدن الاعلامية فى العالم بدأوا دلوقتى يردموا البحر ...و يبنوا مدينة...

الناس هناك موش بيحاولوا يبنوا مدينة 6 اكتوبر الصناعية و يفشلوا وموش حاولوا يعملوا مدينة العاشر من رمضان وبرده يفشلوا ...يفشلوا فى انهم يعملوا حاجة عالمية يشار اليها بالبنان زى ما دبى بيعملوا ...استهلاكنا كله محلى و يا ريته فالح لا بنبنى مصنعين تلاتة و خشى يا عشوائيات و خش يا بهجت اشترى الارض بتراب الفلوس و ابنى اللى انتا عايزه علشان ربنا كرمك بشوية علاقات...باظت المدينة الصناعية التى كانوا بيحلموا بيها...و اللى اصلاً محدش حلم بيها ولا خططلها ...دى فكرة و مكملتشى لمرحلة انها تبقى خطة و مدينة استراتيجية ... دا احنا موش عارفين نشرب مية حتى...الناس فى المعادى عطشانين و انتا جاى تقولنا يشار اليها بالبنان...يا عم سيبنا نبيع بنك القاهرة و احنا دماغنا رايق الله يخليك...

المهم بعد ما شوفت الابهار بتاع مدينة النخيل و الصرف اللى بيصرفوه و التخطيط اللى بيقوموا بيه قولت اكتب لكم خاطرة خطرت على بالى...

عندما كنت شابا حرا طليقا ، فاتح صدرى للدنيا وشايف نفسى حبتين وباقول يا ارض انهدّى ماعليكى قدّى ، كان خيالى واسع جدا جدا جدا .. وكنت باحلم انى أغير العالم.

وكلما ازددت سنا وحكمة ، كنت اكتشف أن العالم كبير قوى وصعب انه يتغير " وهو يعنى انا اللى هاصلح الكون " !!

و ربنا يخليلنا مصلح الكون الحالى عمو بوش طيب الله ثراه ...هو عارف هو بيعمل ايه ...انتو بس اللى موش فاهمينه ولا فاهمين انه بيعمل كل ده علشانكم.

لذلك قللت من طموحي إلى حد ما وقررت تغيير بلدي .. ( يا حبيبتى يا مصر ) ، وفضلت اسمع اغانى وطنية واتفرج على رأفت الهجان واشجع المنتخب حتى وهو موش عارف يعدى نص الملعب بتاع المعلم دروجبا و رفاقه من كام يوم فى فرنسا و اللى يغيظك ان شحاتة مضايق قوى و بيقول بتهاجمونى ليه...طيب تقوله ايه ده ...يلا موش مهم على رأى واحد صاحبى.

، ووصلت لدرجة انى كنت لما اشوف علم مصر الدمعة تفر من عينى

و انا متنيل قاعد بسمع كلام يحرق الدم من كل محبى الهلال هنا فى السودان الى الآن منذ مطش الاهلى اللى وكسنا فيه و خلعوا اللعيبة فى نفس اليوم على مصر و فرنسا و سابونى انا هنا للهلاليين يأطموا فيا لحد دلوقتى لدرجة انى من يومين و نتيجة للضغط روحت نزلت علم الاهلى اللى كنت مكمره فى البيت و رميته على كنبة العربية ورا علشان اقولهم انا مبخافشى و محدش بيموت ناقص عمر ..ايوة انا اهلاوى !!

إلا انى بلدي هي الأخرى بدت وكأنها باقية على ما هي عليه وعلى رأى الشاعر الحلمنتيشى " النهارده زى امبارح .. وبكره مش باين له ملامح " بل بالعكس لما بشوف الحاجة منى الشاذلى كل يوم على حتة عمرو اديب على جزء من اللى مبحبوش معتز الدمرداش على مشهدين من اللى بكره و مبطيقوش تامر افندى امين ...بلاقى ان البلد موش على ما هى عليه لكن نازلة و بقوة لتحت...تحت قوى

قلت مش مهم اغير البلد " ليها مسئولين كبار يغيروها او يسرقوها و يبيعوها و اهو كله تغيير"

وحينما دخلت مرحلة اكبر شوية ، حاولت في محاولة يائسة أخيرة أن أغير عائلتي ومن كانوا اقرب الناس لي ، ولكن باءت محاولتي بالفشل ، الكل مشغول بلقمة العيش والدروس الخصوصية ووصلة الدش اللى بتجيب الـ art و دلوقتى بقت محتاجين فيها شوتايم علشان الدورى الانجليزى !!


واليوم .. ، أدركت فجأة حقيقةالأمر.. افتكرت ( خير اللهم اجعله خير ) انى نسيت اغير من نفسى قبل ما احاول اغير الناس ، ياريت كنت غيرت ذاتي في بادئ الأمر .. ثم بعد ذلك حاولت تغيير عائلتي ، ثم بعد كده نبقى كتير ونشجع بعض على تغيير بلدنا للاحسن ،علشان تكون اجمل واقوى بلد فى الدنيا ومن يدري ، ربما استطعنا أخيرا تغيير العالم كله

يلا بينا يا شباب نبدأ بتغيير انفسنا قبل ان نحلم بتغيير العالم ...عمر انتقادنا المستمر ما هيصلح البلد...لكن تطويرنا المستمر لذاتنا و لشغلنا و لاولادنا هو اللى هيصلح البلد...نتعلم كويس نشتغل كويس نبنى على مستوانا و على مستوى اسرتنا الصغيرة و بعد كده نكبر شوية و نعين غيرنا من المجتمع على انه يصلح من نفسه ....هو ده الطريق...يمكن تحسونى بخطب بس و الله انا بقول الكلام ده من قلبى بجد

عايزين همة عالية وارادة فولاذية .
وزى ما بيقولوا : رب همة .. احيت امة .

عمر افندى و فريق عمله

عمر افندى و فريق عمله

اللى جه فى باله تعليق على الصورة يكتبه ...نرحب بجميع الزائرين

عمرأفندى يلتقى خالد مشعل فى السودان

عمرأفندى يلتقى خالد مشعل فى السودان

فى لقاء جماهيرى حاشد كان تجمع لشباب السودان برعاية و دعوة من (امين عام اتحاد الطلاب بالسودان) للقاء يالسيد خالد مشعل رئيس المكتب السياسى لحركة حماس و كان لقاء حميميا و حار ...

و كان السيد عمر أفندى من اوائل الحاضرين لهذا اللقاء للترحيب بعمه خالد و الاستماع لكلمته الرائعة فهو بالنسبة لعمر أفندى نعم القدوة و هو ما ظهر من خلال لقائهما الابوى وحرص عمر أفندى على الاستماع لكلمته حتى النهاية دون تذمر او غيره كما يفعل عادة بل بالعكس عند تهليل الحضور او تكبيرهم يرفع يده و يهيص معاعهم و خلاص مما يدل على تفاعله كما هو موضح بالصورة.

قدم اللقاء امين عام اتحاد الطلاب السودانين و قد وضحت لعمر افندى لحظتها اننا كان عندنا زمان واحد زى ده فى مصر بس للاسف ربنا افتكره من اواخر السبعينات و الى الآن ..و لكن وعدته ان هذه الغمة ستزول يوما ما و ستعود الديمقراطية الى الجامعة و سينتخب اتحاد الطلاب و سينتخب امين عام اتحاد طلاب مصر اسوة بما يحدث فى السودان بس امتى.؟؟؟ ادعى معايا يا عمر.

و بعده كانت كلمة لرئيس البرلمان السودانى و الذى اوضح فيها كيف ان حكومة حماس كانت حكومة مشلولة الايدى و الأرجل..فكيف لها ان تتحرك و كيف تطالبونها بالحركة ...فهناك اربع وزارت رئيسية فى اى حكومة تعتبر ارجل و ايدى اى حكومة فى اى دولة و هى (الداخلية-الخارجية-المالية-الاعلام) و كانت جميعها منزعة القوة و القرار و النفوذ فى حكومة حماس و فى ايدى السلطة و رجالها...
· فوزير الخارجية لا يستطيع السفر ولا يحق له مقابلة الضيوف ولا التعامل مع اى قوى خارجية فكل هذه الامور من صلاحيات السلطة.
· اما وزير المالية فلا يحق له التصرف فى الاموال التى ترد لدولة فلسطين فحق التصرف الكامل فيها و استلامها و توزيعها فى ايدى السلطة.
· و وزير الاعلام لا يوجد له اى سلطة على التليفزيون ولا الاذاعة ولا اى بوق اعلامى بالبلاد فكلها تاخذ اوامرها من السلطة.
· اما وزير الداخلية فكان ليس له اى سلطة على الاجهزة الامنية بل بالعكس فكانوا يعادونه و ياخذون اوامرهم من الدحلانيون و رجال السلطة.
فكيف نطالبهم بنجاح مع ذلك اذهلوا العالم بصمودهم و صبرهم لمدة عام كامل و هو عام 2006.

انتهت كلمة رئيس البرلمان السودانى و جاء دور القائد و الذى عندما قام من على كرسيه ارتجت القاعة بالتكبير و التهليل و الشعارات المساندة لحماس.

خالد مشعل استهل كلمته بالشكر للسودان حكومة و شعبا على استضافتهم له و لكل رجال المقاومة كما اشاد بالدعم المادى و المعنوى الذى يقوم به شعب السودان لمؤازرة الشعب الفلسطينى و الوقوف بجانيه فى محنتة القائمة.

قدم بعض الرسائل منها ما قدمه للرئيس الفلسطينى محمود عباس و فريق السلطة بقوله مستغربا ...كيف تستنكرون و ترفضون الحوار الفلسطينى الفلسطينى مع اهلكم و اخوانكم و تهرولون الى الحوار مع اعداءنا من الامريكان و الصهاينة...و جدد دعوته للحوار و لكن مع الحفاظ على انه كحركة حماس يجددون الدعوة ولكن لا يستجدونه..إن ظننتم اننا فى مأزق فنحن لسنا فى مأزق فنحن نريد ارضا موحدة ,,شعبا موحدا,,وطن واحد .

صورة لحظة دخول مشعل للقاعة

من جانب قدم بعض الرسائل للشعوب العربية بدعوتهم للوقوف بجانب الشعب الفلسطينى و اثار نقطة فى غاية الاهمية بخصوصالمؤتمر الدولى حين عبر عنه بانه مسجد ضرار و انه مؤتمر تضليل امريكا تريد من خلاله الهاء العرب عن مشروعها الحقيقى ..و اشار الى انه شرك و خديعة لكم ايها العرب و سيأتى الخريف و سينقضى الخريف و سينتهى العام و ستعرفون ان امريكا لا تفى بوعدها ولا اسرائيل لا تفى بوعدها ولا تريد الحل للقضية الفلسطينة و لن تريده فى يوم من الايام.

و وجه كلمته للشعب الفلسطينى فى الضفة و غزة و الشتات ..بقوله اننا كحماس ستبقى على العهد انشالله..طريقها الجهاد و المقاومة ..طريقها الثبات و الصمود...سنظل بعون الله امناء على الحق الفلسطينى لا نبيع ولن نشترى و لن نساوم و لن نخشى من الموت فالموت فى سبيل الله اسمى امانينا.

و عقب بقوله ان طريق القسام و طريق احمد ياسين و الرنتيسى و ياسر عرفات وكل شهداء الشعب الفلسطينى و كل من رفض الخنوع و الرضوخ لإسرائيل و امريكا نحن سنسير على دربهم انشالله.

و قال مشعل اننى اود ان اتوجه بكلمة اخيرة من خلالكم اخوانى السودانيين الى اخوانى فى حركة فتح...اخاطب العقلاء منهم و المنصفين و اقول لهم ...اسألوا انفسكم فى لحظة صدق من الذى انقلب على زعيمكم و رعيم الشعب الفلسطينى الراحل ياسر عرفات أسألواانفسكم هذا السؤال

و حينها ستعرفون من خصمكم و من صديقكم..حماس ليست خصما لكم ..حماس اخوانكم و شركاؤكم فى ساحة النضال و لكن تعالوا نعالج امورنا الداخلية بصورة صحيحة نتقى الله فيها و نصون حقوق شعبنا و نحترم المسئولية التى انيطت بنا من شعبنا و امتنا ...هذا هو المسار و لا غيره من مسار و اقول انا الله ناصرنا ايها الاخوة.

و نهاية قال مشعل يا اخوانى السودانيين و الله ان السنوات القادمة ستشهد تغيرات كبيرة فى المنطقة لا لصالح اسرائيل و امريكا بل لصالح الاحرار فى بلاد العروبة و الاسلام

عمر افندى" ابنى الحبيب"

عمر افندى" ابنى الحبيب"

كبر عمر خلاص...اتم عامه الاول....بسرعة كده ...بسرعة كده مر علينا عام منذ قدومه ...منذ مشاركته لنا حياتنا...منذ سماعه لصوته فى مستشفى الهدى بالمنصورة فى تمام الساعة العاشرة صباحا تقريبا اثناء قراءتى لسورة مريم خارج باب حجرة العمليات و متسألونيش ليه مريم بالتحديد بس انا فتحت المصحف للبحث عنها يمكن كى يسهل الله على زوجتى وقت المخاض كما سهلها على السيدة مريم...يمكن

كان ذلك فى 13 اغسطس 2006 و عندما نزلت لموظفة الاستقبال كى آخذ خطاب المستشفى قالت لى بلاش يا استاذ باسم 13 ده و خليها 14 ماشى .,..فابتسمت و ان كنت لا أؤمن بهذه الامور بس من فرحتى مرضيتشى ازعلها وأصبح التاريخ 14 اغسطس.

اكثر من 200 رسالة تهنئة على الموبايل تقريبا و مثلهم تليفونات من جميع انحاء مصر و الدول العربية ..و دا طبعا علشان انا شخصية مهمة مفيش شك و علشان انا كنت بشتغل فى التسويق و الاعلانات فا فى ناس كتير بيجاملونى من الموردين و مندوبى الاعلانات فى المجلات و الجرائد و ما شابه من ناحية اخرى.

عمر باسم السعيدالشربينى

عمر ...ليه عمر ...عمر دا تسمية والدته و انا مكنشى عندى اى طلبات فى الاسم غير انه يكون ميزيدشى عن 3 حروف ليسهل نطقة و كتابته و كده ...فا كان اختيارها لعمر و انا مجادلتهاش كتير و وافقت على تسميته عمر لو ولد و نور لو بنت و الكلام ده فى الشهر التانى.

و بعدها جاء معرض الكتاب و اشتريت منه كتب تربية اطفال كتير و بفلوس كتير قوى و اشتريت شرائط تربية اطفال و اشتريت كتاب قصة حياة عمر بس موش اى عمر و موش عمر افندى دا سيدنا عمر بن الخطاب كى اعلمها له فيما بعد..

دلوقتى فات 12 شهر ...فاتوا و عمر بيكبر قدام عينى يوم بعد يوم...بيعلمنى و بيورينى اول ضحكة ليه كانت ازاى و اول سنة ليه كانت ازاى و اول مرة اكل فيها و اول مرة مشى فيها و او مرة مرض فيها و اول مرة عرفنى فيها و جالى و اول مرة قال فيها كلمته المحبوبة (بااااااااااااااااااااا) و بعد كده قال (ممممممممماااااااامممممممممم) ...اد ايه سنه جميلة اول سنة فى حياة الانسان..قد ايه بتبقى ذكرى جميلة استكشافه للحياة على جميع اوجهها...ممكن اكون احساسى كان عالى جدا و انا اول مرة اركب طيارة و انا عندى 25 سنة ...هو اكيد انا متاكد انه احساسه كمان كان عالى و هو بيعمل كل الحاجات دى لاول مرة فى حياته و هيبقى احساسه اعلى لما يتذكرها و لذلك اخدت على عاتقى انى اسجله كل اللحظات دى...كل السنة الاولى من حياته تقريبا رصدتهاله بالصوت و الصورة ...رصدتهاله فى اكتر من الف صورة مقسمهومله على سديهيتين كل سى دى عليه 6 شهور من عمره...و يتخللهم اكتر من 30 مقطوعة فيديو ...و معاهم البوم يحوى اكتر من 300 صورة مطبوعة...كل دى ذكرياته عن السنة الاولى من عمره ...موش هيقدر يحس بمتعة هذا الكنز غير لما يكبر انا متاكد انه هيطلع محب للذكريات زي ابوه تمام...

عمر افندى

الموقع اللى انا مشاركه فيه ده بالنص على ما ربنا يكرمنى و يبقالى موقعى الخاص و له موقعه الخاص ...اكيد هيعجبه...انا واثق انه هيعجبه ..

عمر افندى ...اسمه ...انا حاسس انه هيعجبه...صح يا عمر ؟؟

عمر افندى الذى ادخل السرور و البهجه على قلوبنا جميعا هذا العام...بدايته من جده (والدى) الله يرحمه اللى كان بيعشقه و مرورا بجده سيد اللى بيفضله على اى حد تانى حتى لو كان انا او مامته ..

عمر افندى اللى بيحب الخروج زى عينيه...يعنى بمجرد متحطه فى عربية خلاص هو موش عايز حاجة تانية من الدنيا...لف بيه بقى زى منتا عايز لا يعيط ولا يتذمر ...بل بالعكس فرحان ولما يزهق ينامله شوية لحد ما المشوار يخلص .

عمر افندى اللى جدته بتناديه دايما بحبيبى حبيبى و بتعلمه اول دورس العربية على غرار (زرع – حصد) و بتقوله دايما (عمرون – قمرون) و اول من علمته يعمل باى باى.

عمر افندى اللى الحلاق بتاعه لما قرأ مدونة حادثة المزين فرح بيها جدا و علقهاله فى المحل عنده لانه حب عمر و لان اسمه و اسم محله نزل على الانترنت لاول مرة.

عمر افندى اللى لسه معملناش العقيقة بتاعته لحد دلوقتى بس ناوين نعملها انشالله عن قريب عند عودتنا فى اجازة لمصر ولا حاجة ...

عمر افندى اللى لما يحب يلفت نظرى ليه بنده عليا بكلمة (بااااااااااااا) و لما اطنشة و انا مركز مع الجزيرة او مطش للاهلى يدينى التى لا تقاوم و هية قبلتة الهوائية الطايرة الحايرة اللى بتجيبنى لمس اكتاف و تخلينى اروح عليه جرى و اطنش اى حاجة تانية.

فى مطار الاردن و نحن فى طريقنا للخرطوم

عمر افندى اللى لما موش عارف احكيله ايه لما يكبر شوية و يحب انى احكيله حواديت قبل النوم بس هبدا اقرا و اعرف الفترة الجاية علشان الموضوع ده...

عمر افندى اللى بفكر فى مصاريف مدرسته من دلوقتى و اى مدرسة هدخله و فين ...ويا ترى هنكون فى مصر ولا فين ...

عمر ...خلى بالك انا اتولدت قبل وفاة عمو انور بسنتين و بعدها اتى عمو حسنى و لم يذهب منذ ذلك الحين و يا ترى انتا اتولدت قبل وفاة عمو حسنى بكام سنة و الاهم يا ترى عمو اللى جاى بعديه هيقعد و لن يذهب برضه أم هيحصل فى الامور امور...

معلشى يا عمر رغيف العيش غلى قوى...و البطالة زادت قوى...و العطش زاد قوى قوى....و الفساد استشرى قوى قوى قوى...و الحيتان كتروا قوى...يعنى البلد بقت زفت قوى قوى...بس اعملك ايه يا باشا موش انتا مبسوط انك جيت ...قابل بقى يا معلم ..و يا عالم يمكن بمرور الوقت ينقشع الصبح الجديد ...(حلوة ينقشع دى قوى)

كل سنة و انتا طيب يا عمر و عقبال ما اكتبلك على الموقع بتاعك عمر افندى دوت كوم تهنئتك بعيدك التمانين انشالله ...يدينا و يديك طولة العمر.

كل اللى عايز يهنى عمر يدخل على التعليقات و يهنيه بقى علشان دا هينطبع و يتحط فى ملف ذكرياته عن السنة الاولى ...فتعليقك اكيد مهم.

عمر افندي وابوه " حالة تدوينية "

عمر افندي وابوه " حالة تدوينية "

-مدونة من يلا موش مهم فى حب عمر افندى و ابوه-

انا مؤمن ان التدوين نجح لسببين
البوح الشخصي او نقل الحالة الانسانية والبشرية الي شبكة الانترنت
الحرية وعدم وجود وسائل رقابية علي التدوين غير ضمير واخلاق وتصورات المدون
بالنسبة للنقطة الاولي فباسم " اه اسف نسيت اعرفكم اني بكتب عن باسم الشربيني وابنه عمر "عمل حاجة غريبة قوي يعني انت هتلاقي في مدونين عملوا مدونات علشان يعرضوا لنفسهم او مشاعرهم او افكارهم او علشان يدافعوا عن قضية او يناصروا مظلوم او حتي علشان يهيسوا او يقلوا ادبهم كل ده موجود ومتابعينه لكن باسم عمل حاجة غريبة قوي عمل مدونة لابنه ايوة مدونة لابنه
عمر افندي
ابنه اللي عنده سنة وميعرفش اي حاجة في الدنيا لما يكبر هيلاقي في مدونة من عمره ومتابعه نموه وحياته بشكل تفصيلي وهاييجي يوم ابوه يقولوه يا عمر يا ابني المدونة دي من عمرك يعني عندها عشرية سنة زي ما احيانا تلاقي اب بيقول لابنه يا حسين يا ابني الشجرة اللي قدام الباب دي من عمرك غرسناها في الارض يوم ما انت اتولدت ولكن بما اننا بقينا في عصر الديجيتال فخلاص بقت المدونة بديل للشجرة
وفي مشهد تاني هنلاقي باسم وهو علي فراش الموت بعد عمر طويل ان شاء رب العالمين "معلش يا باسم كلنا هانموت " هنلاقي باسم بيوصي ابنه عمر " يا عمر يا ابني المدونة دي سقيتها من دمي واعصابي وحافظت عليها طول الفترة اللي فاتت علشان توصلك بالشكل ده فوصيتي ليك لما اموت تشيلها في عنيك وخاصة يا ابني اني اتحديت عمك مجدي بتاع يللا مش مهم وقلتلوا ان المدونة دي هتبقي من اشهر مدونات العالم وانت عارف يا ابني ان عمك مجدي لسانه عامل زي الفرقلة واذا فشلنا مش هايسيبنا في حالنا وبصراحة انا مفقوع منه ونفسي احقق اللي قلتله عليه وخاصة انه اتريق عليا لما قلتله كدة فيا عمر المدونة المدونة واياك ان تكسل عن الببلشة والطرقعة والسلام ختام وبالمرة متنساش وانت مهتم بالمدونة تهتم بامك واخواتك ولكن اذا احسست لحظة انهم سيعطلوك عن المدونة فلهم رب كريم وانت للمدونة وسيبني بقي علشان تلحق ترفع التدوينة الجديدة "
يا جماعة اللي فات ده مش خيال دي ممكن تبقي فعلا حقيقة لان باسم حتي الان مصور ابنه خلال السنة الاولي من حياته حوالي 1200 صورة من اول ما كان عمر جنين وده عن طريق الاشعة التليفزيونة وبعدها وهو عمره يوم وبعدين وهو مش عارف عمره قد ايه وكمان عمر وهو بيحلق وعمر وهوفي العربية وعمر وهو بيشجع الاهلي وعمر وهو نازل علي القمر " واسعة دي شوية " بس مع باسم مستبعدهاش ابدا
وكمان باسم مصور عمر مش عارف حوالي 40 او 50 مقطع فيديو في كل انشطة حياته يعني من الاخر باسم حول عمر الي تدوينة حية وحول المدونة الي كائن بشري وعمل حاجة جديدة جدا
يا بختك يا عمر كل ده في السنة الاولي من عمرك وانا اللي عندي 30 سنة معنديش صورة ليا وانا صغير غير صورة وانا في الحضانة مع ابلة صفية الله يرحمها واحنا في جنينة الحيوانات وتخيل ان انا مش ظاهر فيها واللي ظاهر حتة من مريلة في جنب الصورة امي قالتلي ان دي مريلتك يا مجدي وانا طبعا مقدرتش اكدب امي وقلت فعلا دي مريلتي

طيب انا بكتب ليه عن باسم وابنه عمر لان عمر عيد ميلاده يوم 14 اغسطس يعني يوم الثلاثاء القادم وباسم طبعا عامل ليلة ولا الليلة الكبيرة عنده علي المدونة وسمعت ان اوبرا المذيعة الامريكية المشهورة هاتيجي وهاتبقي ليلة ولا الف ليلة والاستاذ باسم وابنه عمر ليهم حق علينا ان احنا نروح نشوف التجربة اللذيذة دي وكمان نهني باسم باشا وابنه عمر افندي
وفي نهاية التدوينة
كل سنة وانت طيب يا عمر

ويللا الف مبروك
وهابي بيرث تو يو
ويتربي في عزك يا بيسو
وربنا يباركلك وتخاويه يا ام عمر
وتلاتة بالله العظيم التدوين ده طلع كل الجنان اللي كان جوانا
ويللا مش مهم

عمر أفندي لسه متباعش

عمر أفندي لسه متباعش

مشاركة فى الاحتفالية من حبيب قلبى براء ...على مدونته الرائعة و انا مالى

براء افندى اشرف

لم أرى حباً مثل هذا.. صديقي الذي جلست معه على أبو مين حتى زهقنا جميعاً، أنا وهو وأبو أمين وأمين الصغير، حتى علي علبة القهوجي، زهق منا هو الآخر، وفي أيام جلوسنا الأخيرة لم يكن يطل علينا كما اعتادنا ليسألني :"تشرب إيه يا أستاذ براءة"..صديقي هذا، والذي يحمل اسم "باسم الشربيني" لم يجعلني أتخيل للحظة أنه يحمل داخل ذلك الجسد الضخم المتضخم "مثلي تماماً" أي نوع من أنواع الرومانسية، خاصة تلك التي تتعلق بمشاعر حب تجاه كائن آخر غير المرأة!البدناء رومانسيون بالفطرة، لكن تجاه المرأة فقط، على الأقل هذه نظريتي عن أبناء "جنسي" و"جسدي"، ولعلي اندهشت شخصياً لهذا الكم من المشاعر الذي وجدتني أكتب به لأبني.. كانت تلك المشاعر جديدة علي تماماً، وغير متوقعة، تماماً كما كانت مشاعر باسم تجاه ابنه عمر جديدة وغير متوقعة، وإن كانت "مفرحةط بالنسبة لصديق له.. هو أنا!فجأة غادر باسم القاهرة ليستقر في الخرطوم، بلا وداع.. المرة الأخيرة التي شاهدته فيها كانت ليلة فرحه منذ سنة أو أكثر.. هي بالتأكيد أكثر، لأن عمر ابنه عمر عام كامل، بالإضافة إلى 9 شهور على أقل تقدير. إذن فإني لم أقابل باسم منذ 21 شهر على الأقل.. بدون أي أسباب مقنعة مني أو منه.لكن على الماسينجر، يحلو اللقاء، ويدور الحديث المعتاد، "إيه ده.. أنت في الخرطوم فعلا.. إيه اللي وداك هناط، والرد "ما هو أنت اللي ندل ومبتسألش".. وهكذا "دواليب" على رأي علي عبد المنعم.. (ملحوظة قبل ما أنسى : علي هيسافر الخرطوم، وهيقابل باسم، وباسم بيقولي أقول لعلي إنه هيجيبله حاجات من القاهرة ويبعتهاله، وباسم كلفي بالمهمة دي، وغالباً هنسى كالعادة، لإني كل يوم لما بشوف علي بقعد أكلمه في حاجات تانية خالص غير الحاجات اللي قررت أكلمه فيها، على كل حال أديني كتبت هنا أهو، عشان باسم يسامحني، وعلي أكيد هيقرأ الكلام ده ويتواصل هو مع باسم.. يا دي أم الرغشي).. (ملحوظة : الملحوظة اللي فاتت خلصت، وأنا هكمل كتابة البوست عن باسم.. وابنه.سفر باسم إلى الخرطوم دون أن يودعني أو يخبرني جعلني أفكر في شيء هام، او بمعنى أدق أستوعبه، فبشكل ما لا أعرفه، غبت أنا عن الدنيا لفترة لا أعلمها، هي على أقل تقدير عام كامل، أشياء كثيرة جعلتني لا أعي تماماً ما يحدث حولي.. (السفر الأول للدوحة، الخطوبة، السفر الثاني، كتب الكتاب، ترك عشرينات، الزواج، الامتحانات، العمل في mbc).. كل هذه الأشياء جعلتني أبتعد خطوتين للوراء في كل علاقاتي تقريباً، على كل حال أصحاب ناس طيبين.. وهيقدروا لخمتي..نعود لباسم وابنه..باسم فتح مدونة، وعندما فكر في تسميتها، اختار اسم بعناية شديدة، جعلني أقول "لم أرى حياً مثل هذا"، وهي الجملة التي بدأت بها البوست، والتي نسيت بعدها أن أكمل ما كنت أنوي كتابته.باسم يكتب عن ابنه.. باعتباره مشروعه الحقيقي في الدنيا.. ورغم أنه يعلم جيداً أن "عمر أفندي" اتباع، وبالخسارة كمان.. إلا أن باسم كـ"ثقباوي" قديم (نسبة إلى الثقب الأسود) يدرك أن ابنه لن يكون يوماً معروضاً للبيع، وهو ما يظهر خلال اللوحات التي يضعها على حائط شقته القديمة في القاهرة، وهي جمل حماسية لإبنه الذي لم يحضر إلى الدنيا بعد.عن باسم أحكي لكم..صديقي الساكن في الخرطوم، البدين مثلي، رفيق مقهى أبو أمين، وشراء قمصان ضيقة من شارع السودان عشان الخصم وقت قلة الفلوس، وأيام الـ"ART"، والأكل في كل مطاعم الجمهورية بصحبة قصاص..أما عند باسم.. فسيحكي لكم هو عن "عمر أفندي".. ابنه الذي تم من العمر عام واحد.. والذي اشترى له باسم دومين خاص، وصمم له العديد من البنرات، في مدونة متميزة.. تفتقد فقط غلى الجمهور والمعلقين.. روحوا زوروه..

عمر قبل مولده

عمر قبل مولده

الحلقة التانية من حلقات الاحتفال بميلاد عمر افندى على موقعه الرسمي...ها نحن نتحدث عنه و هو لا زال فى علم الغيب ...وهو لا زال نطفة ثم اصبح مضغة ثم جنين ثم...
نتحدث عنه و هو لازال فى بطن امه...و لاننى آمل ان يكون ابنى هذا طفل مختلف فكان لزاما علىً ان افكر فى التعامل مع قدومه بشكل مختلف ايضا ...ففكرت فى بداية التعامل مع ابنى و هو لا زال عمره ثلاث شهور او أكثر بقليل و بدأت فى التحدث معه و رسم بعض النصائح و الاسس و القواعد معه من البداية و التى نقدر نقول عنها عقد اتفاق و اعلان مبادىء لتعاملى مع هذا الإبن فى المستقبل و كان لزاما عليا انا اسجل هذه المبادىء بالصور و كذلك الاحتفاظ بها فى ارشيف ذكرياته ليتفقدها و يبدأ بتنفيذها عندما يكون عنده المقدرة على ذلك...

كالعادة فى كل الافكار الجديد تتهم بالجنون و انت تقوم بها و تتعرض للسخرية من كل من يتفقدها و هذا ما حدث معى و لمدة عام مدة وجود هذه اللوحات على جدران شقتنا المحبوبة بفيصل و من كل من يدخل الشقة زائرا كان او صديقا او حتى من احد الاقارب و لكن ما يلبثوا الا و يقروا بحلاوة الفكرة و جديتها اذا نظروا اليها بعمق ...فأنا اتعامل مع ابنى و مع اسلوب تربيتى له بكل جدية من اليوم الاول لمعرفتى بخبر قدومه الى الدنيا و ليس من يوم مولده...

اترككم مع الصور التى رصدتها من على جدران الشقة بفيصل قبل ان نعزل منها و نغادرها الى الابد و انتزعت هذه الصور للاحتفاظ بها و يا عالم هعلقهاله فى حجرته من جديد لما نرجع مصر بالسلامة ولا هكتفى بانى اوريله المقالة دى و الصور اللى فى الالبوم و بس...

اسيبكم مع الصور بقى...

مستنى تعليقاتكم على مضمون الصور و فكرتها فى حد ذاتها

ميلاد عمر افندى

حدث فى يوم ميلاد عمر أفندي

حدث فى نفس يوم ميلاد عمر افندى ...طبعا انا عارف ان مجرد ميلاده دا حدث فى حد ذاته بس خلينا نشوف الاحداث البسيطة اللى متجيش حاجة جنب حدث ميلاده هو شخصيا عمر الافندى...و خلينا نتفق على ان ده اول بوست فى إطار احتفالاتنا بعيد ميلاد عمر أفندى..

1901 تحليق آلية مزودة بمحرك للمرة الاولى صممها الاخوان وايت ارتفعت عن الارض 12 مترا وقطعت مسافة 900 متر.

1917 اعلان الجمهورية في الصين بعد اطاحة النظام الملكي في بكين.

1935 حل المحافل الماسونية ومصادرة ممتلكاتها في المانيا النازية.

1945 الحرب العالمية الثانية: الامبراطور هيرو هيتو يعلن استسلام اليابان.

1948 اول العاب اولمبية بعد الحرب العالمية الثانية تنظم في لندن.

1982 الحرب العراقية الايرانية: القوات الايرانية تدخل العراق.

1986 اعتقال بنازير بوتو في باكستان خوفا من تظاهرات ضد النظام في عيد الاستقلال.

2003 عطل كهربائي كبير يحرم خمسين مليون شخص 29 ساعة في الجزء الاكبر من شمال شرق الولايات المتحدة

1874 م مولد الزعيم المصري مصطفى كامل مؤسس الحزب الوطني الذي تألف برنامجه السياسي من عدة مواد، أهمها: المطالبة باستقلال مصر، وإيجاد دستور يكفل الرقابة البرلمانية على الحكومة وأعمالها، ونشر التعليم، وبث الشعور الوطني…

1922 تولى هربت صموئيل سلطاته الرسمية كمندوب سامي في فلسطين

785م ولاية الخليفة العباسي موسى الهادي بن محمد المهدي، تولى الخلافة العباسية بعد وفاة أبيه الخليفة المهدي، وهو الخليفة الرابع من سلسلة الخلفاء العباسيين.

1551 الجيش العثماني يستولي على مدينة طرابلس الغرب على ساحل المتوسط، لتنضم بذلك إلى الخلافة العثمانية.

1784 الروس يقيمون أول مستعمرة لهم في جزيرة ألاسكا، التي بيعت فيما بعد لأمريكا. وقد باع قيصر روسيا ألاسكا للولايات المتحدة عام 1867 .وتشكل مساحتها خمس مساحة الولايات المتحدة الا ان سكانها حوالي 600 ألف نسمة .

1889 وصول 120 أسرة يهودية إلى مدينة بيونس أيرس في أمريكا اللاتينية، كانوا هم باكورة الجالية اليهودية في الأرجنتين.

1992 تأسيس الوكالة اليهودية لفلسطين بهدف مساعدة يهود العالم على الهجرة إلى فلسطين والاستيطان فيها. أسسها حاييم وايزمان الذي أصبح أول رئيس للدولة العبرية بعد إعلانها عام 1948

1935 صدور أول قانون للتأمينات الاجتماعية في الولايات المتحدة في فترة الرئيس فرانكلين روزفلت.

1947 حصلت باكستان على استقلالها من الهند بقيادة محمد علي جناح الذي يلقب بالقائد الأعظم فاعتبر مؤسس دولة باكستان

1949 سامي الحناوي يقود انقلابا عسكريا في سوريا يطيح فيه بحكم حسني الزعيم ، ولم يدم عهد الحناوي سوى 3 أشهر ونصف الشهر إذ أطاح به أديب الشيشكليفي 2 ديسمبر من عام 1949

1971 حصلت البحرين على استقلالها من بريطانيا.

1973 اكتشاف أكبر منجم للنحاس في العالم بدولة شيلي1992

أغلقت الولايات المتحدة 69 قاعدة عسكرية في أوروبا وواحدة في كوريا الجنوبية

2006 ولد الاستاذ عمر أفندى فى مدينة المنصورة و مكث بها اربعون يوما و اقام فى القاهرة لمدة 10 أشهر ثم انتقل للإقامة بالخرطوم ولا زال يقطن هناك حتى الآن