Monday, March 19, 2007

أبو عمر فى سطور 2


أبو عمر فى سطور 2

وصلنا لحد ما بدأت ادور على الإنترنت ..و على فكرة انا مكنتش بدور على النترنت على مواقع التوظيف لا انا كنت وصلت لمرحلة من الاحباط ممرتشى عليا فى حياتى و بدأت فى تدريب نفسى على احدث الالعاب على الكمبيوتر فيفا98 و نيد فور سبيد 2 و غيرها و كمان جميع برامج الاتشات بداية من اى سى كيو و مروراً بالام اس ان و انتهاء بالياهو و الام ار سى لان خلاص مفيش شغل ...مفيش فلوس..مفيش حياة.




icq




و فى يوم و على الانترنت واحد اتعرفت عليه بطريقة عشوائية اسمه افلاطون و بدأنا نبنى علاقة شخصية محترمة و احكيله عن ظروفى و كده و طلع هو مدير شئون العاملين براديو و تليفزيون العرب و اللى بدوره حاول يساعدنى و اخد السى فى بتاعى و ظبطنى فى ميعاد انترفيو فى يوم 10 رمضان منذ 6 سنوات و جيت القاهرة لمقابلة مدام غادة طلعت على وظيفة معد قاعدة بيانات...و اللى بدورها كانت عايز واحد موش مبرمج قد ما هى كانت عايزة واحد مختص فى قواعد البيانات و علشان كده ردت عليا و بكل دبلوماسية و قالتلى


"باسم انا الادارة بتاعتى فى روما فا هبعتلها و ارد عليك لما يرجعولى "


و سافرت و انا عارف ان موضوع روما دا فطشة و مفيش امل ...و بعد العيد ابراهيم حسين او "افلاطون" قالى طيب متبعتلها ميل يا سيدى تعيد عليها بس و تفكرها بيك...انا بصراحة كنت محرج و فى نفس الوقت محبط و عايز اتشبس باى امل ..و بعتلها الميل فعلاً و كان الرد بعده بخمس دقايق تعال يا باسم انا عايزة اقابلك يوم الاحد "الميل كان يوم الاربعاء"و ذهبت و قالتلى باسم انا ممكن اشغلك معايا شهر بدون مقابل و بدون وعد بالتثبيت و لو كنت بالكفاءة المطلوبة هنشكل لجنة و نشوف محتاجينك ولا لآ ..موافق؟؟قولتلها موافق و بدون تفكير و الحمد الله موش قعدت شهر ...انا سيبت الادارة دى و غادة طلعت بعد اربع سنين و نص بالتمام و الكمال.




بزناس




فىخلال المدة دى و بالتحديد فى نوفمبر 2001 يعنى بعد وجودى فى الشركة بحوالى شهور و فى10 رمضان برضه واحد صاحبى من شركة لينك و اسمه محمد جمال الحداد عزم عليا احضر سيمنار عن شركة اسمها بزناس و روحت و حضرت فى فندق شبرد و عجبنى الموضوع و دفعت اكبر مبلغ دخلت بيه مشروع فى حياتى فى ذلك الوقت 550 جنيه


و الحمد الله كان من القرارات الموفقة فى حياتى اتعرفت على ناس و طورت فى قدراتى و اخدت فلوس "تتش وود"و عملت علاقات وركبت طيارات و سافرت بره مصر "كانت واحد من احد امنياتى"و فضلت فيها لمده 3 سنوات.




i2




فى 6اغسطس 2005 انتقلت لشركة اتصالات الدولية لاعمل فى مجال التسويق و الحمد الله كان تحدى كبير بالنسبة لى انى اسيب الاى ار تى و اروح على شركة تانية و انا مستقر و امورى زى الفل و مطروح اسمى للسفر للعمل فى مركز البث بالأردن و فاضل على جوازى 3 اسابيع بس و اسيب كل ده و استقيل فى قرار من القرارات اللى الحمد الله كانت صائبة فى حياتى لانى استفدت من نقلتى فى كل الاتجاهات (علاقات -خبرة-كارير -فلوس-استقرار)و اترقيت بعد 6 شهور بس و بقيت سينيور و الى الان.




دى حياتى العملية من 11 سنة من ساعة ما نزحت الى قاهرة المعز زى ما قولتلكم من الحلقة الاولى .




خواطر و استفادات من هذه الرحلة ستكون فى الحلقة الثالثة




اراكم قريباً و مستنى تعليقاتكم :)


Thursday, March 15, 2007

قصاص





قصاص


عايز اقولك انى عمرى ما فكرت يوم انى هعمل مدونة ...بس حسيت انى لما هعمل كدة ممكن اعبر من مدى الحزن الشديد اللى انا فيه على فراقك...


يمكن ميوصلكشى الكلام ده بس بجد و الله يا قصاص كم يحزننى فراقك


انا موش بعرف اكتب يا جماعة ولا بعرف اقول كلام منمق بس بجد انا عملت المدونة دى مخصوص علشان اقول لقصاص انك هتوحشنى و انى بدعى من كل قلبى ان ربنا يرجعك و تعود لوالدك و والدتك و خطيبتك سالم غانم .

قصاص يا جماعة هو اللى عمرنا ما ندخل عند اى حد من اصحابنا و نفتكر نشتريله حاجة غير ما يكون هو اللى فاكر حاجة زى كده...قصاص هو اللى كان بيتابع معايا حاله والدى المرضية (رحمه الله) لمدة عام كامل بكل تفاصيلها الصغيرة و الكبيرة اكتر من لما كان محمد اخويا بيعمل .

قصاص اللى عند وفاة والدى ملقيتشى حد ابعتله رساله ابلغه غيره و على بعد 220 كيلوا و لقيته اول الموجودين فى صلاة الجنازة و اخر من غادر المقبرة معى...و هو من قام بلغ كل اصحابى و لقيتهم حواليا بيدعمونى ...


قصاص هو اخر واحد زارنى فى بيتى و صينية البسبوسة اللى جابهالى و هو جاى لسه مفتحتهاش لحد دلوقتى


و الله يا محمد علشان حب الناس دا ليك ربنا هيرجعلك لينا و فى اقرب فرصة


لسه موش عارف هعمل ايه تانى بالمدونة دى بعد كده بس انا كده عامة ارتحت


أبو عمر




Wednesday, March 14, 2007

ابو عمر فى سطور













بسم الله الرحمن الرحيم

نفتتح المدونة بحمد الله

اعرفكم بنفسى الاول ...انا باسم الشربينى..مواطن مصرى من المنصورة نزحت الى قاهرة المعز منذ 11 سنة من 1996 و درست بجامعة الازهر كلية العلوم و واخدها اربع سنين خطف على غيرناس كتير بيعمروا شوية فى كلية زى بتاعتى دى ..
كنت قسم كيمياء و مع ذلك بمجرد ما اتخرجت زى كل الشباب المصرى مكتبتش معادلة واحدة توحد ربنا من ساعة ما اتخرجت مع ان عايز اقولكم ان ايام ما كنت فى الكلية كان احمد زويل اكتشف الفيمتو ثانية و ساعتها موش انا بس دا كل الدفعة تخيلت انهم هيبقى علماء مصر القادمون او القادمين على حسب اعرابها فى الجملة...



من غير ما اطول عليكم اتخرجت و بدأت ادور على شغل فى شركات ادوية كتيييييير و وقفت فى صيدلية على امل اتعلم حاجة و بعدين جيت منحة برمجة الكبيوتر دخلتها و درست لمدة ست شهور كاملين ست ساعات فى اليوم من غير ولا يوم اجازة لحد ما بقيت مبرمج اوركل محترم و معايا شهادة عالمية بذلك و قولت خلاص طاقة البدر اتفتحتلى و نفسى احساسى ايام الفيمتو ثانية بتاعت زويل جالى تانى بس الايام دى على بيل جيتس بقى و انى هبقى من المبرمجين العظام على مستوى العالم و كمان هبقى غنى بقى و هتزهزه و علشان احنا فى بلد محترمة زيادة عن اللزوم و الاستاذ الفاضل عادل بيه امام قال انها بلد شهادات كملت خمسميت انترفيو فى شركات برمجة فى مصر كلها و كل الناس قالوا ان لازم اكون خريج حاسبات و معلومات او هندسة او اكون معايا خبرة محترمة و الحاجتين موش عندى ...انا معايا شهادة بانى مبرمج و واخد دورة ...
فا بدأت فى مرحلة بحث اخرى عن مجال جديد اخشه و قد كان عن طريق الانترنت اللى انتم بتتعاملوا معاه دلوقتى ...
بس انا بدون من مكتبى فى الشغل فا انا دلوقتى موش فاضى اكمل ...الحلقة التانية قريباً انتظرونا :)))

سلام مؤقت