Saturday, April 28, 2007

حادثة المزين




نعم ...حدث ما كنا ننتظره
حادثة المزين و التى تمت يوم الخميس الموافق 26 ابريل 2006
أول مرة يحلق فيها ...عمر ذهب الى الحلاق رغم كل حيله للتهرب من هذه الخطوة و اليكم التفاصيل بالصور كالعادة


بداية حاول الاختفاء اكثر من مرة لعل و عسى يفلت من هذا الامر

محاولة اخرى للإختفاء و الهرب داخل سريره


و عندما لم يجد وسيلة للهرب اصر على شراء كاب حتى يحافظ به على مظهره عقب اجراء عملية الحلاقة و اختار اللون الاحمر لانتمائه للنادى الاهلى كما تعرفون و فى الطريق الى مقر الحلاق حاول التظاهر بالنوم علنا نعدلعن القرار رأفة به و حتى لا نوقظه و لكن..


و عندما تظاهر بأنه سينام ...غلبه النوم بالفعل مما تسبب فى تأجيل العملية لساعة على الاقل قمنا باللف و الدوران بالعربية فى الشوارع حتى يستيقظ البيه من سباته.


و ها هو أخيراً على مقعد الحلاق و بين يديه و شرع فى قص شعره بالفعل و هو غير مستوعب ما يحدث كما ترون



أبراهيم ...مساعد مدحت الحلاق...كله دوره انه يمسك علبه كريم او قرشه لونها غريب و يلاعب عمر و يشاغله...و على مدار فترة الحلاقة كلها مدحت لا يكل و لا يمل من قوله لاعبه يا ابراهيم ...لاعبه يا ابراهيم..غيره له الالوان يا ابراهيم علشان بيزهق...مع ان عمر بيه لا كان بيعيط ولا كان زهقان ولا حاجة بل بالعكس كان محسسنا انه دى حاجة بيعملها كل يومين مثلاً.

عمر : انتا بتعمل ايه بالظبط يا عمو ؟؟؟


عمر: موش عايز ترد يا عمو ...ماشى انا زعلان منك :(((


للأسف بدأ شوف بقايا شعره المتساقط و بدأ يحس بالخطر و هو فى نفس حالة السكون و غير مستوعب الحدث

مدحت: خلاص يا عمورة خلصنا خلاص يا حبيبى

عمر: هيبقى بقت كده يا عمو برضه...تاخدنى على خوانة...ربنا يسامحك

و للحديث بقية

Tuesday, April 24, 2007

أهلى ...أهلى


عمر افندى اهلاوى صميم
و يتمنى الفوز على برشلونة اليوم

Sunday, April 22, 2007

العربية ...حلاوة الروح



عمر فى العربية الجديدة




بقالى كتير مدونتش






بقالى كتير متردد ادون...بقالى كتير مليش نفس اعمل حاجة






علشان حاجات كتير...علشان صحابى اللى كانوا بيتأذوا الفترة اللى فاتت فى ارزقاهم و حياتهم و مستقبلهم...علشانى انا شخصياً و الظروف اللى حصلتلى اللى لا داعى لذكرها المرة دى ...






المهم قبل الظروف دى بفترة كنت عايز احكى عن العربية...و للأسف بعد الظروف بقت العربية..حلاوة الروح






انا استلمت عربية من شهر يالظبط ..و اكيد اى حد من فيصل او الهرم او ما حولهم عرف بالخبر إن فى واحد بيسوق جديد راكب عربية لانوس فضى و طايح فى الشوارع و محدش عارف يوقفه...لآنى لسه بتعلم جديد و مبرحمشى






طبعاً بما انى متخيل ان عمر ابنى شريكى فى المدونة دى بالنص فا على الاقل انا ابقى بطل التدوين و هو بطل الصور فا الصور بتاعت العربية هو اللى مبلطج عليا و سايق مكانى زى منتو شايفين.موش عارف لما يكبر شوية هيعمل فينا ايه.






ليه بقى اسمها حلاوة روح علشان ممكن اسلمها قريب قوى ...



قدر الله لا يأتى إلا بخير و دا عنوان المدونة القادمة ان كان لينا عمر .






سلام مؤقت كالعادة

Sunday, April 8, 2007

عمر افندى

السلام عليكم
عمر افندى دا ابنى و بطل المدونة اللى متسمية بإسمه اصلاً
تقدروا تتفرجوا على بعض الصور بتاعته من ابداعى و كلها بموبايل نوكيا
N73
البرتقال معشوقه

تباع على ميكروباص

مياصة على المشاية الجديدة بتاعته




صورة الشهر

جعــــــــــاااااااان



المهندس عمر الشربينى على اللاب توب بتاعه


فى مملكته الصغيرة


يا عم صور بقى انا عايز اقوم



مناخيره الحمراء بعد الحادثة و سقوطه المدوى من على السرير

Tuesday, April 3, 2007

الكوباية المليانة





كنت مخنوق قوى امبارح لأسباب كتيييييير


مديرى و اهلى فى المنصورة و اصحابى اللى جنبى فى المنطقة...كل الناس دول اجتمعوا على هدف واحد امبارح ...انهم يملوا الكوباية


ايه موضوع الكوباية ده...موضوع الكوباية ده نقلاً عن بدوى صديقى الجديد اللى لسه عارفه من شهر بس و اللى خرجت اتفسحت معاه امبارح و اتمشينا على النيل و اكلنا قرع عسل و حكينا انا و هو كتير و فضفضنا كتير ارتحتله كتير قاللى ان الدكتور ابراهيم الفقى (اللى انا مبحبش اتفرج عليه مطلقاً)ذكر فى احدى محاضراته ان الواحد مننا بيخرج من بيته الصبح زى الكوباية الفاضية و بمرور الوقت على مدار اليوم بيقع من الميكروباص و هو ماشى فا الكوباية بتتملى شوية و بتنرفز من مديره فا الكوباية بتتملى كمان شوية و بيروح البيت يلاقى الاكل لساله نص ساعة و يخلص فى حين انه جعان مووووت فا بتتملى الكوباية شوية لحد ما بتبدأ تنزل مية زايدة و فى هذه المرحلة ببيبقى الشخص بدأ يضر بالاخرين بسبب ضيقه فا علشان كده لازم كل شوية تفرغ مية من الكوباية بإنك تحاول تغير من موودك و مزاجك بأى طريقة ...ممكن بنكتة ممكن بالصلاة و الاستغفار ..ممكن بمكالمة لحد انتا بتحبه..و ممكن بإنك تخرج مع بدوى و تاكل قرع عسل من عند لارين و تتمشى على النيل ,,,لانى ارتاحت بعدها و بعت رسالة اصالح بيها احمد سميراللى انا كنت ضايقته على مدار اليوم معايا فى الشغل


انا مبسوط قوى بالنصيحة وعلشان كده قررت انقلهالكم


و مبسوط قوى بمعرفتى ببدوى جداً


و مبسوط قوى انى بدون دلوقتى


تقريباً احسن حاجة تفرغلك الكوباية بتاعتك انك تتدون


اشوفكم مرة تانية